Hi nga kombisa kuyini lezaku ha mu ranza Jehova?

1, 2. Hi kuya hi magezu ya mupostoli Johani, Nungungulu i hi kombisile kuyini a ndlela ya ku mu ranza?

A KUTALA ka vanhu va vumela lezaku a ndlela ya chukwana leyi a papai a gonzisako hi yona vana vakwe ku va nyika xikombiso. Mupostoli Johani i tsalile lezaku “ha ranza, hakuva yena [Nungungulu] i lo ranga a hi ranza.” (1 Joh. 4:19) Hikwalaho, zi te dlunya lezaku Jehova i hi nyikile xikombiso xa hombe nguvu xa liranzo la wuraru leli li nga hi vunako ku mu ranza.

² Nungungulu ‘i rangile a hi ranza’ hi ndlela muni? Mupostoli Paule i te ngalo: “Nungungulu wa kombisa a kuhiranza kakwe hi lexi, lezaku na ha hi vaonhi Kristu i lo hi fela.” (Rom. 5:8) Hi kutikarata loko ka hombe — ka ku nyikela N’wana wakwe kota nzhiho kasi ku tlhatlhisa vanhu va kholwako — Jehova i lo kombisa a tshamela ga lisine ga liranzo. Li kombisiwa hi kunyika, ni ku khatala hi vanwani wutshanwini ga ku khatalela za wena basi. A xinyikiwo xa hombe lexi Nungungulu a hi nyikileko xi hi vululela ndlela ya kuva hi vuneka hi liranzo lakwe hi tlhela hi mu kombisa liranzo na hinawu. — 1 Joh. 4:10.

3, 4. Hi fanele ku mu ranzisa kuyini Nungungulu?

³ A liranzo hi gona tshamela ga hombe ga Jehova, hikwalaho za zwisiseka a kuva Jesu a wulile lezaku a nayo wo sangula wa Nungungulu hi lowu: “U ta ranza [Jehova] Nungungulu wa wena hi mbilu ya wena yontlhe, ni muhefemulo wa wena wontlhe, ni kupima ka wena kontlhe, ni ntamu wa wena wontlhe.” (Mar. 12:30) A  magezu ya Jesu ma komba lezaku a xo ranga xi lavekako ka liranzo la hina hi Nungungulu i mbilu ya hina. Jehova a nga tsaki loku hi nga mu ranzi hi mbilu yontlhe. Hambulezo, hi wona lezaku a ku ranza Nungungulu zi patsa kambe a muhefemulo wa hina wontlhe, maalakanyo ya hina wontlhe, ni ntamu wa hina wontlhe. Lezo zi wula lezaku a liranzo la lisine hi Nungungulu a li mbheleli mbilwini. Ahandle ka ku huma mbilwini, a liranzo la hina hi Nungungulu li fanele ku patsa a wuzikoti ga hina ga moya ni ga nyama. Kota kuwula ka muprofeti Mika, hi zalezo Jehova a zi lavako ka hina. — Gonza Mika 6:8.

⁴ Hi nga zi kombisisa kuyini lezaku hakunene ha mu ranza a Dadani wa hina wa le tilweni? Hi fanele ku mu ranza hi zontlhe. Kota lezi zi kombilweko hi Jesu, a liranzo la hina li fanele ku patsa a kupima ka hina, ni mbilu ya hina, ni kutizwa ka moya. Ka nzima yi hunzileko, hi wonile mune wa tindlela leti Jehova a kombisako hi tona a liranzo lakwe la hombe hi vana vakwe. Zalezi, a hi woneni lezi hi nga kombisisako zona ni ku engetela a liranzo la hina hi Jehova hi tindlela a ti vumelako ni ku ti amukela.

BONGA MALULAMISELO YA JEHOVA

5. Hi yihi a ndlela ya liranzo ya ku bonga Jehova hi zontlhe lezi a hi mahelako?

⁵ U maha yini loku u amukela xinyikiwo? Kuzilava u kombisa kubonga hi ndlela yo kari. Tlhatakumbiri, u nga ha xi tirisa khwatsi, ni ku xi nyika lisima. Mupizani Jakobe i tsalile lezi: “Zontlhe zinyikiwo zo saseka ni zinyikiwo zontlhe zi mbheleleko zita hi le hehla, zi relela hi ka Dadani wa kuwonekela, loyi a nga hiko na kuhunzuluka, a ka yena a ku na kuhunzuka-hunzuka kuva kuwonekela ni munyama.” (Jak. 1:17) Jehova i hi nyika hi matsenya lezi zi lavekako kasi hi hanya hi tlhela hi tsaka. Xana lezo a zi hi kuci ku mu ranzawu?

6. Zini lezi a vaIsraeli va nga fanele ku maha kasi ku simama va amukela a makatekwa ya Jehova?

⁶ A vaIsraeli va hanyile mazanazana ya malembe na va khatalelwa hi liranzo hi Jehova va tlhela va katekiswa nguvu hi yena, hi tlhelo ga nyama ni ga moya. (Deut. 4:7, 8) Hambulezo, kasi va simama ku amukela makatekwa lawo, va wa fanele ku ingisa a Nayo wa Nungungulu, lowu wu nga patsa ku nyika Jehova a “mihanzu yo sangula ya tiko” hi kukhanzakanya. (Ekso. 23:19) Hi ndlela leyo, a vaIsraeli va wa ta kombisa lezaku va li nyika lisima a liranzo la Jehova ni makatekwa yakwe. — Gonza Deuteronome 8:7-11.

7. Hi nga tirisisa kuyini a “tshomba” ya hina kasi ku kombisa liranzo la hina hi Jehova?

⁷ Ahati hina ke? Hambu lezi ku nga rinzelwiko lezaku hi maha miphahlo ya xiviri, za ringana kuva hi kombisa liranzo la hina hi Nungungulu hi ku mu dzunza hi “tshomba” ya hina. (Mav. 3:9) Hi tihi tindlela to kari ta ku maha lezo? Zi te dlunya lezaku hi nga tirisa a zilo lezi hi nga nazo kasi ku seketela a ntiro wa Mufumo wa lomu xipanzeni xa hina ni misaveni yontlhe. Leyo hakunene i ndlela ya yi nene ya ku kombisa liranzo la hina hi Jehova, na ku nga khataliseki lezaku hi na ni titshomba to tala kutani ti tsongwani. (2 Kor. 8:12) Hambulezo, ku na ni tindlela tinwani leti hi nga kombisako ha tona lezaku ha mu ranza Jehova.

8, 9. A ku tsumba a xitsumbiso xa Jehova zi yelanisa kuyini ni liranzo la hina hi yena? Nyika xikombiso.

⁸ Alakanya lezaku Jesu i alakanyisile valanzeli vakwe lezaku va nga karateki hi zakuga ni za kuambala kanilezi va lava Mufumo kuranga. I te ngalo Dadani wa zi tiva lezi hakunene zi lavekako ka hina. (Mat. 6:31-33) A kutsumba loku hi nga nako hi magezu lawo ku komba a liranzo leli hi nga nalo hi Jehova hakuva a liranzo ni kutsumba zi famba zinwe. A hi nge ranzi munhu wo kala hi nga mu tsumbi. (Tis. 143:8) Hikwalaho, hi nga ti wutisa lezi: ‘A mixuvo ya mina ni mahanyela ya mina za komba lezaku hakunene nza mu ranza Jehova ke? A zimaho za mina za siku ni siku za komba lezaku nza tsumba a wuzikoti gakwe ga ku khatalela a zilaveko za mina ke?’

⁹ A muKristu wo kari a vitwako Mike i kombisile a liranzo lelo ni kutsumba loko. Na a ha hi nwanana, Mike i lo sangula kuva ni kuxuva ka hombe ko lava ku tirela Jehova tikweni ginwani. I lo chada a tlhela a pswala vana vambiri, kanilezi a kuxuva kakwe a ku zangi ku hungukile. Na a kuciwa hi tinzima to tala ni mibiko yi wulawulako hi ku tira lomu ku nga ni xilaveko xa hombe, Mike ni ngango wakwe va lo boha ku olovisa wutomi gabye. Va lo xavisa muti wabye, va rura vaya ka yindlu ya yitsongwani. Hi kulanzela, Mike i lo boha ku hungula xikhati xa ntiro wakwe. I lo rura ni ngango wakwe, niku anzhako ka malembe mambiri na va tira hi kutsaka matiko-wundle, Mike i lo wula lezi: “Ha li wona a lisine la magezu ya Jesu ma tsalilweko ka Mateu 6:33.”

EHLEKETA HI LISINE LELI JEHOVA A KU GONZISAKO

10. Kota lezi hi zi wonako ka xikombiso xa Davida, a ku ehleketa hi lezi hi zi gonzako ha Jehova zi nga hi khumbisa kuyini?

¹⁰ Kwalomo ka 3.000 wa malembe ma hunzileko, Hosi Davida i lo khumbiwa hi lezi a zi wonileko le tilweni. I lo tsala lezi: “A matilo ma kanela a kungangamela ka Nungungulu; ni ndengelenge yi kombisa a ntiro wa mandla yakwe.” Hi kulanzela, na a kuciwa hi wutlhari ga Nayo wa Nungungulu i te ngalo: “A nayo wa Jehova wu mbhelele, wu humuta muhefemulo; a wukustumunyu ga Jehova gi nene, gi tlharihisa xipumbu.” Mave wahi mabhinzu ya kuehleketa loko? Davida i loya mahlweni aku: “A timhaka ta nomu wa mina, ni maalakanyo ya mbilu ya mina, a zi amukeleke mahlweni ka wena, Jehova, a ribye ga mina ni mutiruli wa mina.” Zi te dlunya lezaku Davida na Nungungulu vave ni kuzwanana ko tsakisa ni ka laha kusuhani. — Tis. 19:1, 7, 14.

11. A liranzo la hina hi Nungungulu li fanele ku hi kuca ku maha yini hi wutivi ga hombe ga lisine la Mitsalo legi a hi nyikako nyamutlha? (Wona mufota kusanguleni ka nzima.)

¹¹ Nyamutlha, hi na ni makatekwa ya ku tiva zotala xungetano hi zivangwa za Jehova ni kutatiseka ka kungo gakwe. A tiko gi vuvumisa zigonzo zo tlakuka ni ku gonza nguvu. Hambulezo, a matimu ya votala ma komba lezaku a ku lanzela zilo lezo a kutala ka zikhati zi maha munhu a luza kukholwa kakwe ni liranzo lakwe hi Nungungulu. Kanilezi, a Biblia gi hi kuca ku ranza wutivi hi tlhela hi hlota wutlhari ni kupimisisa. Lezo zi wula ku gonza ku tirisa a wutivi legi Nungungulu a hi nyikako kasi hi vuneka hi gona hi tlhela hi vuna vanwani. (Mav. 4:5-7) Nungungulu i lava lezaku “vanhu vontlhe va hanyiswa, vava ni kutiva ka [lisine].” (1 Tim. 2:4) Hi kombisa liranzo la hina hi Jehova loku hi tira hi mbilu yontlhe kasi ku tivisa vanwani a mahungu yo saseka ya Mufumo ni ku va vuna ku zwisisa a kungo ga hombe legi Nungungulu a nga nago hi vanhu. — Gonza Tisimu 66:16, 17.

12. Xana a muswa wo kari i kombisile kubonga muni hi malulamiselo ya moya ya Jehova?

¹² Hambu vanana va nga kombisa liranzo labye ha Jehova hi ku bonga a malulamiselo ya moya. Shannon i bika lezaku a xikhati a nga hi ni 11 wa malembe, yena ni nzisana yakwe ya 10 wa malembe va loya Gotsovanyanweni wa Muganga wa “Devoção Piedosa” ni vapswali vabye. Ka yinwe ya tinzima, a vaswa va lo kombelwa ku tshama ka wutshamu go hlawuleka. Shannon i wa dzukile hambulezo i lo famba. I lo khumbeka nguvu a xikhati lexi a muswa munwe ni munwani a nga nyikwa a bhuku Os Jovens Perguntam — Respostas Práticas kota xinyikiwo. Xi khumbisile kuyini a ndlela leyi Shannon a nga mu wona hi yona Jehova Nungungulu? I ngalo: “Hi kona nzi nga zi wona khwatsi lezaku Jehova ngwa lisine niku wa nzi ranza nguvu.” I engeta aku: “A ho ku tsaka hi lezi a Nungungulu wa hina wa hombe, Jehova, a hi nyikako zinyikiwo lezo zo saseka ni zo mbhelela!”

VUMELA A WUSUNGUKATI NI KULAYA KA NUNGUNGULU

13, 14. A ndlela leyi hi wonako hi yona a wusungukati legi hi nyikwako hi Jehova yi khumbisa kuyini a liranzo la hina hi yena?

¹³ A Biblia ga hi alakanyisa giku: “Loyi Jehova a mu ranzako, wa mu kawuka, khwatsi hi dadani a tsayisako n’wana loyi a mu ranzako.” (Mav. 3:12) Hambulezo, hi fanele ku hlamulisa kuyini? Mupostoli Paule i lo wula lisine a xikhati a nga tsala lezi: “A kutsayisa kontlhe a ku woneki makunu na ku tsakisa, kanilezi ka xanisa.” Hi magezu lawo, Paule i wa nga hunguli a lisima la kulayiwa, hakuva i lo engeta aku: “Hambu zi hi tano anzhako ka xikhati ku pswala a mihanzu ya kurula ka vona lava va wundlilweko ha kona, a mbhanzo wa kululama.” (Maheb. 12:11) Loku hi mu ranza Jehova, hi fanele ku ti wonela ku kanyisa kutani ku vekela xiviti a wusungukati gakwe. A vokari zi nga ha va karatela nguvu ku maha lezo. Hambulezo, a liranzo la hina hi Nungungulu li nga hi vuna nguvu.

¹⁴ Masikwini ya Malaki, a vaJuda vo tala va wa nga gi nyiki lisima a wusungukati ka Nungungulu. Va wa wu tiva a Nayo xungetano hi ku nyikela miphahlelo kanilezi va lo zi mahela nguvu mihoni laha ka kuza Jehova a va nyika wusungukati ga ntamu. (Gonza Malaki 1:12, 13.) A xiyimo lexo xi wa bihile ku kota kwihi? Zwana magezu ya Jehova: “Nzi ta rumela a nzhukano hehla ka nwina, nzi rukatela a makatekwa ya nwina. Ina, nzi sina nzi ma rukatele, hakuva a mu xi khataleli [a xileletelo xa mina].” (Mal. 2:1, 2) Zi te dlunya lezaku a ku tolovela ku kanyisa a wusungukati ga Jehova ga liranzo ha womu zi nga neha makhombo ya hombe.

15. I tshamela muni hi faneleko ku ti wonela ka gona, legi gi wonekako nguvu tikweni?

¹⁵ Ka xizukulwana lexi xa vanhu va ku ti ranza wutsumbu, lava va tivako gabye basi, a zi olovi ku wulawula hi wusungukati ni kulaya, a ha ha wuli hi ku zi amukela. Hambu lava va vumelako wusungukati kutani ku layiwa a kutala ka zikhati va maha na va nga tsakangi. Kanilezi, a maKristu ma kuciwa ku “nga pimanyisi a tiko ga nguva leyi.” Hi fanele ku tiva ni ku lanzela a “kuranza ka Nungungulu, loku . . . ku mbheleleko.” (Rom. 12:2) Hi ku tirisa a hlengeletano yakwe, Jehova i hi nyika wusungukati hi xikhati xi faneleko xungetano hi zilo zo tala za wutomi — zo kota lezi hi faneleko ku khomisa zona a vanhu va xiro xa wubeleki xo hambana, mahlawulela ya vanghana, ni zihungato. Hi ku tekela ku vumela ni ku lanzela wurangeli lego, hi komba lezaku ha bonga niku hakunene ha mu ranza Jehova hi mbilu yontlhe. — Joh. 14:31; Rom. 6:17.

HLOTA KUVIKELA NI KUHANYISA KA JEHOVA

16, 17. a) Hikuyini hi faneleko ku ehleketa hi kuranza ka Jehova a xikhati hi mahako ziboho? b) A vaIsraeli va kombisile kuyini lezaku a va mu ranzi niku a va mu tsumbi Jehova?

¹⁶ A vanana va na ni tshamela ga mabeleko gaku loku va wona mhango, va tekela ku tsutsumela vapswali vabye. Laha va kulako, va gonza ku tsumba a kupima kabye va tlhela va ti mahela ziboho ha voce. Lezo zi maha xipanze xa kukula. Hambulezo, lava va nga ni kuzwanana ku nene ni vapswali vabye va tlhatlheka ku kombela mawonela yabye ni wusungukati na va nga se maha xiboho. Hi tlhelo ga moya kambe zi tshamisile zalezo. Jehova i hi nyika moya wakwe wa ku basa, a hi vuxela “kuxuva ni kutira.” Hambulezo, xi wa tava xikombiso xa ku kala liranzo ni kutsumba loku ho maha ziboho na hi nga cheli kota hi kuranza kakwe. — Fil. 2:13.

¹⁷ Ka siku go kari masikwini ya Samueli, a vaIsraeli va lo hluliwa zo tshisa hi vaFilistia. A vanhu va Nungungulu va wa hi ni xilaveko xa hombe xa ku vuniwa ni ku vikelwa. Zini va nga maha? Va lo boha lezi: “A hi yeni le Xilo hi ya teka a arke ga xivumelwano xa Jehova hi ta gi veka xikari ka hina, kasi ga hi hlanguta mandleni ya valala va hina.” Give gihi wuyelo ga kona? Va lo “kuhlaselwa [hi] ntamu, hakuva ku lo dawa 30.000 wa vavanuna va hlomileko va ka Israeli. A arke ga Nungungulu gi lo tekiwa.” (1 Sam. 4:2-4, 10, 11) Kuzilava zi wa wonekisa ku khwatsi a vaIsraeli vo hlota xivuno xa Jehova a xikhati va nga teka a Arke. Kanilezi hi lisine, va wa nga kombelangi wurangeli ga Jehova; va wo lanzela mawonela ya vona wutsumbu, niku a wuyelo ga kona give go bayisa. — Gonza Mavingu 14:12.

18. A Biblia gi ku gonzisa yini xungetano hi ku kombela xivuno ka Jehova?

¹⁸ A mutsali wa tisimu i kombisile tshamela gi nene ga mbilu a xikhati a nga tsala lezi: “Tsumba ka Nungungulu, hakuva nza ha ta mu dumisa, hi kota ya kuhanyisa loku ku tako hi le nghoheni yakwe. Nungungulu wa mina, a muhefemulo wa mina wa xaniseka nzeni ka mina; hikwalaho nza ku alakanya.” (Tis. 42:5, 6) Hi nga wona a liranzo lelo a nga hi nalo hi Jehova! Xana u nalo liranzo ni kutsumba ka tshamela lego hi Dadani wa wena wa le tilweni? Hambu loku u byekelela ku wula ku ina, u nga zama ku engetela ku mu tsumba kota lezi a Biblia gi hi byelako loku giku: “Tsumba Jehova hi mbilu ya wena yontlhe, u nga tsumbi kupimisisa ka wena wutsumbu. U ta mu ingisa tindleleni tontlhe ta wena, yena i ta lulamisa a tisoko ta wena.” — Mav. 3:5, 6.

19. Hi tihi tindlela leti u ti yimiseleko ku kombisa hi tona liranzo la wena hi Jehova?

¹⁹ Hi ku ranga a hi ranza, Jehova i hi kombile lezi hi nga mu ranzisako zona. Ngha hi tshama na hi alakanya a xikombiso xakwe xa hombe. Ngha hi simama ku engetela ku kombisa liranzo la hina hi yena ‘hi mbilu ya hina yontlhe, ni muhefemulo wontlhe, ni kupima kontlhe, ni ntamu wa hina wontlhe.’ — Mar. 12:30.