MIHLAMULO YA BIBLIA

Xini a siku ga kulamula?

Xikhatini xa kutsaliwa ka Biblia, Nungungulu i wa tirisa a valamuli kasi ku tlhatlhisa a vanhu vakwe ka lava va nga va mahela kubiha. (Valamuli 2:18) A Biblia gi wulawula hi Siku ga Kulamula legi gi tako, kota xikhati xa kutsaka, laha Jehova a mulamuli wa misava yontlhe, a to tlhatlhisa vanhu ka wubihi. — Gonza Tisimu 96:12, 13; Isaya 26:9.

Nungungulu i yimisile Jesu lezaku ava yena a to lamula vafileko ni vahanyako hi kululama. (Mitiro 10:42; 17:31) A vanhu vo tala va file na va nga tivangi Nungungulu. Ka Siku ga Kulamula, Jesu i ta vuxa vanhu lavo hi ka vafileko kasi va tiva ni ku ranza a Nungungulu wa lisine.  — Gonza Mitiro 24:15.

Hikuyini a Siku ga Kulamula gi to mbheta 1.000 wa malembe?

Ka malembe lawo ya 1.000 ku ta vuxiwa a vafileko. (Kuvululelwa 20:4, 12) Zi ta lava lezaku vava ni xikhati xa ku gonza a tindlela ta Nungungulu va tlhela va mu ingisa. A kuhambana ni mawonela yo tala ya vanhu, a Biblia gi komba lezaku a vanhu va ta lamulwa hi kuya hi lezi va to maha anzhako ka ku vuxiwa hi ka vafileko. — Gonza Va Le Roma 6:7.

A Biblia gi wulawula kambe hi siku ga kulamula gi to humelela hi xitshuketi na ku nga se sangula a 1.000 wa malembe. A siku lego kambe gi vitaniwa a ku kugumesa, khwatsi hi lezi zi tlhamuselweko ka nzima ya kapa ya murinzeli loyi. Ka siku lego, Nungungulu i ta lovisa vontlhe va nga mu chaviko — a vanhu vo biha. (2 Pedro 3:7) Hikwalaho, hi fanele ku kombisa a liranzo la hina hi Nungungulu. — Gonza 2 Pedro 3:9, 13.