Seketela vamakabye va Kristu hi kutsumbeka

1, 2. a) Mifananiso muni leyi Jesu a hlawuteleko vanghana wakwe va hombe? (Wona mufota laha hehla.) b) Zini hi faneleko ku zi tiva xungetano hi mufananiso wa tiyivu ni timbuti?

JESU i wa kari a bhula ni vanghana vakwe va hombe Pedro, na Andreu, na Jakobe, na Johani. I wa ha hi ku va hlawutela a mufananiso wa nanza gi tsumbekileko ni go tlhariha, wa khume ga vanhwana, ni wa titalenta. Jesu i lo dayelela hi mufananiso wunwani. I lo wulawula hi xikhati lexi “a N’wana wa munhu” a to ta lamula “a matiko wontlhe.” Hi nga alakanyela lezi a mufananiso lowu wu va khumbisileko zona a vapizani vakwe! Ka wona, Jesu i lo veka kupima ka mitlawa yimbiri — wunwe wu wuliwako tiyivu ni wunwe wa timbuti. I lo tlhela a wulawula hi ntlawa wunwani wa wunharu lowu a nga wu wula lezaku “vamakabye” va “Hosi.” — Gonza Mateu 25:31-46.

² A vanhu va Jehova vata na va karatiwa hi mufananiso lowu hi malembe niku va na ni xigelo, hakuva ka wona, Jesu i wulawula hi wumanziko ga vanhu. I komba a ku hikuyini a vokari va to kuma wutomi ga pinzukelwa, a vanwani va kuma kufa ka pinzukelwa. A wutomi ga hina gi khegela ka ku zwisisa a lisine leli Jesu a nga li wula ni ku hanya hi lona. Hikwalaho, hi fanele ku ti wutisa lezi: Jehova i hi vunisile kuyini ku zwisisa mufananiso lowu hi kutsongwani-kutsongwani? Hikuyini hi nga wulako lezaku a mufananiso lowu wu khanyisa a lisima la ntiro wa kuxumayela? Hi vamani va nyikilweko a ntiro wa kuxumayela? Niku hikuyini zalezi ku nga xikhati xa ku tsumbeka ka “Hosi” ni ka lava yi va wulako lezaku “vamakabye va mina”?

JEHOVA I HI VUNISA KUYINI KU ZWISISA MUFANANISO LOWU?

3, 4. a) Zilo muni za tshinya hi faneleko ku zi tiva kasi ku zwisisa a mufananiso wa tiyivu ni timbuti ke? b) A Murinzeli i wu tlhamuselisile kuyini a mufananiso lowu hi 1881?

³ Kasi ku zwisisa khwatsi a mufananiso wa tiyivu ni timbuti, hi fanele ku zwisisa a zilo zinharu za tshinya laha ka wona: a ku hi vamani va wuliwako, a xikhati xa kulamulwa, ni lexi xi mahako munhu a woniwa kota yivu kutani mbuti.

⁴ Hi 1881, A Murinzeli (Zion’s Watch Tower) i lo wula lezaku “a N’wana wa munhu,” kutani “Hosi,” hi Jesu. A Zigonzani za Biblia xikhatini lexo zi wa zwisisa lezaku a magezu “vamakabye va mina” ma wula lava va to fuma na Kristu ni vontlhe lava va to hanya laha misaveni a xikhati lexi va to ngha va mbhelele. Va wa alakanya lezaku a kuhambaniswa ka tiyivu ni timbuti ku wa ta mahiwa xikhatini xa Kufuma ka Kristu ka 1.000 wa malembe. Va wa kholwa lezaku a vanhu va wa ta woniwa kota tiyivu hi ku hanya hi nayo wa Nungungulu wa liranzo.

5. Hi 1923, a kuzwisisa ka hina ku chukwatisisilwe kuyini?

⁵ Hi 1923, Jehova i lo vuna vanhu vakwe lezaku va chukwatisa a mazwisisela yabye ka mufananiso lowu. A Murinzeli (Watch Tower) wa 15 ka Outubro wa 1923 i lo wula lezaku “a N’wana wa munhu” hi Jesu. Kanilezi, i lo nyika mitlhamuselo yo zwala ya Mitsalo yi nga komba lezaku a vamakabye va Kristu hi lava va to fuma naye le tilweni ntsena, a tlhela a tlhamusela a tiyivu kota lava va nga ni kutsumba ko hanya laha misaveni hasi ka Mufumo wa Kristu. Ahati a xikhati xa kuhambaniswa ka tiyivu ni timbuti ke? A nzima leyo yi lo wula lezaku a vamakabye va Kristu va ta fuma zinwe naye le tilweni Kufumeni kakwe ka 1.000 wa malembe, hikwalaho va wa nga hi na ndlela ya ku vuniwa kutani ku nga vuniwi hi lava va to ngha va hanya misaveni. Hikwalaho, ku lo woneka lezaku a kuhambaniswa ka tiyivu ni timbuti ku ta mahiwa mahlweni ka Kufuma ka Kristu ka 1.000 wa malembe. Xungetano hi lexi xi mahako munhu a wuliwa lezaku i yivu, a nzima yi lo wula lezaku a vanhu va wa ta woniswa lezo hi ku vumela Jesu kota Hosi yabye va tlhela va wona a Mufumo kota wona wu to neha matshamela ma nene.

6. Hi 1995, a mawonela ya hina ma engetele ku chukwatiswa hi ndlela muni?

⁶ Hi kota ya kuzwisisa loko ka kuswa, a vanhu va Jehova va lo alakanya lezaku a vanhu va wa ta lamulwa kota tiyivu kutani timbuti xikhatini xa kugumesa ka tiko legi, mayelano ni lezi va amukelisako zona a mahungu ya Mufumo. Kanilezi, hi 1995 a mawonela ya hina ma lo chukwatiswa. A tinzima timbiri ka Murinzeli wa 15 ka Outubro wa 1995 ti lo komba a kufana ku nga kona xikari ka magezu ya Jesu ma tsalilweko ka Mateu 24:29-31 (gonza) ni lawa ma nga ka Mateu 25:31, 32. (Gonza.)a Mave wahi a magumo ya kona? A nzima yo ranga yi te ngalo: “A kulamulwa ka tiyivu ni timbuti ku ta mahiwa xikhatini xi tako.” Khwatsi-khwatsi rini? “Ku ta maheka anzhako ka loku a ‘kuxaniseka’ ku kumbukiwako ka Mateu 24:29, 30 ku sangulile ni loku a N’wana wa munhu a ‘tile hi kungangamela kakwe.’ . . . Hi kulanzela, laha a tiko gontlhe go biha gi to ngha gi chikele magumo, Jesu i ta tshama a lamula.”

7. Kuzwisisa muni ko dlunyateka hi nga nako zalezi?

⁷ Nyamutlha hi na ni kuzwisisa ko dlunyateka ka mufananiso wa tiyivu ni timbuti. Xungetano hi lava va kumbukiwako, Jesu hi yena a “N’wana wa munhu,” kutani Hosi. Lava a va wulako lezaku “vamakabye va mina” mbavanuna ni vavasati va totilweko hi moya, lava va to fuma na Kristu le tilweni. (Rom. 8:16, 17) A “tiyivu” ni “timbuti” ti yimela a vanhu va matiko wontlhe. A vanhu lavo a va totiwangi hi moya wa ku basa. Ahati a xikhati xa kulamula ke? A kulamula loko ku ta maheka kumbheleni ka kuxaniseka ka hombe loku ku tshinelako. Lexi xi mahako vanhu va woniwa kota tiyivu kutani timbuti ke? Lezo zi khegela ka lezi va khomisako zona a misalela ya vamakabye va totilweko va Kristu misaveni. Lezi a kugumesa ka tiko legi ku nga kwalaha nyongeni, a ho ku bonga hi lezi Jehova a hi vunileko hi kutsongwani-kutsongwani a ku zwisisa a mufananiso lowu ni mifananiso yi yelanako nawo yi tsalilweko ka zipimo 24 ni 25 za Mateu!

A MUFANANISO LOWU WU KHANYISISA KUYINI A NTIRO WA KUXUMAYELA?

8, 9. Hikuyini a tiyivu ti woniwako kota vanhu vo “lulama”?

⁸ Ka mufananiso wa tiyivu ni timbuti, Jesu a nga kumbukangi a ntiro wa kuxumayela hi kukongoma. Makunu, hikuyini hi nga wulako lezaku wa khanyisa a lisima la ku xumayela ke?

⁹ A kuranga alakanya lezaku Jesu i wo gonzisa hi mufananiso. Zi te dlunya lezaku i wa nga wulawuli hi kuhambaniswa ka tiyivu ni timbuti ta xiviri. Hi kufanana, i wa nga wuli lezaku a munhu munwe ni munwani a woniwako kota yivu i fanele ku phamela, ku ambexa, kutani ku kamba munwe wa vamakabye vakwe loku a babya kutani a hi paxweni hi tlhelo ga xiviri. Kanilezi, i wo khanyisa a moya lowu a tiyivu leti to fananisa ti wu kombisako ka vamakabye vakwe. I tlhamusela tiyivu kota vanhu vo “lulama” hakuva ta vumela lezaku Kristu i na ni ntlawa wa vamakabye vakwe vatotilweko va ha hiko misaveni, ti tlhela ti va seketela hi kutsumbeka masikwini lawa yo gumesa ma teleko hi zikarato. — Mat. 10:40-42; 25:40, 46; 2 Tim. 3:1-5.

10. A tiyivu ti nga kombisisa kuyini wunene hi vamakabye va Kristu?

¹⁰ Xa wumbiri, ehleketa hi lomu a magezu ya Jesu ma nga sukela kona. I wa kari a wulawula hi xiwoniso xa kuvakona kakwe ni xa kugumesa ka tiko. (Mat. 24:3) Kusanguleni ka kanelo yakwe, Jesu i lo komba lezaku a xiwoniso lexo xi wa ta patsa ntiro wa lisima nguvu — ku nga kuxumayelwa ka mahungu yo saseka ya Mufumo “misaveni yontlhe.” (Mat. 24:14) Niku na a nga se wulawula hi tiyivu ni timbuti, i lo hlawutela a mufananiso wa titalenta. Kota lezi hi zi wonileko ka nzima yi hunzileko, Jesu i hlawutele mufananiso lowu kasi ku khanyisela vapizani vakwe va totilweko hi moya, ku nga “vamakabye” vakwe, lezaku va fanele ku xumayela hi kuhiseka. Kanilezi a ntlawana lowo wa vatotilweko va seleko misaveni xikhatini lexi xa kuvakona ka Jesu wu na ni xikarato xa hombe — ku nga ku xumayela ka “matiko wontlhe” na ma nga se chikela a magumo. A mufananiso wa tiyivu ni timbuti wu komba lezaku a vatotilweko va wa ta nyikwa xivuno. Hikwalaho, a yinwe ya tindlela to sangula leti lava va woniwako kota tiyivu va kombisako hi tona a wunene ka vamakabye va Kristu ku va seketela ntirweni wa kuxumayela. Makunu, a xivuno lexo xi patsa yini? Xana xi yelana ni ku va seketela hi tlhelo ga xiviri ni ku va chavelela ntsena, kutani xa patsa zinwani?

HI VAMANI VA FANELEKO KU XUMAYELA?

11. Xiwutiso muni xi nga vukako niku hikuyini?

¹¹ Nyamutlha, a ntsengo wa hombe wa timiliyoni ta vapizani va Jesu a hi vatotilweko. A va ti kumangi a titalenta leti Jesu a nyikileko malanza yakwe ma totilweko. (Mat. 25:14-18) Hikwalaho, ku nga ha vuka xiwutiso lexi: ‘Lava va nga kala ku totiwa hi moya wa ku basa vonawu va fanele ku maha a ntiro lowu hakunene ke?’ Ina. Hikuyini? A hi woneni zigelo zitsongwani.

12. Hi gonza yini ka magezu ya Jesu ma tsalilweko ka Mateu 28:19, 20?

¹² Jesu i leletele vapizani wakwe vontlhe lezaku va xumayela. Anzhako ka kuva a vukile hi ka vafileko, Jesu i lo byela valanzeli wakwe lezaku va maha vapizani, va va gonzisa ku ingisa “zontlhe” lezi a va layileko. A xinwe xa zilo lezo a va layileko ku xumayela. (Gonza Mateu 28:19, 20.) Hikwalaho, vontlhe a vapizani va Kristu va fanele ku xumayela, kani va na ni kutsumba ka ku fuma le tilweni kutani ku hanya laha misaveni. — Miti.10:42.

13. A muwoniso wa Johani wu komba yini, niku hikuyini?

¹³ A bhuku ga Kuvululelwa gi komba lezaku a ntiro wa kuxumayela wu wa ta mahiwa hi vatotilweko ni vanwani. Jesu i lo nyika mupostoli Johani a muwoniso wa “muswika,” ku nga 144.000 wa vanhu va totilweko lava va to fuma zinwe na Kristu le tilweni, loyi a rambako vanhu lezaku va ‘takha mati ya wutomi mahala.’ (Kuv. 14:1, 3; 22:17) A mati lawo yo fananisa ma yimela a malulamiselo lawa Jehova a ma mahako kasi ku tlhatlhisa vanhu ka xionho ni kufa xiseketelweni xa muphahlo wa Kristu. (Mat. 20:28; Joh. 3:16; 1 Joh. 4:9, 10) A nzhiho i mhaka-tshinya ya mahungu lawa hi xumayelako, niku a vatotilweko va rangela ntirweni wa ku vuna vanhu a ku gonza ni ku vuneka hi wona. (1 Kor. 1:23) Ka muwoniso lowo, Johani i lo wona vanwani va nga hiko va ntlawa wa muswika. Vonawu va byeliwa ku ngalo va wa wule vaku: “Tana!” Va lo ingisa, va ramba vanwani kambe lezaku vata va takha mati ya wutomi. A ntlawa lowu wa wumbiri ngwa lava va nga ni kutsumba ko hanya laha misaveni. Hikwalaho, a muwoniso lowu wu komba ziku dlunya lezaku vontlhe lava va vumelako a xirambo xaku, “tana” va na ni wutihlamuleli ga ku xumayela vanwani.

14. A ku ingisa a “nayo wa Kristu” zi patsa yini?

¹⁴ Vontlhe lava va nga hasi ka “nayo wa Kristu” va fanele ku xumayela. (Gal. 6:2) Jehova a nga na milayo yimbiri. Hi xikombiso, i byelile vaIsraeli aku: “Ku tava nayo munwe, a ka loyi a belekilweko lomu lixakeni la nwina ni ka wamatiko loyi a luvelako xikari ka nwina.” (Ekso. 12:49; Levi 24:22) A maKristu a ma lahasi ka Nayo wa Mosi. Kanilezi hontlheni, kani hi vatotilweko kani a hi vona, hi laha hasi ka “nayo wa Kristu.” A nayo lowu wu patsa zontlhe lezi Jesu a gonzisileko. A gonzo yakwe ya hombe ka tontlhe hi lezaku a valanzeli vakwe va fanele ku kombisa liranzo. (Joh. 13:35; Jak. 2:8) Niku a yinwe ya tindlela to sangula ta ku kombisa liranzo hi Nungungulu, na Kristu, ni muakelane wa hina ku xumayela a mahungu yo saseka ya Mufumo. — Joh. 15:10; Miti. 1:8.

15. Hikuyini hi nga wulako lezaku a xileletelo xa Jesu xa tira ka valanzeli vakwe vontlhe?

¹⁵ A magezu ya Jesu ma yako ka ntlawa wutsongwani ma tshuka ma tira ni ka ntlawa wa hombe. Hi xikombiso, Jesu i mahile xivumelwano xa Mufumo ni 11 wa vapizani ntsena, kanilezi hi lisine a xivumelwano lexo xi tira ka 144.000 wa vanhu. (Luka 22:29, 30; Kuv. 5:10; 7:4-8) Hi kufanana, Jesu i byelile ntlawa wutsongwani wa valanzeli vakwe lezaku wu xumayela — ku nga lava a wonekileko ka vona anzhako ka kuva a vukile hi ka vafileko. (Miti. 10:40-42; 1 Kor. 15:6) Kanilezi a vapizani vakwe vontlhe vo tsumbeka va zana ga malembe go sangula va wa zi zwisisa lezaku a xileletelo lexo xa tira ka vona, hambu loku va nga mu zwangi Jesu ha voce. (Miti. 8:4; 1 Ped. 1:8) Nyamutlha kambe, Jesu a nga wulawulangi ni munwe ni munwani wa vaxumayeli va Mufumo va 8 wa timiliyoni lava va nga kona. Kanilezi vontlhe va zi zwisisa lezaku va fanele ku kholwa ka Kristu va tlhela va ku kombisa hi ku xumayela. — Jak. 2:18.

LEXI XIKHATI XA KUVA HI TSUMBEKA

16-18. Lava va rinzelako kuva tiyivu va nga seketelisa kuyini a vamakabye va Kristu, niku hikuyini va faneleko ku maha lezo?

¹⁶ Satani ilwa yimpi ni misalela ya vamakabye va Kristu va totilweko hi moya laha misaveni, niku i ta tshingisa a yimpi leyo laha a ‘xikhati xa xi tsongwanyani’ lexi xi mu saleleko xi yako xi mbhela. (Kuv. 12:9, 12, 17) Hambu lezi va lwisanako ni ziringo za hombe, a vatotilweko va rangela a tsima ga kuxumayela ga hombe ka wontlhe matinwini ya vanhu. Handle ko kanakana, Jesu i zinwe navo a va rangela. — Mat. 28:20.

¹⁷ A ntsengo wu yako wu kula wa lava va tova tiyivu va zi wona kota lungelo a ku vunetela vamakabye va Kristu ntirweni wa kuxumayela va tlhela va va vuna hi tindlela tinwani. Hi xikombiso, va maha minyikelo ya kuziranza ni ku vunetela ku aka tiSalawu ta Mufumo, tiSalawu ta Mitlhangano ya Hombe, ni tihofisa ta ravi, va tlhela va ingisa lava va yimisilweko hi “nanza gi tsumbekileko ni go tlhariha” lezaku va rangela. — Mat. 24:45-47; Maheb. 13:17.

¹⁸ Lokuloku a tingelosi ti ta tsikeleta a timheho ta ntamu ta kuxaniseka ka hombe. Lezo zi ta maheka anzhako ka loku a misalela yontlhe ya vamakabye va Kristu hi kumile xifungo xo gumesa. (Kuv. 7:1-3) Na yi nga se sangula a Har–Magedoni, a vatotilweko vontlhe va ta tekiwa vaya tilweni. (Mat. 13:41-43) Hikwalaho, lexi xikhati xa ku lava va nga ni kutsumba ka ku woniwa kota tiyivu va seketela a vamakabye va Kristu hi kutsumbeka.