Matshamela yo tsakisa ya ziphephana ziswa!

1. Zitiro muni za wutireli zi mahilweko hi ndlela yo tsakisa?

¹ Ka gotsovanyano wa muganga wa 2013 “A Mhaka ya Nungungulu lisine!” ku humesilwe a ntlhanu wa ziphephana ziswa. Tlhatakumbiri, a Mahungu ya Mufumo N.° 38, ma nga ni hloko ya mhaka “Xana a vafileko va zi kota ku tlhela va hanya hakunene?” ma patsilwe ka xaxamelo wa ziphephana lezi. Zontlhe a ziphephana lezi za ntlhanu ni xinwe zi na ni matshamela maswa yo tsakisa. Hi xihi xigelo xa matshamela maswa? A xikhati lexi hi zi nyikelako hi muti ni muti, hi nga lonzowotisa kuyini a matshamela ya zona ya ma nene kasi ku zi tirisa khwatsi?

2. Hi gihi kungo ga matshamela ya ziphephana ziswa?

² Xigelo xa matshamela maswa: A kutala ka zikhati a zingheniso zi nene zi patsa a mune wa zigava: (1) Maha xiwutiso xi lavako mawonela. (2) Ehleketa naye hi Mitsalo. (3) Mu nyike a bhuku nwinyi wa muti a lera. (4) Siya xiwutiso lezaku u ta mu hlamula ka siku ginwani, u tlhela u maha malulamiselo ya ku mu tlhelela. A matshamela ya ziphephana ziswa ma hi vuna ku lanzela a zigava zontlhe za mune hi ku olova.

3. Hi nga xi nyikelisa kuyini a xinwe xa ziphephana za ziswa wutirelini ke?

³ Matirisela: (1) Anzhako ko losana ni nwinyi wa muti, mu kombe a xiwutiso xi nga ni mihlamulo yo hlawula le’xi nga laha mahlweni ka xiphephana, zonake u mu wutisa mawonela. (2) Vulula xiphephana, mu bhulisana hi xipanze “Lezi a Biblia gi zi wulako.” Gonza mitsalo lomu ka Biblia hi ku kongoma loku a xiyimo xi vumela. Loku a nwinyi wa muti a hi ni xikhati, bhulisana naye hi xipanze “Lezi u zi bhinzulako hi ku kholwa a kuvuka ka vafileko.” (3) Mu nyike xiphephana, u tlhela u mu kuca a kuva a sala a lera xipanze xi seleko hi kuya hi xikhati xakwe. (4) Na u nga se suka, mu kombe a xiwutiso xi nga lenzhako, lahasi ka magezu “Alakanya lezi” u tlhela u maha malulamiselo ya ku ta bhula hi hlamulo wa Biblia ka siku ginwani.

4. Hi nga zi tirisisa kuyini a ziphephana za ziswa ka lienzo lo wuyela?

⁴ A ku maha lienzo lo wuyela za olovawu. Tirisa ntsena mitsalo yi tshahilweko yi nga le nzhako ka xiphephana kasi ku hlamula a xiwutiso lexi u mu siyeleko kumbheleni ka lienzo la wena lo gumesa. Na u nga se suka, mu kombe a mufota wa broxura Mahungu yo Saseka, u komba nwinyi wa muti a broxura zinwe ni nzima leyi nga ni mahungu yo engeteleka xungetano hi mhaka leyo, u tlhela u mu nyika broxura. Loku a gi amukela, maha malulamiselo ya lezaku u wuya kambe mu ta bhula hi gona. Zalezo u sangulile xigonzo xa Biblia! Ahandle ka ku nyikela broxura, u nga ha nyikela xiphephana xinwani u tlhela u maha malulamiselo yo bhula hi xona ni nwinyi wa muti ka lienzo li tako.

5. Lisima muni li nga ni ziphephana wutirelini ga hina?

⁵ A ziphephana zi kari zi tirisiswa wutirelini ga hina hi xipimo xo hunza 130 wa malembe. Hambu lezi a matshamela ya zona ma hambanahambanako, zona zitiro zi bhinzulako zo xumayela hi zona. Hi nga ha lonzowota khwatsi a matshamela maswa ya ziphephana kasi ku xwanya a wutivi ga Biblia misaveni yontlhe. — Mav. 15:7a.