HLOKO YA MHAKA YA KAPA | ZI NA NI LISIMA A KU MAHA MUKHONGELO?
Hikuyini Nungungulu a lavako ku hi maha mukhongelo?
Nungungulu i kombisa wunghana.
A vanghana va bhula zinwe hi kukhanzakanya kasi va tiyisa wunghana gabye. Hi kufanana, Nungungulu i hi ramba ku bhula naye, hi ndlela leyo a hi vululela nyangwa ya kuva hiva ni wunghana gi nene naye. I ngalo: “Mu ta nzi vitana, mu famba mu nzi khongela, mina nzi ta mu ingisa.” (Jeremia 29:12) Laha u bhulako na Nungungulu, u taya u ‘tshinela ka Yena, niku yena i ta tshinela ka wena.’ (Jakobe 4:8) A Biblia gi hi tiyisa giku: “Jehova i kusuhi ni vontlhe lava va mu khongelako.” (Tisimu 145:18) Laha hi khongelako nguvu ka Nungungulu, a kuzwanana ka hina naye konawu ku ta engetela.
“Jehova i kusuhi ni vontlhe lava va mu khongelako.” — Tisimu 145:18
Nungungulu i lava ku ku vuna.
Jesu i te ngalo: “Xana himani xikari ka nwina loyi a to nyika n’wana wakwe a ribye, loku a kombela xibaba, kutani loku a kombela xidluwani, a mu nyika a nyoka ke? Hikwalaho loku nwina, . . . mu zi tiva ku nyika le’zo saseka ka vanana va nwina, nguvunguvu a Raru wa nwina wa le tilweni a nga ta va nyika zilo zo saseka lava va mu kombelako ke?” (Mateu 7:9-11) Kunene, Nungungulu wa ku ramba lezaku u khongela kakwe hakuva wa ku “khatalela” niku i lava ku ku vuna. (1 Pedro 5:7) I tlhela a lava lezaku u mu byela zikarato za wena. A Biblia gi hi byela lezi: “Mu nga kanakaneli nchumu; kanilezi a timhakeni tontlhe tivisani a mixuvo ya nwina ka Nungungulu hi kukombela ni kukhongotela, na mu kari mu bonga.” — Va Le Filipi 4:6.
A vanhu va na ni xilaveko xa moya.
A titlhari ta ku gonza zilo za ntumbuluko ti polile lezaku a vanhu va timiliyoni va zi wona na zi laveka a ku va maha mukhongelo. Hambu lava va nga kholwiko ka Nungungulu vonawu va patseka ka ntsengo lowu.a Lezo zi seketela mhaka ya lezaku a vanhu va vangilwe na va hi ni xilaveko xa moya. Jesu i te ngalo: “A munhu a nga ta hanya hi xibaba xoce, kanilezi hi timhaka tontlhelele leti ti humako nonwini wa Nungungulu.” (Mateu 4:4) A yinwe ya tindlela ta ku tatisa xilaveko lexo ku wulawula na Nungungulu hi kukhanzakanya.
Loku hi vumela xirambo xa Nungungulu xa kuva hi khongela kakwe, hi tava ni mabhinzu muni?
a A kambisiso wa Pew Research Center wu mahilweko hi 2012, wu kombile lezaku hi wutsongwani ga kona a 11 wa tipursento ta vanhu va nga kholwiko ka Nungungulu le Estados Unidos va khongela khati ginwe hi hweti.