Zviro zvimbiri zva zviswa zva Hubye yi Fumako

HI 5 KA OUTUBRO wa 2024 ku mahilwe citiviso co hlawuleka ka mutlhangano wa lembe, caku: Makabye Jody Jedele na makabye Jacob Rumph va yimisilwe kasi va tira kota zviro zva Hubye yi Fumako ya Vakustumunyu va Jehovha. A vamakabye lava va vambiri va na ni malembe yo tala na va tirela Jehovha hi kutsumbeka.

Makabye Jedele i pswalilwe Missouri, a Estados Unidos niku i wundlilwe lisineni. A ngango wakwe wu wa hanya ka wutshamu gi nga hi ni Vakustumunyu vatsongwani va Jehovha. Hikwalaho, i tivene ni vamakabye vo tala va midhawuko yo hambanahambana va ngata va ta vhunetela ku chumayela mahungu ya manene cipandzeni cabye. A lirandzo ni kuzwanana kabye zvi mu khumbile nguvhu. I bhabhatisilwe na a ha hi muswa hi 15 ka Outubro wa 1983. I wa zvi randza nguvhu a ku chumayela niku laha a nga mbheta a univhersidhadhe, i no sangula ku tira kota phayona ga cikhati contlhe hi Setembro wa 1989.

Na a ha hi muswa, a vapswali va makabye Jedele va wa endzela Bheteli zvin’we naye ni ndzisana yakwe ya wasati. Lezvo zvi mahile ku a vana vabye va ti vekela mixuvo ya ku tira Bheteli, niku hi wumbiri gabye va yi tatisile. Makabye Jedele i chikele Bheteli ya Wallkill hi Setembro wa 1990. A kusangula, i tirile ka dhepartamento ya ku basisa niku hi kulandzela i no tira ka dhepartamento ya ku khatalela lihanyo.

Ka cikhati leco, a mabandla ya lirimi la ciPanyoli ma nga hi laha kusuhani a mo andza niku ku wa laveka vamakabye va cinuna. Hikwalaho, makabye Jedele i noya ka gin’we ga wona a ya sangula ku gondza ciPanyoli. Andzhako ka cikhatanyana, i no tivana na makabye Damaris, a nga hi phayona ka cipandze caleco. Va no chadha va gumesa va tira zvin’we Bheteli.

Hi 2005 va no nyima ku tira Bheteli va ya khatalela vapswali vabye va maKristu. Ka cikhati leco, va no tira kota maphayona ya cikhati contlhe. Makabye Jedele i vhunetele ku gondzisa Cikola ca Ntiro wa Wuphayona niku i tirile ka Tikometi ta ku Tirisana ni Zvipitali ni ka Comissão regional de construção.

Hi 2013 a va ka Jedele va no tlhela va rambiwa Bheteli ya Warwick ka projeto ya ku aka; va tlhelile va tira Patterson ni Wallkill. Makabye Jedele i tirile ka Dhepartamento ya ku dhezenyara ni ka Dhepartamento yi Tirisanako ni Mahungu ya Zvipitali. Hi Março wa 2023, i no yimisiwa kota Muvhuneteli ka Kometi ya Ntiro. Loku a nyima a ku tsem, a alakanyela a zviavelo zvontlhe a vileko nazvo, i wula lezvi: “Loku u nyikiwa a ciavelo ciswa, ka zvikhati zvo kari u nga mbhela ntamu. Kanilezvi, ka cikhati leco, zvinene a ku alakanya ku tsumba Jehovha, hakuva hi yena a mahako lezvaku zvi koteka.”

Makabye Rumph i pswalelwe Califórnia, a Estados Unidos. Na a ha hi n’wanana a mamani wakwe i wa holile hi tlhelo ga moya, kanilezvi i zamile ku gondzisa n’wana wakwe a lisine la Bhibhiliya. Ahandle ka lezvo, lembe ni lembe i wa endzela a kokwani wakwe wa wasati, a nga hi Kustumunyu wa kukholwa ko tiya. A kokwani wakwe i mu hlanganyetile kasi a randza lisine, niku laha a nga hi ni 13 wa malembe, i no kombela ku fambiselwa cigondzo ca Bhibhiliya. Hi 27 ka Setembro wa 1992, na a ha hi muswa, i no bhabhatisiwa. A ya ku tsakisa hi ku a mamani wakwe i no vhuxetela ku chumayela ni kuya mitlhanganweni, niku wontlhe a maxaka yakwe ma no sangula ku kula hi tlhelo ga moya ma tlhela ma bhabhatisiwa.

Na a ha hi muswa, makabye Rumph i no wona ku a maphayona ma wa hi vanhu vo tsaka nguvhu. Hikwalaho, laha a nga mbheta ku gondza univhersidhadhe, i no sangula ku tira kota phayona hi Setembro wa 1995. Hi 2000, i no rura aya Equador kasi a ya tira lomu ku nga hi ni cilaveko. Na a hi seyo, i no tivana na Inga, a makabye wa phayona wa le Canadá, niku hi kufamba ka cikhati va no chadha. Andzhako ka muchadho wabye, va no hanya ka dhoropa go kari le Equador ku nga hi ni citlawana ca vahuweleli. Zvezvi ku na ni bandla ga hombe ni go tiya seyo.

Hi kufamba ka cikhati, makabye Rumph ni sati wakwe va no yimisiwa ku tira kota maphayona yo hlawuleka, andzhako ka lezvo, makabye Rumph i no tira kota muwoneleli wa cipandze. Hi 2011, va no rambiwa ku ya gondza a turma ya wu 132 ya Cikola ca Gileyadhe. Andzhako ka cikola, va no tira ka matiko yo hambanahambana ni ka zviavelo zvo hambanahambana, zvo kota ku tira Bheteli, ntiro wa wurumiwa ni kuva muwoneleli wa cipandze. Makabye Rumph i tlhelile ava ni thomo ga ku gondzisa a Cikola ca Vavhangeli va Mufumo.

Hi kota ya ntungu wa COVID-19, zvi no boha ku makabye Rumph ni sati wakwe va tlhela Estados Unidos. Va no rambiwa ku ya tira Bheteli wa Wallkill, lomu makabye Rumph a nga gondzisiwa ku tira ka Dhepartamento ya Ntiro. Andzhako ka lezvo, va no tlhela va nyikiwa a ciavelo ca ku ya tira Ravini ga Equador kambe, lomu makabye Rumph a nga tira kota ciro ca Kometi ya Ravi. Hi 2023, va no rurisiwa va yisiwa Warwick. Hi Janeiro wa 2024, makabye Rumph i no yimisiwa ku tira kota Muvhuneteli ka Kometi ya Ntiro. Loku a ehleketa hi kontlhe lomu a nga tira kona, i ngalo: “Leci ci mahako ku a ciavelo co kari civa co hlawuleka a hi wutshamu ga kona, kanilezvi vanhu lava u va tirelako.”

Ha wu bonga nguvhu a ntiro lowu a vamakabye lava va mahako hi kutikarata, niku hi ‘simama ku randza a vanhu va tshamela legi’. — Filp. 2:29.