MIHLAMULO YA BIBLIA
Xana a tingelosi ti nga hi vuna?
Khwatsi hi lezi ti vunileko Danieli, a nanza go tsumbeka ga Nungungulu, ni inyamutlha konawu a tingelosi ta vuna vanhu lezaku va vuneka hi mahungu yo saseka
Jehova Nungungulu i vangile a tingelosi to tala nguvu na a nga se vanga vanhu. (Joba 38:4, 7) A tingelosi leto zivangwa za moya za ntamu zi tirelako Nungungulu. Ka zikhati zo kari wa zi ruma lezaku zi rangela ni ku vikela a malanza yakwe laha misaveni. (Tisimu 91:10, 11) Inyamutlha, a tingelosi ti vuna vanhu lezaku va vuneka hi mahungu yo saseka lawa a valanzeli va Jesu va xumayelako. — Gonza Kuvululelwa 14:6, 7.
Xana hi fanele ku khongela ka tingelosi lezaku ti hi vuna? Ahihi. A ku maha mukhongelo i ndlela ya kukhozela, kuveni hi fanele ku khozela Nungungulu basi. (Kuvululelwa 19:10) Kota lezi a tingelosi ti nga malanza ya Nungungulu, tona ti lanzela zileletelo za Nungungulu na ku nga hi za vanhu. Hikwalaho, xontlhe xikhati hi fanele ku khongela ka Nungungulu hi Jesu. — Gonza Tisimu 103:20, 21; Mateu 26:53.
Ku na ni tingelosi to biha?
A ku fana ni vanhu, a tingelosi ti mahilwe na ti hi ni kutihlawulela hikwalaho ti nga hlawula ku maha za zi nene kutani zakubiha. Lexi xi nga tsakisiko hi lezaku a tingelosi to tala ti lo hluwukela Nungungulu. (2 Pedro 2:4) A yo sangula xikari ka tona hi Satani; leti tinwani ti lo lanzela zonake ti maha madimoni. Ka xikhati xa zalezanyana Satani ni madimoni yakwe va lo hlongolwa le tilweni va hoxwa lahasi misaveni. — Gonza Kuvululelwa 12:7-9.
A kuanza ka wubihi ni tihanyi kusukela hi 1914 zi komba lezaku lokuloku Nungungulu i ta lovisa Satani ni madimoni yakwe. Anzhako ka lezo, Nungungulu i ta tlhelisela misava ka matshamela ya yona yo sangula ya lezaku yiva paradise. — Gonza Kuvululelwa 12:12; 21:3, 4.