Nyikela Marevista Lawa Ma Kustumunyako Hi Zinene
1. Hi wihi a ntiro wa A Sentinela ni Despertai!?
1 A revista A Sentinela Anunciando o Reino de Jeová ni munghana wa gona, Despertai!, ma simama kuva xipanze-tshinya xa ntiro wa ku xumayela Mufumo ni ku maha vapizani. (Mat. 24:14; 28:19, 20) Hi kuma litsako hi kuva xikhati ni xikhati hi nyikela marevista lawo ma tako hi xikhati xi faneleko, loku hi kari hi hlengela ka matshamela yo hambanahambana ya ntiro wa Mufumo.
2. Kucicacica muni loku ku wonekako lomu ka A Sentinela ni Despertai! niku hikuyini?
2 A kufambeni ka malembe ha wona kucicacica lomu ka wuhombe ni ka lezi zi nga nzeni ka marevista zinwe ni ka tindlela leti hi ti tirisako kuaveleni ka wona. A kucicacica loko ku mahelwa lezaku a marevista ma tsakisa nguvu ni ku bhinzula, kasi a mahungu ya Mufumo ma khumba a timbilu ta ‘vanhu vontlhe lezaku va hanyiswa, vava ni kutiva ka zinene.’ — 1 Tim. 2:4.
3. Xana a marevista ma ta tirisiswa kuyini wutirelini?
3 Kusukela Janeiro wa 2006, hi kumile wutlhari ga ku tirisa a zingheniso zo hambanahambana kunyikeleni ka Despertai! legi gi humeswako khati ginwe hi hweti. Zalezi hi ta tlhela hi tirisa a zingheniso zo hambanahambana kunyikeleni ka A Sentinela Anunciando o Reino de Jeová ga ginwe ntsena ka lawa ya mambiri ma humesiwako hweti ni hweti loku hi hi ntirweni wa simu. A zingheniso za xikombiso za revista ginwe ni ginwani zi kumeka ka phajina go gumesa ga Wutireli Ga Hina Ga Mufumo. Hi tolovelo, zona zi khanyisa yinwe ya tinzima to sangula lomu ka revista, kanilezi zikhati zinwani a tinzima tinwani leti a vanhu va ti tsakelako nguvu ta kombisiwa. A zingheniso lezo za xikombiso zi nga tirisiwa hi kuhumelela loku hi zi tiva khwatsi lezi zi nga nzeni ka nzima leyi yi kombisiwako hi tlhela hi tirisa magezu ya hina venyi lezaku a xingheniso lexo xi zwanana ni matshamela ya lomu xipanzeni xa hina.
4. Hikuyini zi nga ha vunako a ku tirisa zingheniso zinwani zo hambana ni lezi za xikombiso zi nga ka Wutireli Ga Hina Ga Mufumo?
4 Hambu lezi a Wutireli Ga Hina Ga Mufumo gi nga ni zingheniso zimbiri za xikombiso zi tiriselwako revista ginwe ntsena, tlhatlheka lezaku u tirisa a xingheniso xinwani xo hambana ni lezi za xikombiso. A xinwe xa zigelo za ku maha lezo hi lezaku za koteka ku ngha a tinzima leti tinwani ti tsakelwa nguvu lomu xipanzeni xa nwina. Kutani ku nga hava lezaku u ti wona na u humelela khwatsi kunyikeleni ka marevista hi ku tirisa a nzima yinwani leyi yi ku tsakisako nguvu.
5. Mahlweni ka ku longisela lezi u lavako ku zi wula ka revista legi gi kombiswako, zini lezi u faneleko ku maha?
5 Ndlela Ya Ku Longisela A Xingheniso Xa Wena: A xo ranga ka zontlhe hi lezaku u fanele ku yi tiva khwatsi a nzima leyi u yi hlawulako a kuva u yi kombisa. Za koteka lezaku u nga zi koti ku ti tiva khwatsi a tinzima tontlhe ta lomu ka revista na u nga se sangula a ku gi tirisa wutirelini ga simu. Hambulezo, u fanele ku kombisa kutsaka ni lisine xungetano hi tinzima leti u ti hlawulako lezaku u ti kombisa. Wa zi kota ku maha lezo ntsena loku u ma tiva khwatsi a mahungu lawa u lavako ku ma kombisa.
6. Xana hi nga zi longiselisa kuyini a zingheniso za hina?
6 Xa wumbiri, longisela a zingheniso zo hambanahambana kasi ku zi tirisa ka ziyimo zo tsalangana. A xiwutiso xi faneleko, xi vuxako kutsakela xi yelanako ni nzima xi nga tiriswa kasi ku sangula bhulo. Xikhati xontlhe tsumba a wuzikoti ga Mhaka ya Nungungulu ga ku khumba a mbilu. (Maheb. 4:12) Hlawula a mutsalo wu faneleko lowu wu yelanako ni mhaka leyi mu bhulako hi yona, nguvunguvu lowu wu kumbukilweko kutani wu tshahilweko lomu ka nzima leyi u yi kombisako. Alakanyela lezi u nga wu zwananisisako zona a mutsalo lowo ni nzima.
7. Xana hi nga engetelisa kuyini a ku chukwatisa a zingheniso za hina?
7 Ka Xikhati Xihi Ni Xihi: Kasi ku a xingheniso xi bhinzula hakunene, xi fanele ku tirisiwa. Hlengela zinwe ni bandla ka wukustumunyu ga marevista hi Mulongiso. Nyikela marevista ka vanhu lava va sinako va vumelile manwani mabhuku. Xontlhe xikhati nyika marevista a zigonzani za wena za Biblia ni vanhu vanwani lava va zi kotako ku ngha va hi kona a xikhati lexi u mahako lwenzo lo wuyela. U nga ha siya marevista ka vanhu lava u wulawulako navo loku u hi kuxaveni, kuenzeni, kutani loku u hi kufoleni le xipitali. Chukwatisa a zingheniso za wena a xikhati lexi u zi tirisako nzeni ka hweti.
8. Xana a marevista A Sentinela ni Despertai! ma hlawulekile hi tindlela muni?
8 A marevista A Sentinela ni Despertai! ma hlawulekile nguvu. Wona ma tlakusa Jehova kota Hosi ya Hombe wuakweni gontlhe. (Miti. 4:24) Ma chavelela vanhu hi mahungu yo saseka ya Mufumo wa Nungungulu ma tlhela ma kuca a kukholwa ka Jesu Kristu. (Mat. 24:14; Miti. 10:43) Hi kuengetelekileko, wona ma simama ku cuwukela a zimaho za tiko a xikhati lexi zi tatisako a wuprofeti ga Biblia. (Mat. 25:13) Vuna vanhu lomu xipanzeni xa nwina lezaku va vuneka hi marevista lawo hi ku longisela a ku ma nyikela xontlhe xikhati xi fanelako!
9. Xana hi nga xi zimisa kuyini a xiseketelo xa lwenzo lo wuyela?
9 Loku u humelela kunyikeleni ka revista ginwe, kutani hambu loku uva ni bhulo go tsakisa ga moya ni munhu wo kari, tshama na u longile a xiwutiso kutani magezu ma tlhotlhako maalakanyo lawa ma zi kotako ku vulula ndlela ya lwenzo lo wuyela ni ginwani bhulo ga moya. Loku hi hiseka kuxwanyeni ka mbewu ya zinene, ha zi kota ku tiyiseka lezaku Jehova i ta vulula a timbilu ta lava va xuvako nguvu a ku Mu tiva ni ku Mu tirela. — 1 Kor. 3:6.