Ciro ciswa ca Hubye yi Fumako

HI Wazithathu wa 24 ka Janeiro wa 2018, a ngango wa Beteli wa Estados Unidos ni Canadá yi tsakile nguvhu hi kuzwa citiviso co hlawuleka ci nga wula lezvi: Ka Hubye yi Fumako ya Vakustumunyu va Jehovha, ku engetelwe Makabye Kenneth Cook, Jr.

Makabye Cook i pswalilwe a tlhela a kulela Estados Unidos, a centro-sul le Pensilvânia. I gondzisilwe lisine hi munhu a nga gondza naye cikola na ko kiyela kutsongwani lezvaku a mbheta cikola sekundariya. I no guma a bhabhatiswa hi 7 ka Junho wa 1980. Hi 1 ka Setembro wa 1982, i no nghena ntirweni wa cikhati contlhe kota phayona. Andzhako ka malembe mambiri na a phayona, i no vitaniwa ku ya tira Bheteli hi 12 ka Outubro wa 1984. I sangulele le Wallkill, Nova York.

Ka 25 wa malembe ma nga landzela, Makabye Cook i tirile zvilo zvo hambanahambana le ka Muchini wo Gandla Mabhuku ni le Hofisa ya Bheteli. Hi 1996, i no chadha na Jamie. Yenawu i no vitaniwa Bheteli le Wallkill a ta tira naye. Hi Dezembro wa 2009, Makabye Cook ni sati wakwe va no ciciwa va ya tira le tsindza ka zvikola zva hlengeletano (Centro Educacional da Torre de Vigia, le Patterson, Nova York). Makabye Kenneth Cook i no ya tirisana ni mapapilo ya Kometi ya Kutsala. Va no tlhela le Wallkill va ya tiranyana; va guma va ciciwa kambe hi Abril wa 2016 vaya Brooklyn, Nova York. Loku ku hundzile 5 wa tihweti, va no tlhela tsindza ka Misava yontlhe le Warwick, Nova York. Hi Janeiro wa 2017, Makabye Kenneth Cook i no nyikiwa ntiro wa ku vhunetela Kometi ya Kutsala ya Hubye yi Fumako.