Lezi a tingelosi ta Nungungulu ti hi vunisako zona

A VANHU vo kari va wula lezaku va kholwa lezi va zi wonako basi. Kanilezi, lezo wupumbu. Ku na ni zilo zo tala hi zi tivako lezaku zi kona kanilezi hi kalako hi nga se tshuka hi zi wona. U nga wula xinwe xa zona? —

Ahati a moya lowu hi hefemulako ke? Hi nga wuzwa? — Tlakusa canja ga wena, u gi vureta. Wazwa nchumu wo kari? — Ina, wa wuzwa kanilezi a wu zi koti ku wona moya, a hi zona? —

Hi sina hi wulawulile hi vanhu va moya lava va nga kona kanilezi hi kalako hi nga va woni. Hi gonzile lezaku a to kari ti nene kanilezi a tinwani ti bihile. Wula mavito ya vanhu vo kari va va nene va moya hi kalako hi nga zi koti ku va wona. — Hi zona, ku na na Jehova Nungungulu, na Jesu ni tingelosi ta ti nene. Ku na ni tingelosi tinwani ta kubiha? — A Biblia gi wula lezaku ti kona. Nzi byele lezi u gonzileko xungetano hi tona. —

A xinwe xa zilo hi gonzileko hi lezaku a tingelosi ta ti nene ni leti to biha ti na ni ntamu a ku hunza hina. Mugonzisi wa Hombe i wa tiva zotala xungetano hi tingelosi. Hakuva i wa hi ngelosi na a nga seta a ta pswaliwa laha misaveni kota nwanana. I wa hanyile ni tingelosi tinwani le tilweni. I tivile tingelosi to tala nguvu. Xana a tingelosi tontlhe leto ti na ni mavito? —

Hi gonzile lezaku Nungungulu i ti chulile mavito a tinyeleti. Hikwalaho, hi nga tiyiseka lezaku a tingelosi tonawu ti na ni mavito. Niku ha zi tiva lezaku ta bhula zinwe hakuva a Biblia gi wulawula hi ‘lirimi la tingelosi.’ (1 Va Le Korinte 13:1) Hi mawonela ya wena, a tingelosi ti bhula hi yini? Ta wulawula hi hina laha misaveni? —

Ha zi tiva lezaku a tingelosi ta Satani, a madimoni, ti zama ku hi kucetela lezaku hi nga ingisi Jehova. Hikwalaho, za koteka ku ti bhula hi lezi ti nga mahako kasi hi tsika ku ingisa. Ti lava lezaku hi fana na tona kasi hinawu hi nga tsakelwi hi Jehova. Kanilezi, ahati a tingelosi to tsumbeka ta Nungungulu ke? U alakanya lezaku tonawu ta wulawula hi hina? — Ina, ta wulawula hi hina. Ti lava ku hi vuna. Khwatsi nzi ku hlawutela lezi a tingelosi to kari ti vunisileko zona lava va nga ranza Jehova va tlhela va mu tirela.

Hi xikombiso, ku wa hi ni wanuna wo kari waku hi Danieli a nga hanya le Babuloni. A vanhu vo tala le Babuloni va wa nga mu ranzi Jehova. A vanhu va lomo va zile va yimisa nayo lowu wu nga wa ta maha lezaku ni wihi loyi a nga wa ta maha mukhongelo ka Jehova Nungungulu, a tsayiswa. Kanilezi, Danieli a nga tsikangi ku maha mukhongelo ka Jehova. Wa zi tiva ku zini va nga mu maha Danieli? —

Ina, a vanhu vo biha va lo hoxa Danieli lomu nkeleni wa tinghala. Lomu nkeleni, Danieli i wa hi yece ni tinghala ti ngazwa ndlala. Wa zi tiva ku zini zi nga humelela anzhako ka lezo? — Danieli i te ngalo: “Nungungulu wa mina i rumele a ngelosi yakwe yi ta vala milomu ya tinghala.” A ti mu bayisangi, ne ni kutsongwani! A tingelosi ti nga va mahela a zilo za zi nene lava va tirelako Jehova. — Danieli 6:18-22.

Ka khati ginwani, Pedro i lo valelwa paxweni. Nzi alakanya ku wa ha zi alakanya lezaku Pedro i wa hi munghana wa Jesu Kristu, Mugonzisi wa Hombe. A vanhu vo kari va wa nga zi tsakeli loku Pedro a va byela lezaku Jesu i wa hi N’wana wa Nungungulu. Hikwalaho, va lo valela Pedro lomu paxweni. Ku lo vekiwa masochwa lezaku ma tshama ma cuwukela Pedro kasi a nga humi a tsutsuma. I wa ta vuniwa hi mani? —

Pedro i wa etlele xikari ka masochwa mambiri, niku i wa bohilwe mawoko hi machini. Kanilezi, a Biblia gi wula lezi: ‘Languta, a ngelosi ya Jehova yi lo yima kakwe, ni kuwonekela ku woninga lomu ndlwini; yi lo henya Pedro laha reveni, yi mu vuxa, yiku: “Hatlisa u suka.”’

Ka xikhati xalexo, a machini lawa ma nga bohile mawoko ya Pedro ma lo tlhatlheka! A ngelosi yiku: ‘Boha bhandi, u ambala zilato za wena, u nzi lanzela.’ A masochwa a ma zi kotangi a ku va nyimisa hakuva Pedro i wa vuniwa hi ngelosi. A xikhati lexi va nga chikela laha ka livati la tisimbi, ku lo humelela a nchumu wo hlamalisa. A livati li lo vululeka ha loce! A ngelosi leyo yi lo tlhatlhisa Pedro kasi a simama ku xumayela. — Mitiro 12:3-11.

Xana a tingelosi ta Nungungulu ti nga hi vuna hinawu? — Ina, ti nga hi vuna. Xana lezo zi wula lezaku ti nga ta tshuka ti hi tsika hi bayisiwa? — Ahihi, a tingelosi ti nga ta hi vikela loku hi maha zilo zo fayela. Kanilezi, hambu loku hi nga mahi zilo zo fayela, hi nga tshuka hi bayisiwa. A tingelosi a ti byeliwangi lezaku ti fanele ku tshama hi ku hi vikela kasi hi nga bayisiwi. Kanilezi, Nungungulu i ti nyikile ntiro wo hlawuleka kasi ti wu maha.

A Biblia gi wulawula hi ngelosi leyi yi byelako vanhu misaveni yontlhe lezaku va khozela Nungungulu. (Kuvululelwa 14:6, 7) A ngelosi leyo yi va byelisa kuyini lezo? Xana yi banguleka na yi hi kwale tilweni kasi a vanhu vontlhe va yizwa? — Ahihi, a valanzeli va Jesu laha misaveni va gonzisa vanwani xungetano hi Nungungulu. A xikhati lexi va mahako a ntiro lowo, va vuniwa hi tingelosi. A tingelosi ti vunetela kasi vontlhe lava va lavako ku tiva Nungungulu vazwa mahungu lawo. Hinawu hi nga xumayela mahungu lawo, niku a tingelosi ti ta hi vuna.

Kanilezi, ahati loku a vanhu lava va nga mu ranziko Nungungulu va hi xanisa ke? Va hi valela paxweni? Xana a tingelosi ti ta hi humesa paxweni? — Ti nga hi humesa. Kanilezi, a hi xontlhe xikhati ti mahako lezo.

A mulanzeli wa Jesu wa ku hi Paule i tshukile a valelwa paxweni. Na a ha hi xibochwa, i lo ngheniswa lomu ka ngalava kasi a ya wonana ni hosi yo kari ya ku hi Kesari. A xikhati lexi va nga kari va famba hi ngalava leyo, ku loba moya wa hombe nguvu. Kanilezi, a tingelosi a ti tekelangi ku mu ponisa. Hakuva ku wa hi ni vanhu vanwani va nga lava ku gonzisiwa va tiva Nungungulu. A ngelosi yo kari yi lo wula lezi: “U nga chavi, Paule; wena u yimelwe hi ku yima mahlweni ka Kesari.” Kunene, Paule i wa fanele kuya ka Kesari kasi ku ya mu xumayela. Xontlhe xikhati a tingelosi ti wa ku tiva lomu Paule a nga hi kona, ti tlhela ti mu vuna. Hinawu ti ta hi vuna loku hi tirela Nungungulu hi kutsumbeka. — Mitiro 27:23-25.

Ku na ni ntiro wunwani wa lisima lowu a tingelosi ti to wu maha lokuloku. A xikhati xa lezaku Nungungulu a lovisa a vanhu va kubiha xi laha kusuhani nguvu. Vontlhe lava va kalako va nga tireli Nungungulu wa lisine va ta lovisiwa. Lava va wulako lezaku a va kholwi a ku a tingelosi ti kona hi lezi va kalako va nga ti woni va ta wona lezaku va wo ti kalavela. — 2 Va Le Tesalonika 1:6-8.

Lezo zi wula ku hi fanele ku maha yini? — Hi fanele ku yima tlhelweni ga tingelosi ta Nungungulu. Loku hi hi tlhelweni ga tingelosi ta Nungungulu, ti ta hi vikela. Xana hina hi tlhelweni ga tona? — Ina, hi tlhelweni ga tona loku hi tirela Jehova. Niku loku hi tirela Jehova, hi ta bhula ni vanwani xungetano hi yena kasi vonawu va mu tirela.