Chavelela Lava Va Nga Ni Timbilu Ti Tshovekileko
1 Matinwini wontlhe ya vanhu, a ku na ngava ni xilaveko xa ku chavelela vanwani a ku fana ni lexi xi nga kona inyamutlha. Hi ku lanzela wurangeli ga Hosi ya hina, Kristu Jesu, hinawu hi ti karatela ku “chuma lava va nga ni timbilu ti tshovekileko.” — Isa. 61:1.
2 Ndlela Yo Chavelela Vanwani: Kasi ku chavelela vanhu, a wutireli ga hina gi fanele kuva legi gi ringaniselweko, gi tiyisako hlana. Loku hi wulawula kutsongwani hi zimaho zo biha za tiko ni tigonzo ta mawunwa, a zinene za lomu Mitsalweni ni wumanziko go wonekela ga zitsumbiso za Nungungulu zi chavelelako zi ta fumela a bhulo. Lezi a zi wuli lezaku a hi faneli ku wulawula hi Har–Magedoni. A ntiro wa hina ku huwelela “a lembe ga tipswalo ta Jehova ni siku ga ku ti photela ka Nungungulu wa hina,” zinwe ni ku “tlharihisa loye wa kubiha ndleleni yakwe yo biha.” Hambulezo, a ku tlharihisa xungetano hi Har–Magedoni zinwe ni ku tlhamusela a magumo ya yona yo lovisa a zi faneli ku sirela a hloko ya mhaka ya ivangeli ya Mufumo wa Nungungulu. — Isa. 61:2; Ezek. 3:18; Mat. 24:14.
3 Hi Muti-Ni-Muti: Zi tolovelekile a ku kuma vanhu va tshovekileko timbilu hi kota ya mababyi, kufa ka a ranzekako, kubiha, kutani zikarato za timali. Kota vapimanyisi va Kristu, ha va “zwela wusiwana” lava hi va kumako wutirelini. (Luka 7:13; Rom. 12:15) Hambu lezi hi va gonzelako a mutsalo wunwe kutani yimbiri yi yelanako ni xikarato xabye, hi fanele ku “hatlisa kuzwa,” kasi hi tsika munhu loye a ti phofula. (Jak. 1:19) Anzhako ka kuva hi sangulile hi ku ingisela, hi tava ka xiyimo xi nene xa ku mu chavelela.
4 Hi xikhati xi faneleko nzeni ka bhulo, hi nga haku ngalo, “Nzi wa tsakela ku ku gonzela magezu ma tiyisako hlana lomu ka Biblia.” Hi fanele ku tirisa wutlhari lezaku hi nga zami ku kaneta a mawonela wontlhe ma nga lulamangiko lawa a munhu loye a nga ha ma kombisako. A wutshanwini ga lezo, hi fanele ku ti karatela ku tiyisa hlana ni ku chavelela hi ku tirisa Mitsalo kasi hi tiyisa a mbilu yakwe. Xungetano hi lezo, u nga ha kambisisa a Raciocínios à Base das Escrituras maphajina 133-7 hasi ka hloko ya mhaka “Encorajamento.” Kutani u nga ha nyika a nwinyi wa muti a xitlukana Consolo Para os Deprimidos u tlhela u songa a timhaka ti tiyisako hlana ti nga nzeni ka xona.
5 Hlota Tindlela Ta Ku Chavelela Vanwani: Xana wa tiva a wakelani, mutiri-kuloni, xigonzani-kuloni, kutani xiro xa ngango lexi xi nga ni xilaveko xa ku chavelelwa? Hikuyini u nga mahiko mizamo ya ku enzela vanhu lavo mitini yabye na u hi ni kungo ga ku va chavelela hi ku tirisa Mitsalo? Hi ku tiva a ku hikuyini va lavako kuchavelelwa, u nga ti longisela lezaku u yimisana ni xiyimo xabye. Kasi ku maha lezo a vo kari va tsala mapapilo kutani ku fona. A ku ranza wakelani hi ndlela ya lisine zi fanele ku hi vuna a ku zwela wusiwana ni ku chavelela vanwani hi ku tirisa Mitsalo. — Luka 10:25-37.
6 Ina, hi nyikilwe ntiro wa ku chavelela lava va rilako, ku tangalisa a timbilu ti tshovekileko, ni ku nyika kutsumba xungetano hi wumanziko go wonekela. Loko hi kona a kuchavelelwa loku a vanhu misaveni yontlhe va ku lavako. A ku wulawula hi kutsaka xungetano hi zilo zinyingi za zi nene lezi Nungungulu a zi tsumbisako zi ta tiyisa hlana ni ku nyika kutsumba lava va nga ni timbilu ti nene. Ngha xikhati xontlhe hi alakanya a xilaveko xa ku chuma lava va nga ni timbilu ti tshovekileko.