MIHLAMULO YA BIBLIA

Nungungulu munhu wo tshamisa kuyini?

Nungungulu munhu wa moya a nga wonekiko. I mahile tilo, misava, ni zilo zontlhe zi hanyako. Nungungulu a nga vangiwangi hi munhu — a nga na masangulo. (Tisimu 90:2) Nungungulu i lava lezaku a vanhu va mu hlota va tlhela va tiva lisine xungetano hi yena. — Gonza Mitiro 17:24-27.

Nungungulu munhu loyi hi zi kotako ku tiva vito gakwe. Hi nga zi kota ku tiva matshamela yo kari yakwe hi ku ehleketa hi zilo lezi a zi mahileko. (Va Le Roma 1:20) Kanilezi kasi hi mu tiva khwatsi Nungungulu, hi fanele ku gonza Mhaka yakwe, a Biblia. Lezo zi hi maha hi tiva khwatsi a wumunhu ga Nungungulu ga liranzo. — Gonza Tisimu 103:7-10.

Xana Nungungulu i ti zwisa kuyini hi kubiha?

A Muvangi wa hina, Jehova, wa venga kubiha. Niku i mahile vanhu hi mufananiso wakwe. (Deuteronome 25:16) Hi zalezo zi mahako lezaku a kutala ka hina hi venga kubiha. A kubiha loku ku hi ranzeleko a ku vangiwi hi Nungungulu. Nungungulu i nyikile vanhu a xinyikiwo xo ti hlawulela. Lexi xi nga tsakisiko hi lezaku a vanhu vo tala va tirisa a xinyikiwo lexo hi ndlela ya hava hi ku maha kubiha, zonake va bayisisa mbilu ya Jehova. — Gonza Genesisi 6:5, 6; Deuteronome 32:4, 5.

Jehova i ranza kululama, niku a nga ta tsika kubiha ku simama kala kupinzuka. (Tisimu 37:28, 29) A Biblia gi tsumbisa lezaku lokuloku Nungungulu i ta fuvisa kubiha kontlhe. — Gonza 2 Pedro 3:7-9, 13.