Zwana gezu ga Jehova ni kwihi u nga kona

1, 2. Jehova i wulawulisa kuyini ni malanza yakwe?

LOMU ka Biblia, a vanhu va wa kuma wurangeli ga Jehova hi tindlela to hambanahambana. A vokari, Nungungulu i wulawulile navo hi ku tirisa tingelosi, miwoniso kutani miloro kasi ku va byela lezi zi nga wa ta maheka xikhatini xi tako. Jehova i wa va nyika ziavelo za mitiro kambe. (Mitse. 7:89; Ezek. 1:1; Dan. 2:19) A vanwani va amukele wukongomisi ka vanhu va nga tira kota vayimeli va Jehova ka xipanze xa laha misaveni xa hlengeletano yakwe. Na ku nga khataliseki lezi a vanhu va Jehova va nga yi kumisa zona a mhaka yakwe, lava va nga ingisa zileletelo zakwe va wa katekiswa.

² Inyamutlha, Jehova i rangela vanhu vakwe hi ku tirisa Biblia, moya wakwe wa ku basa ni bandla. (Miti. 9:31; 15:28; 2 Tim. 3:16, 17) A wurangeli legi a hi nyikako gi dlunyatekile nguvu laha ko tlhela zi ku khwatsi hi loku ‘a tindleve ta hina tizwa a gezu lenzhako ka hina, giku: A ndlela hi leyi, famba ha yona.’ (Isa. 30:21) Hi lisine, hambu Jesu i hi zwisa a gezu ga Jehova a xikhati a rangelako a bandla hi ku tirisa a “nanza gi tsumbekileko ni go tlhariha.” (Mat. 24:45) Hi fanele ku wona wurangeli ni wukongomisi gakwe kota ga lisima, hakuva a wutomi ga hina ga pinzukelwa gi khegela ka kuingisa ka hina. — Maheb. 5:9.

3. Xini xi nga hi colopetelako ku amukela wukongomisi ga Jehova? (Wona mufota laha hehla.)

³ Satani Diabolus i zama ku maha lezaku a wurangeli gi nyikako wutomi legi Jehova a hi nyikako gi luza ntamu. Tlhatakumbiri, ‘a mbilu ya hina yi khohlakeleko’ yonawu yi nga ha hi colopetela ka ndlela leyi hi amukelako ha yona a zileletelo za Jehova. (Jer. 17:9) Hikwalaho, a hi wulawuleni hi lezi hi nga hlulisako zona a zihingakanyiso lezi zi nga mahako lezaku zi hi karatela ku ingisa gezu ga Nungungulu. A hi woneni kambe lezi a kubhulisana ka laha kusuhani na Jehova ku to vikelisa zona a kuzwanana ka hina naye na ku nga khataliseki a ziyimo za hina.

HLULA MANO YA SATANI

4. Satani i zama ku onha kupima ka vanhu hi ndlela muni?

⁴ Satani i zama ku onha kupima ka vanhu hi ku hangalasa mahungu ya mawunwa. (Gonza 1 Johani 5:19.) Ahandle ka mabhuku ni maphepha, a tiko gontlhe — a ku patsa ni matshamu ya le kule ni doropa — ga chikelelwa hi mahungu lawo hi radiyu, televizawu, ni Internet. Hambu lezi a zihaxa-mahungu lezo zi tshukako zi nyika mahungu ya lisima, a kutala ka zikhati zi vuvumisa mahanyela ma lwisanako ni matshinya ya milayo ya Jehova. (Jer. 2:13) Hi xikombiso, a zihaxa-mahungu ni vamahi va zihungato va wulawula hi kutekana ka vanhu va xiro xa wubeleki xo fana kota zilo zi amukelekako, niku a vanhu vo tala va alakanya lezaku a Biblia ga hunzeleta mhakeni leyi. — 1 Kor. 6:9, 10.

5. Hi nga potsisa kuyini ku kukuletwa hi mahungu ya Satani?

⁵ Lava va ranzako kululama ka Nungungulu va nga potsisa kuyini ku kukuletwa hi mahungu ya Satani ke? Va nga hambanyisisa kuyini a za zi nene ni lezi zo biha? “Hi ku gonga a mhaka ya [Nungungulu]”! (Tis. 119:9) A Mhaka ya Nungungulu yi tsalilweko yi na ni wurangeli legi gi hi vunako ku hambanisa mahungu ya lisine ni lawa ya mawunwa. (Mav. 23:23) Na a tshaha Mitsalo, Jesu i wulile lezaku ‘a munhu i hanya hi timhaka tontlhelele leti ti humako nonwini wa Nungungulu.’ (Mat. 4:4) Hi fanele ku gonza ku tirisa matshinya ya milayo ya Biblia wutomini ga hina. Hi xikombiso, na za ha hi kule nguvu ni kuva Mosi a tsala a nayo wa Jehova wa ku beletela wubhayi, Josefa i zi zwisisile lezaku a ku maha lezo zi wa tava xionho ka Nungungulu. A nga zangi a ehleketa hi ku nga ingisi Nungungulu a xikhati lexi kata Potifare a nga zama ku mu kokela xionhweni. (Gonza Genesisi 39:7-9.) Hambu lezi a sati wa Potifare a nga mu kurumeta hi xikhati xo leha, Josefa a nga vumelangi ku a gezu gakwe gi mu tsikisa kuzwa le’ga Jehova. A kuzwa a gezu ga Jehova ni ku nga ingisi a mahungu ya Satani i nchumu wa lisima kasi ku hambanisa a za zi nene ni za kubiha.

6, 7. Zini hi faneleko ku maha kasi ku potsa wusungukati go biha ga Satani?

⁶ A tiko gi tele nguvu hi tigonzo ta wukhongeli to lwisana laha ka kuza a vanhu vo tala va zi wona zi hi nyuko wa mbyana a ku lavetela wukhongeli ga lisine. Hambulezo, Jehova i maha lezaku a wurangeli gakwe giva go dlunyateka ka lava va ti yimiseleko ku gi lanzela. Hi fanele ku hlawula loyi hi ta nga mu ingisa. Kota lezi zi nga kotekiko ku ingisa magezu mambiri hi khati ginwe, hi fanele ku “tiva a gezu” ga Jesu hi tlhela hi gi ingisa. Hi yena loyi Jehova a mu yimisileko hehla ka tiyivu takwe. — Gonza Johani 10:3-5.

⁷ Jesu i te ngalo: “Tlharihani hi lezi mu zi zwako.” (Mar. 4:24) A wusungukati ga Jehova ga dlunyateka niku gi lulamile, kanilezi hi fanele ku demba ndleve hi ku longiselela a mbilu ya hina lezaku hi gizwa. Loku hi nga ti woneli, hi nga tshuka hi demba ndleve ka wusungukati go biha ga Satani wutshanwini ga wusungukati ga liranzo ga Nungungulu. Hi nga tshuki hi tsika wutomi ga hina gi rangelwa hi wucenje, tividiyu, milongoloko ya televizawu, mabhuku, vanghana, vagonzisi, kutani vanhu va wuliwako lezaku titlhari. — Kol. 2:8.

8. a) Xana a mbilu ya hina yi nga hi maha hi phasiwa hi mano ya Satani hi ndlela muni? b) Zini zi nga hi humelelako loku ho kanyisa zitlharihiso ke?

⁸ Satani wa zi tiva lezaku hi na ni kubyekelela ka kuonha, niku i zama ku hi maha hi ku tatisa. Loku Satani a hi vekela tihlo hi ndlela leyi, zi karata nguvu ku hlayisa kutsumbeka ka hina. (Joh. 8:44-47) Hi nga xi hlulisa kuyini xikarato lexi? Ehleketa hi munhu a pelako hi hloko kutitsakiseni ka xikhatanyana laha ka kuza a maha nchumu wo biha lowu a nga ti byela lezaku a nga ta tshuka a wu maha. (Rom. 7:15) Xini xi mu petileko khombyeni lego? Za koteka ku ngha a nofa tindleve hi kutsongwani-kutsongwani, a nga hazwi a gezu ga Jehova. Kuzilava i wa nga ha zi koti ku wona a zitlharihiso xungetano hi lezi zi nga humelela mbilu yakwe kutani i wa nga ha khatali hi zona. Hi xikombiso, za koteka ku ngha a nyimile ku khongela, a hungula kuhiseka wutirelini, kutani ku sangula ku lova mitlhanganweni. Hi magumo i lo hlulwa hi kunavela, zonake a maha nchumu a nga wu tiva lezaku wu bihile. Hi nga potsa khombo lego loku hi simama ku cuwuka zitlharihiso hi tlhela hi lulamisa ni xihi xi lavekako. Niku loku hi demba ndleve ka gezu ga Jehova, hi nga ta tshama hi gayela mawonela ya vahluwuki. — Mav. 11:9.

9. Hikuyini zi nga za lisima ku pola kubyekelela ka hava na ka ha sangula ke?

⁹ A ku pola mababyi na ma ha sangula, za ponisa wutomi. Hi kufanana, hi nga potsa a khombo loku hi hatlisa hi pola a kubyekelela loku ku nga hi yisako xiringweni. Zalezo hi polako a kubyekelela loko, zi wa tava wutlhari kuva hi tekela ku maha xo kari  —  na hi nga se ‘phasiwa hi Satani, lezaku hi maha kuranza kakwe.’ (2 Tim. 2:26) Zini hi faneleko ku maha loku hi pola lezaku hi tsikile kupima ka hina ni mbilu ya hina zi hambuka ka lezi Jehova a zi lavako ka hina ke? Wutshanwini go teka xikhati, hi fanele hi ti koramisa hi tlhelela kakwe, hi demba tindleve ta hina ka wusungukati gakwe, hi tlhela hi mu ingisa hi mbilu ya hina yontlhe. (Isa. 44:22) Hi fanele hi tiva lezaku a xiboho xa wupumbu xi nga tshuka xi hi vangela zilonza za hombe lezi zi nga hi mahako hiva ni kuxaniseka ka hombe tikweni legi. Zi tava wutlhari ga hombe a ku potsa ku huma ndleleni hi ku tekela ku potsa xihoxo lexo xa hombe!

HLULA MATSHANZA NI MAKANGWA

10, 11. a) A matshanza ma ti kombisa kuyini? b) Hi gonza yini ka zimaho zo biha za Kora, na Datani, na Abiramu?

¹⁰ Hi fanele ku tiva lezaku a mbilu ya hina yi nga hi humesa ndleleni. A kubyekelela ka hina ka kuonha ku na ni ntamu wa hombe nguvu! Hi xikombiso, ehleketa hi matshanza ni makangwa. Wona lezi a ginwe ni ginwani ga matshamela lawo gi nga hi colopetelisako zona kuzwa a gezu ga Jehova gi tlhela gi hi peta ndleleni ya hava. A munhu wa matshanza i ti wonela hehla ku hunza mpimo. A nga ha ti wona na a hi ni fanelo ya ku maha ni xihi a xi lavako a tlhela a nga lavi kuzwa zo byeliwa. Hikwalaho a nga ha alakanya lezaku a wurangeli ni wusungukati ga maKristu-kulobye, madota, hambu hlengeletano ya Nungungulu, a gi mu ringani. Ka munhu loye, a gezu ga Jehova a gi zwali.

¹¹ Laha a vaIsraeli va nga hi le xiwuleni, Kora, na Datani, na Abiramu va lo hluwukela a wuhosi ga Mosi na Aroni. Hi kota ya matshanza, a vahluwuki lavo va lo maha malulamiselo ya vona wutsumbu kasi ku khozela Jehova. Jehova i te yini? I lo va lovisa. (Mitse. 26:8-10) A matimu lawa ma hi nyika xigonzo xa lisima nguvu. A ku hluwukela Jehova zi yisa khombyeni. A hi alakanyeni kambe lezaku “a matshanza ma rangela kulova.” — Mav. 16:18; Isa. 13:11.

12, 13. a) Nyika xikombiso xi kombako lezaku a makangwa ma nga yisa khombyeni. b) Tlhamusela lezi a makangwa ma nga kulisako zona hi kuhatlisa loku ma nga wonelelwi.

¹² Ehleketa kambe hi makangwa. A munhu wa makangwa i tolovela ku hlokolokela ku maha zilo zi nga faneliko. A xikhati lexi Namani, a nduna ya butho ga Siria, a nga hanyiswa hlokonho, i lo humesa zinyikiwo a nyika muprofeti Elixa, kanilezi i lo zi ala. A nanza gakwe Gehazi i lo navela zinyikiwo lezo. Gehazi i lo ti byela lezi: “Nzi hlambanya ha Jehova a hanyako, nzi ta tsutsuma nzi mu lanza [Namani] nzi ya teka nchumu ka yena.” Na a nga salisangi Elixa, Gehazi i lo lanza Namani a ya mu hembela kasi ku kombela “a talenta ya siliva ni tinguwo timbiri.” Zini zi nga humelela Gehazi hi kuva a mahile lezo a tlhela a hembela muprofeti wa Jehova ke? A hlokonho ya Namani yi loya ka Gehazi wa makangwa. — 2 Tih. 5:20-27.

¹³ A makangwa ma nga sangula hi kutsongwani-kutsongwani, kanilezi loku ma nga wonelelwi, ma nga kula hi kuhatlisa ma tlhela ma fumela munhu. A matimu ya Biblia ya Akana ma kombisa a ntamu wa makangwa. Wona lezi a makangwa ya Akana ma nga kulisa zona hi kuhatlisa. I te ngalo: “Nzi lo wona xikari ka lezi zi phangilweko a nguwo yo saseka ya le Babuloni, ni mazana mambiri ya maxekeli ya siliva, ni muhono wa nzalama wa 50 wa maxekeli a kubinza, mina nzi lo zi navela, nzi teka.” Wutshanwini ga ku potsa kunavela ko biha, Akana hi makangwa i lo yiva zilo lezo a zi fihla tendeni gakwe. Laha a xionho xa Akana xi nga tiveka, Joxua i lo mu byela lezaku Jehova i wa ta mu nehela khombo. Akana ni ngango wakwe va lo gandliwa hi maribye vafa ka siku galego. (Jox. 7:11, 21, 24, 25) A munwe ni munwani wa hina a nga tshuka a telwa hi makangwa a ku fana na Akana. Hikwalaho ngha hi “chava a timbilu ta makangwa.” (Luka 12:15) Hambu lezi hi nga tshukako hi telwa hi maalakanyo ya hava kutani ku alakanyela zilo zi nga hlazekangiko, za lisima kuva hi wonelela a maalakanyo ya hina hi tlhela hi nga tsiki kunavela ka hina ku kula laha ka kuza hi maha xionho. — Gonza Jakobe 1:14, 15.

14. Xini hi faneleko ku maha loku hi pola lezaku hi na ni kubyekelela ka matshanza ni makangwa?

¹⁴ A matshanza ni makangwa ma nga hi yisa khombyeni. A ku ehleketisisa hi wuyelo ga ku maha zilo zo biha zi ta hi vuna ku nga vumeleli a kubyekelela loku lezaku ku valela a gezu ga Jehova. (Deut. 32:29) Lomu ka Biblia, a Nungungulu wa lisine a nga hi byeli ntsena a ndlela yi nene ni yi faneleko, kanilezi i tlhela a hi tlhamusela hi wuyelo ga ku famba hi yona zinwe ni wuyelo ga ku famba hi ndlela yo biha. Loku a mbilu ya hina yi hi kuca ku maha nchumu wu susumetwako hi matshanza kutani makangwa, zi tava wutlhari a ku ehleketisisa hi wuyelo ga kona. Hi fanele ku alakanyisisa hi lezi a wuyelo ga kona gi to hi khumbisa zona, lava hi va ranzako, nguvunguvu a kuzwanana ka hina na Jehova.

SIMAMA KUVA NI KUBHULISANA KU NENE NA JEHOVA

15. A xikombiso xa Jesu xi hi gonzisa yini xungetano hi ku bhula na Jehova?

¹⁵ Jehova i hi navelela za zi nene. (Tis. 1:1-3) I hi nyika wurangeli go tala hi xikhati hi gi lavako. (Gonza Maheberu 4:16.) Hambu lezi a nga hi munhu wo mbhelela, Jesu i wa zi wona zi hi za lisima ku bhulisana na Jehova hi kukhanzakanya; i wa nga tsiki ku khongela. Jehova i lo seketela Jesu ni ku mu rangela hi tindlela to tsalangana. I lo rumela tingelosi lezaku ti ya mu tirela, a mu nyika moya wa ku basa lezaku wu mu vuna, a tlhela a mu rangela kuhlawuleni ka vapostoli vakwe va 12. Ku lo zwala gezu ga Jehova hi le tilweni, gi komba a kukhatala kakwe ni kuxalala kakwe ha Jesu. (Mat. 3:17; 17:5; Mar. 1:12, 13; Luka 6:12, 13; Joh. 12:28) Hinawu hi fanele ku vulula mbilu ya hina ka Nungungulu hi mukhongelo a ku fana na Jesu. (Tis. 62:7, 8; Maheb. 5:7) A mukhongelo wu nga hi vuna lezaku hi simama ku bhulisana khwatsi na Jehova hi tlhela hi hanya wutomi gi mu nehelako wudzunzo.

16. Jehova i hi vunisa kuyini ku ingisa a gezu gakwe?

¹⁶ Hambu lezi Jehova a hi nyikako wusungukati gakwe mahala, a nga sinzisi munhu lezaku a gi lanzela. Hi fanele ku kombela moya wakwe wa ku basa — i ta hi nyika hi matsenya. (Gonza Luka 11:10-13.) Hambulezo, za lisima kuva hi ‘tlhariha lezaku hi zwisisa kuyini.’ (Luka 8:18) Hi xikombiso, zi wa tava ku ti kanganyisa a ku kombela Jehova lezaku a hi vuna ku hlula kunavela ka masango kuveni ha ha simama ku hlalela zithombe za masango kutani mafilimu ma nga hlazekangiko. Hi fanele ku ti karatela kuva ka matshamu kutani ziyimo lezi a moya wa Jehova wu tirako ka zona. Ha zi tiva lezaku a moya wakwe wu kona mitlhanganweni ya bandla. A malanza yo tala ya Jehova ma potsa timhango hi kuzwa gezu ga Jehova mitlhanganweni ya hina. Kota wuyelo ga kona, va pola kunavela ka hava loku ku va tela mbilwini va tlhela va ku lulamisa. — Tis. 73:12-17; 143:10.

SIMAMA KU DEMBA NDLEVE KA GEZU GA JEHOVA

17. Hikuyini a ku ti tsumba zi nga ni mhango?

¹⁷ Ehleketa hi Hosi Davida wa le Israeli wa kale. Na a ha hi jaha, i lo hlula Goliate a nga hi xihotlovila xa muFilistia. I lo maha musochwa, hosi, muvikeli, ni mumahi wa ziboho za tiko. Kanilezi a xikhati lexi Davida a nga ti tsumba, a mbilu yakwe yi lo mu khohlisa zonake a maha xionho xa hombe na Batexeba, laha ko tlhela a maha malulamiselo ya lezaku a nuna wa kona Uria a dawa. Laha a nga kawukiwa, Davida i lo ti koramisa a vumela xionho xakwe a tlhela a vuxa kuzwanana kakwe na Jehova. — Tis. 51:4, 6, 10, 11.

18. Xini xi nga hi vunako ku simama hizwa gezu ga Jehova?

¹⁸ Ngha hi ingisa a wusungukati gi nga ka 1 Va Le Korinte 10:12, hi nga ti tsumbi ku hunza mpimo. Kota lezi hi nga zi kotiko ku “lulamisa a mazambo” ya hina, hi magumo hi ta ingisa gezu ga Jehova kutani ga Nala wakwe. (Jer. 10:23) Ngha hi khongela hi kukhanzakanya, hi lanzela a wurangeli ga moya wa ku basa hi tlhela xikhati xontlhe hi demba khwatsi ndleve ka gezu ga Jehova.