HLOKO YA MHAKA YA KAPA | WA ZI LAVA KU GONZA A BIBLIA?

Longoloko Wa Ku Fambisa Zigonzo Za Biblia Wu Mahelwako Vanhu Vontlhe

A Timboni ta Jehova ti tiviwa nguvu hi ntiro wa tona wa kuxumayela laha kubaseni. Kanilezi, u wa zi tiva lezaku hi na ni longoloko wa ku fambisa zigonzo za Biblia misaveni yontlhe?

Wanuna a fambiselwako a xigonzo xa Biblia laha ntirweni wakwe

Hi 2014, a ku hunza a 8.000.000 wa Timboni ta Jehova ka 240 wa matiko, ti fambisile a zigonzo za Biblia zi nga kusuhani ka 9.500.000 ka hweti yinwe ni yinwani.a Hi lisine, a ntsengo wa vanhu hi gonzako navo a Biblia, wu hunza a ntsengo wa vanhu va hanyako nzeni ka matiko yo kari yo ringana a 140 wa wona!

Kasi ku maha ntiro lowu wa ku gonzisa, a Timboni ta Jehova ti humesa a xipimo xa biliyoni yinwe ni khihlanya ya maBiblia, mabhuku, marevista, ni zitiro zinwani zi vunako ku gonza a Biblia, ka lembe ginwe ni ginwani — hi tirimi to ringana a 700 wa tona! A kutikarata loku ka hombe ka kuhumeswa ka mabhuku ku maha vanhu va gonza a Biblia hi lirimi leli va li hlawulako.

“Na nza haya xikoleni, a nzi zangi nzi zi tsakela ku gonza. Kanilezi, a xigonzo xa Biblia xi wa nzi tsakisa. Niku lezi nzi ga zi gonza zi wa nzi tangalisa nguvu!” — Katlego, Afrika Dzonga.

“A xigonzo xa Biblia xi nzi vunile ku kuma mihlamulo ya ziwutiso za mina ni ya ziwutiso zinwani zo tala.” — Bertha, México.

“A xigonzo xa Biblia xi wa mahiwa laha kaya ka mina hi xikhati nzi nga xi wona xi hi nene. A ku na xinwani nzi nga wa ta xi lava!” — Eziquiel, Brasil.

“Ka zikhati zo kari hi wa mbheta a 15 kuya ka 30 wa timeneti na hi gonza — a zikhati zinwani hi wa mbheta a xikhati xo hunza lexo — hi wa maha ni xihi xi nga hi xi nene ka mina.” — Viniana, Austrália.

“Lexi xi nzi hlamalisileko nguvu hi lezaku nzi wa nga hakheli nchumu kasi ku gonza!” — Aimé, Benin.

“Loyi a nga nzi gonzisa a Biblia i wa hi munhu wa mu nene ni wa lihlaza-mbilu. Hi lo maha vanghana va hombe.” — Karen, Irlanda wa Nwalungu.

“A vanhu vo tala va gonza a Biblia va nga mahi Timboni ta Jehova.” Denton, Inglaterra.

MIHLAMULO YA ZIWUTISO ZI TOLOVELAKO KU MAHIWA XUNGETANO HI LONGOLOKO WA HINA WA XIGONZO XA BIBLIA.

Xi fambisiswa kuyini a xigonzo xa Biblia?

Hi bhula hi timhaka to hambanahambana ta Biblia, hi kambisisa mavesi ma yelanako ni timhaka leto. Hi xikombiso, a Biblia gi hlamula ziwutiso zo kota lezi: Himani Nungungulu? I tshamisile kuyini? I na ni vito? Xana i tshama kwihi? Hi ngava kusuhani naye? A xikarato hi lexi xaku u ta yi kuma kwihi a mihlamulo ya kona lomu ka Biblia ke.

Kasi ku vuna vanhu lezaku va kuma a mihlamulo, hi tolovela ku tirisa a bhuku Zini Lezi A Biblia Gi Zi Gonzisako Hakunene?b A bhuku legi gi mahelwe ku vuna vanhu lezaku va tiva a tigonzo-tshinya ta lezi a Biblia gi zi gonzisako. Lezo zi patsa a zigonzo xungetano hi Nungungulu, Jesu Kristu, kuxaniseka ka vanhu, kuvuka hi ka vafileko, mukhongelo, ni timhaka tinwani to tala.

Xana a xigonzo xi nga mahiwa kwihi niku hi xikhati muni?

A xigonzo xi nga fambisiwa ka wutshamu ni xikhati xa xi nene ka wena.

Xana a xigonzo xa Biblia xi mbheta xikhati muni?

A vanhu vo tala va ti vekela xipimo xa hora kutani ku nga chiketi nzeni ka viki ni viki, kasi ku gonza a Biblia. Kanilezi, a xikhati lexi hi xi mbhetako ka xigonzo ha cica loku zi laveka. Hi nga xi zwananisa ni matirela ya wena. Ka viki ginwe ni ginwani a vokari va mbheta 10 kutani 15 wa timeneti ntsena na va gonza.

I mali muni yi lavekako kasi ku gonza?

A ku gonza ni mabhuku ya ku gonza hi wona, mahala. Lezo zi yelana ni lezi Jesu a leleteleko a vapostoli vakwe aku: “Mu amukele mahala, nyikani mahala”. — Mateu 10:8, NM.

Hi ta gonza kala rini?

A ku u ta gonza kala kwihi, zi le ka wena. A bhuku Zini Lezi A Biblia Gi Zi Gonzisako Hakunene? gi na ni 19 wa zigonzo. U nga gonza a zipanze zontlhe hi zambo ga gi nene ka wena.

Nzi fanele ku gumesa nzi maha Mboni ya Jehova ke?

Ahihi. Hi kombisa xichawo ka lezi a munhu ni munhu a hlawulako ku zi kholwa. Hambulezo, a vanhu lava va tivako tigonzo-tshinya ta Biblia, va nga zi kota ku hlawula zilo hi ku zi tiva.

Nzi nga ma kuma kwihi a manwani mahungu?

Lomu ka site jw.org ku na ni mahungu yo tsumbeka xungetano hi lezi a Timboni ta Jehova ti zi mahako ni lezi ti zi kholwako.

Nzi nga kombelisa kuyini a xigonzo xa Biblia?

Rumela xikombelo xa wena ka www.jw.org/tsc hi ku tirisa a Internet.
Tsalela a makhero lawa ma xaxametilweko laha ka phajina 2.
Wulawula ni Timboni ta Jehova ti nga laha kusuhani ni kaya ka wena.

a Hi tolovelo a zigonzo za Biblia zi fambisiwa ka munhu ni munhu, kutani ka ntlawa wutsongwani wa vanhu.

b Gi humesilwe hi Timboni ta Jehova. A kuhunza a 230 wa timiliyoni ta bhuku legi ti kari ti gandliwa hi xipimo xa 260 wa tirimi.

LEZI A MINGANGO YI VUNEKISAKO ZONA

“A xikhati lexi a sati wa mina a nga sangula ku gonza a Biblia, nzi lo wona a kucica ka hombe ka yena. A ngango wa hina wu lova ni mahanyela ya ma nene. Hi ku lava ku tiva lezi a nga kari a gonza, minawu nzi lo sangula ku gonza. Lezi nzi zi gonzileko zi lo nzi maha munhu wa mu nene. A xigonzo xa Biblia xi mahile a ngango wa hina wu bohana.” — Eziquiel.

“Anzhako ka kuva nzi sangulile ku gonza a Biblia, nzi lo tsika tolovelo wa mina wa kudzaha, nzi nyima kunwa nguvu byala, ni ku gonza ku ti khoma loku nzi zangara. Zezi a muti wa hina wu tshama na wu basile, a zilo zontlhe na zi tshamisekile. Nzi va nyika nguvu lisima a va ngango wa mina niku nzi ranza ku va mahela zilo zi to va maha va tsaka. Nzi na ni litsako la hombe nguvu.” — Karen.

“A vanhu vo kari va wa nzi sola hi kota ya lezi nzi nga kari nzi gonza a Biblia. Kanilezi a nuna wa mina i wa seketela xiboho xa mina, hi ku wula lezi: ‘A nzi na mhaka ni lezi a vanhu va wulawulako. A ku ku wona na u cica u maha za zi nene — hi zona zi nga za lisima ka mina. Simama ku maha lezi u mahako.’ A wutomi ga ngango wa hina gi wa nga se tshuka giva gi nene a ku fana ni lezi!” — Viniana.