WA HA ZI ALAKANYA KE?
U gonzile zi buva a marevista A Murinzeli ma ha hi ku hunzako? Loku zi hi tano, zama ku hlamula a ziwutiso lezi zi lanzelako:
A maKristu ma fanele ku maha mikhongelo yiya ka Jesu Kristu ke?
Ahihi. Jesu wutsumbu i hi gonzisile ku yisa mikhongelo ya hina ka Jehova, a tlhela a veka xikombiso hi ku khongela ka Dadani wakwe. (Mat. 6:6-9; Joh. 11:41; 16:23) Hi ku lanza nkonzo wakwe, a vapizani vakwe vo sangula va wa khongela ka Nungungulu, na ku nga hi ka Jesu. (Miti. 4:24, 30; Kol. 1:3) — 1/1, phajina 14.
Zini hi nga mahako lembe ni lembe kasi ku longisela a xialakanyiso xa kufa ka Jesu?
A xinwe xa zilo hi nga mahako ku lanzela a longoloko wa kugonza ka Biblia wu yelanako ni ximaho lexi. Hi nga ti karatela ku engetela a wutireli ga hina kambe nguveni leyo. Hi nga ehleketa ni ku khongela kambe hi kutsumba loku Nungungulu a hi nyikako. — 15/1, maphajina 14-16.
Zini zi nga humelela a zibochwa zimbiri za vaGipite lezi zi nga hlawutela miloro yo hlamalisa ka Josefa?
Josefa i byelile a mucheleteli wa zakunwa za Faro lezaku i wa ta tlhela ka ntiro wakwe wa kale. A noro wa mubhiki wu wa komba lezaku Faro i wa ta mu daya a tlhela a mu hayeka ka sinya. A mitlhamuselo yontlhe ya yimbiri yi lo tatiseka. (Gen. 40:1-22) — 1/2, maphajina 12-14.
Xinyikiwo muni xo hlawuleka lexi a vamakabye le Japani va nga xi amukela?
Va lo amukela xibhukwana xi nga ni bhuku ga Mateu gi susilweko ka Tradução do Novo Mundo. Xi kari xi nyikelwa wutirelini, niku xa amukelwa hi vanhu vo tala va nga tiviko zotala hi Biblia. — 15/2, phajina 3.
Ka zana ga malembe go sangula, ziyimo muni zi nga vuna ku hangalasa a mahungu yo saseka?
A Pax Romana yi mahile lezaku kuva ni kurulanyana. A vapizani vo sangula va wa zi kota ku enza ka maruwa ya ma nene. A lirimi la xiGreki li wa tiriswa nguvu, lezi zi nga olovisa a ntiro wa kuxumayela, hambu ka vaJuda va nga hangalakile mufunweni lowo. Niku a vapizani va wa tirisa nayo wa Roma kasi ku vikela a mahungu yo saseka. — 15/2, maphajina 20-23.
Hikuyini a maKristu ya lisine ma nga mahiko Pasika?
Jesu i byelile a valanzeli vakwe lezaku va alakanya a kufa kakwe, na ku nga hi kuvuka kakwe. (Luka 22:19, 20.) — 1/3, phajina 8.
Ka malembana lawa, hikuyini a mabhuku ya hina ma nga ha toloveliko ku tlhamusela matimu ya Biblia kota minzhuti ya zilo zinwani za hombe ke?
A Biblia gi wula lezaku a vanhu vo kari va wa hi nzhuti wa zilo za hombe. A xinwe xa zikombiso xi kumeka ka Va Le Galatia 4:21-31. Kanilezi loku gi nga kombi, i chukwana ku nga alakanyeli kutani ku nyika mitlhamuselo ya tshamela lego. Hambulezo, hi nga hlota zigonzo ka vanhu ni zimaho zi kumbukiwako lomu ka Biblia. (Rom. 15:4) — 15/3, maphajina 17-18.
Hikuyini a xiphephana xa papiro xi kumilweko ka nhulu ya chaka le Gipite wa kale xi nga xa lisima ke?
Ka zama ga malembe legi ga ha hi ku hunzako, ku kumilwe xipanzana xa papiro xi nga ni zipanze za Ivangeli ya Johani. Kuzilava xi tsalilwe anzhako ka makume matsongwani ya malembe na Johani a tsalile bhuku gakwe, niku a timhaka ta xona ti tiyisa a mahungu lawa hi nga nawo nyamutlha, ti tlhela ti khanyisa a kutsumbeka ka Biblia. — 1/4, maphajina 10-11.
Hikuyini a kususa munhu bandleni ku nga lulamiselo ga liranzo?
A Biblia gi tlhamusela a zilo zi nga mahako munhu a susiwa bandleni, lezi zi nehako makatekwa. (1 Kor. 5:11-13) Zi neha wudzunzo ka vito ga Jehova, zi vikela bandla gi basileko ga wuKristu, niku zi nga vuna a muonhi lezaku a wuyisela mapimo. — 15/4, maphajina 29-30.