Nyika Wukustumunyu Go Mbhelela Ga Mahungu Yo Saseka
1. Mahungu muni yo saseka lawa hi faneleko ku ma byela vanhu?
1 Tikweni legi a mahungu yo saseka ma kalako, hi na ni lungelo ga ku ‘nyika wukustumunyu go mbhelela ga mahungu yo saseka ya tipswalo ta Nungungulu.’ (Miti. 20:24, Tradução do Novo Mundo) Lezo zi patsa ku tivisa vanhu lezaku ‘a masiku yo gumesa’ lokuloku ma ta valetwa hi misava yiswa yo lulama ya Jehova, laha ‘a zilo zo sangula zi ta ngava zi hunzile.’ (2 Tim. 3:1-5; Kuv. 21:4) Xikhatini lexo a mababyi ma nga ta hava kona. (Isa. 33:24) A varanzekako va hina lava va fileko va ta huma hi lomu zilahleni va tlhela va patsana ni ngango zinwe ni vanghana vabye. (Joh. 5:28, 29) A misava yontlhe yi ta mahiwa paradise go saseka. (Isa. 65:21-23) Lezo zikombiso ntsena za mahungu yo saseka lawa hi faneleko ku ma byela vanhu!
2. Hikuyini a nguva ya Xialakanyiso yi hi ni malungelo ma nene ya ku nyika wukustumunyu ga mahungu yo saseka?
2 A tihweti ta Março, Abril, ni Maio ti tava ni malungelo ma nene nguvu ya ku huwelela a mahungu lawo yo saseka. Nzeni ka tihweti leto, a siku gi lehile niku a matshamela ya xikhati ma faneleka kasi ku mbheta xikhati xo leha wutirelini ka matshamu yo tala misaveni. Hi kuengetelekileko, a ximaho xa lisima nguvu xa lembe, ku nga Xialakanyiso xa kufa ka Jesu, xi ta mahiwa misaveni yontlhe anzhako ka kupela ka gambo hi Mulongiso, 22 ka Março. Zalezi xikhati xa ku sangula a ku ti longisela lezaku hi engetela ntiro wa hina.
3. Zini lezi zi ta nga hi vuna a ku engetela ntiro wa hina kota mingango?
3 Maha Phayona Go Vunetela: Xana u nga zi kota ku ti longisela lezaku u maha phayona go vunetela hi hweti yinwe, timbiri, kutani tontlhe tihweti leto ta tinharu? Hikuyini mu nga vekiko a xikhati xo kari nzeni ka xigonzo xa nwina xa ngango lexi xi lanzelako lezaku mu bhulisana hi mhaka leyi? Loku mu zwanana khwatsi, a xiro xinwe kutani zo tala laha ngangweni zi nga ha tira kota maphayona yo vunetela. (Mav. 15:22) Khongelani hi mhaka leyi, mu ta wona lezi Jehova a ta nga yi katekisisa zona a mizamo ya nwina. (Mav. 16:3) Hambu loku zi nga koteki lezaku a munwe wa nwina a tira kota phayona go vunetela, zontlhe a ziro za ngango zi nga ti vekela tinzima ta ku engetela a wutireli ga zona a xikhati lexi zi tirako ni lava va zi kotako ku phayona.
4. Xana hi nga zi kotisa kuyini ku longoloxa mitiro ya hina lezaku hi tira kota maphayona yo vunetela loku ku hi lezaku hi na ni ntiro wa xikhati xontlhe?
4 Loku a ntiro wa wena wa kutihanyisa wu hi wa xikhati xontlhe, a kuva ni longoloko wu nene zi nga ku vuna lezaku u tira kota phayona go vunetela. Kuzilava u nga tirisa a xikhati xa wena xa kufihlula lezaku u xumayela. Kutani u nga ha kombela a xipanze xa wena wece kusuhani ni laha kaya kutani ni le ntirweni, lezaku u hlengela wutirelini hi hora yinwe kutani kuhunza, mahlweni kutani nzhako ka ntiro. U nga zi kota kambe a ku kuma xikhati xi engetelekileko lomu ka longoloko wa wena hi ku cica a mitiro yi nga hiko ya lisima yiya ka hweti yinwani ni ku tirisa a xikhati xontlhe xa kumbhela ka viki wutirelini. A vo kari va zi kotile a ku susa maferiya ya siku ginwe kutani mambiri kasi vava ntirweni wa simu.
5. Xana u nga va vunisa kuyini lava va khosaheleko kutani lava va nga ni mababyi lezaku va maha maphayona yo vunetela?
5 Loku ku hi lezaku u khosahele kutani u na ni mababyi kutani wuzikoti gitsongwani, u nga zi kota ku tira kota phayona go vunetela hi ku mbheta tihora titsongwani siku ni siku wutirelini. Kombela Jehova lezaku a ku nyika a “ntamu lowu wa hombe.” (2 Kor. 4:7) A makabye wo kari wa xisati i zi kotile ku phayona na a hi ni malembe ya 106! Hi ku vuniwa hi maxaka yakwe ya maKristu ni vanwani lomu bandleni, yena i xumayele hi muti-ni-muti, a maha maenzo yo wuyela; a enzela a zigonzo za Biblia, a tlhela a hlengela ka zipanze zinwani za wutireli. Yena i vunile a ku sangula zigonzo za Biblia ni khume ga vanhu. A makabye loye wa xisati i ngalo: “Loku nzi alakanya hi lungelo lego go hlamalisa legi nzi vileko nago ga ku tira kota phayona go vunetela, a mbilu ya mina yi tala hi liranzo ni kubonga Jehova, N’wana wakwe, ni hlengeletano Yakwe ya liranzo. Hi lisine nzi lava ku ngalo, ‘nzi bongile Jehova!’”
6. Xana a vanhu vaswa va bapatizilweko lava va ha hiko xikoleni va nga zi kotisa kuyini ku tira kota maphayona yo vunetela?
6 Loku u hi munhu muswa a bapatizilweko loyi a ha hiko xikoleni, wenawu u nga zi kota ku ti tsalisa kota phayona go vunetela. A ku fana ni lava va nga ni ntiro wa kutihanyisa wa xikhati xontlhe, wenawu kuzilava u ta tirisa nguvunguvu a kumbhela ka viki lezaku u tira wutirelini. Ginwani ga masiku wenawu u nga haya ntirweni wa simu hi hora yinwe kutani kuhunza, loku u humile xikoleni ka masiku yo kari. Xana ku na ni feriado leyi u nga ha yi tirisako lezaku uya wutirelini? Loku u tsakela ku tira kota phayona go vunetela, bhulisana ni vapswali va wena hi mhaka leyi.
7. Zini lezi a madota ma nga zi mahako kasi ku engetela a kuhisekela wutireli nzeni ka nguva ya Xialakanyiso xa kufa ka Jesu?
7 Engetela A Kuhiseka: A madota ma nga maha zo tala hi xikombiso xa wona kasi ku engetela a kuhiseka ka bandla. (1 Ped. 5:2, 3) Wona ma nga ha boha ku maha mitlhangano yinwani ya ntiro wa simu kasi ku vuna lava va ta ngaya wutirelini na ga ha hi mixo nguvu, lava va to ngha va wuyile hi xikoleni kutani hi ntirweni. A muwoneleli wa ntiro i fanele ku tiyiseka lezaku ku hlawuliwa a vahuweleli va ringanelwako kasi ku rangela a mitlhangano ya ntiro wa simu ni ku tiyiseka lezaku ku na ni xipanze xo enela zinwe ni mabhuku yo enela kasi ma tirisiwa hi tihweti leto ta ntiro wo hlawuleka.
8. Zini lezi hi gonzako hi ka xikombiso xa bandla go kari?
8 Ka bandla go kari, a madota ma sangulile ku kuca vamakabye lezaku va phayona na ka ha sele tihweti to tala. Viki ni viki va wa tivisa a bandla xungetano hi hlayo ya vahuweleli lava va nga vumelelwa ku tira kota maphayona yo vunetela. Lezi zi tiyisile lava va nga navela ku engetela wutireli gabye lezaku ku tava ni vamakabye vo tala va ku tira navo. Ku longiselwe a mitlhangano yo engeteleka ya ntiro wa simu ya ni mixo nguvu ni ya gambo. A wuyelo ga kona ku vile lezaku a 53 wa vahuweleli va tirile kota maphayona yo vunetela hi Abril, kusuhani ni khihlanya ga bandla!
9. Hikuyini a nguva ya Xialakanyiso yi hi xikhati xi nene nguvu, ka lava va ringanelwako, xa ku sangula ku huwelela a mahungu yo saseka?
9 Vuna Vanwani Lezaku Va Xumayela: A xikhati lexi a vanhu vaswa ni lava va ha hiko vaswa zineneni va ringanelwako hi kuva vahuweleli, va nga ha rambiwa lezaku vaya ntirweni wa simu ni vahuweleli lava va buvileko. A lungelo lego gi nga ha kumeka hi nguva ya Xialakanyiso kota lezi a vo tala laha bandleni va ta nga engetela ntiro wabye. Xana u na ni xigonzani xa Biblia xi yako mahlweni lexi xi zwananisako a wutomi ga xona ni milayo yo lulama ya Jehova? Xana u na ni vanana va nga ni xichawo lava va yako mahlweni kanilezi va kalako va nga se maha vahuweleli? Loku ku hi lezaku a vanhu lavo va kombisa a kunavela kuva vahuweleli va nga bapatizwangiko, na u alakanya lezaku va ringanelwa, tivisa munwe wa madota. A muwoneleli loyi a rangelako bandla i ta maha malulamiselo ya lezaku a madota mambiri ma bhulisana na wena zinwe ni n’wana wa wena kutani xigonzani xa wena.
10. Zini lezi a madota ma nga zi mahako kasi ku vuna lava va holileko?
10 A tihweti leti ti tako ti ngava xikhati xa xi nene nguvu kambe ka lava va holileko lezaku va vuxeta a ntiro wabye zinwe ni bandla. A vawoneleli va Xigonzo xa Bhuku xa Bandla ni madota manwani va fanele ku ti karatela ku vuxela vanhu lavo va tlhela va va ramba hi ndlela yo kufumela lezaku va tira navo wutirelini. Loku ku hi lezaku va holile kale, a madota mambiri ma fanele ku bhulisana navo kuranga kasi ku boha ku xana va ringanelwa ke. — km 11/00 p. 3.
11. Hi xihi a xikombiso xa hombe ka zontlhe xa “tipswalo ta Nungungulu”?
11 Ti Longisele Lezaku Uva Kona Ka Xialakanyiso: A nzhiho xikombiso xa hombe ka zontlhe xa “tipswalo ta Nungungulu.” (Miti. 20:24) A vanhu va timiliyoni lava va nga ni kubonga misaveni yontlhe va ta tlhangana hi Mulongiso, 22 ka Março, anzhako ka kupela ka gambo, lezaku vava kona ka Xialakanyiso xa kufa ka Jesu. Hi lava ku ramba vanhu vontlhe va timbilu ti nene hi tlhela hi va vuna lezaku vava kona ka ximaho lexo xa lisima lexi xi nyikako wukustumunyu xungetano hi tipswalo ta Jehova ka vanhu.
12. Hi vamani lava hi nga va rambako ka Xialakanyiso?
12 Maha xaxameto wa lava u lavako ku va ramba. Handle ko kanakana a xaxameto wa wena wu ta patsa maxaka, vaakelani, lava u tivanako navo ntirweni kutani xikoleni, zigonzani za Biblia za kale ni lezi za ha gonzako zalezi, ni vontlhe lava u va vuxelako hi kukhanzakanya. Loku a vo kari lava u va rambako va hi ni ziwutiso xungetano hi Xialakanyiso, u nga ha va vuna hi ku tirisa a nzima ya xiengetelo yi wulawulako hi Xilalelo Xa Hosi lomu ka maphajina 206-8 ya bhuku A Biblia Gi Gonzisako. Lezo zi nga ha tlhela zi vuna a ku sangula xigonzo xa Biblia, kota lezi zi ta nga ku nyika a lungelo ga ku tirisa bhuku legi hi fambisako hi gona a zigonzo za Biblia.
13. Xana Jehova i yi katekisisile kuyini a mizamo ya vahuweleli vambiri lava va ti karateleko ku ramba vanhu vanwani ka Xialakanyiso?
13 A makabye wo kari wa xisati i mahile xaxameto wa 48 wa mingango leyi a nga lava ku yi ramba. A xikhati lexi a ngaya a va ramba, i wa tsala nzhati hehla ka mavito yabye a tlhela a tsala siku legi a va rambileko hi gona. A nga no kutsaka hi lezi a 26 wa vanhu lava a nga va rambile va tileko ka Xialakanyiso! A makabye wo kari wa xinuna loyi a nga ni xitolo i rambile a mutiri wakwe loyi kale a nga hi paderi. A wanuna loye i kumekile niku anzhako ka lezo i hlamalile: “Nzi gonzile zo tala xungetano hi Biblia hi hora yinwe a ku hunza lezi nzi zi gonzileko hi 30 wa malembe lawa nzi ma mbhetileko lomu ka Chechi ya Katolika.” Anzhako ka Xialakanyiso, i tekele ku vumela a xigonzo xa Biblia hi ku tirisa bhuku A Biblia Gi Gonzisako.
14. I tsima muni ga misava yontlhe legi gi ta nga sangula hi 1 ka Março?
14 A Tsima: Kusukela hi Mulongiso, 1 ka Março, kala 22 ka Março, ku ta avelwa a xirambo xo hlawuleka xa Xialakanyiso misaveni yontlhe. Hontlheni hi fanele ku hlengela nguvu ka tsima legi ga lisima. I chukwana ku nyikela a xirambo ka nwinyi wa muti hi kukongoma wutshanwini ga ku xi siya laha nyangweni. Hambulezo, loku a xipanze xa nwina xi hi xa hombe, a madota ma nga ha boha lezaku za fanela kutani ahihi a ku siya zirambo hi wutlhari lomu mitini leyi yi nga hiko na vanhu. Lomu ka kumbhela ka viki, hi ta nyikela kambe ni marevista ya hweti leyo.
15. Xana hi nga xi nyikelisa kuyini a xirambo xa Xialakanyiso?
15 Kota lezi hi nga ni xikhati xi tsongwani xa ku nyikela a zirambo, i chukwana a kuva ni xingheniso xo koma. Ngha uva ni wunghana u tlhela u tlharihisa bhulo. U nga ha wula zo fana ni lezi: “Ha ku ramba lezaku wena, ziro za ngango wa wena, ni vanghana va wena muva kona ka ximaho xa lisima hi siku ga 22 ka Março. A xirambo xa wena hi lexi. A mahungu manwani u ta ma kuma kwalomo ka xirambo.” Za koteka ku a nwinyi wa muti a hi ni ziwutiso. Kutani a nga ha amukela xirambo a tlhela a wula lezaku i tava kona. Loku u wona lezaku i kombisile kutsakela, maha malulamiselo ya ku mu tlhelela.
16. I tshango muni gi kombisako a lisima la tsima ga ku ramba vanhu va lomu xipanzeni lezaku vava kona ka Xialakanyiso?
16 Nwecemu a musochwa wo kari i kumile a xirambo xa Xialakanyiso laha nyangweni ya yindlu yakwe. I lo boha kuva kona kanilezi i wa fanele ku vumelelwa hi murangeli wakwe. A xikhati lexi a nga mu komba xirambo, a murangeli loye i lo miyela a guma a wula lezaku a vapswali vakwe Timboni niku i wa tolovela kuya mitlhanganwini zinwe navo. A murangeli loye a nga vumelelangi a musochwa kuya Xialakanyisweni ntsena kanilezi yenawu i yile!
17. Xana hi zi kombisisa kuyini lezaku a hi amukelangi a tipswalo ta Nungungulu mahala?
17 Kombisa Kubonga: Kota lezi a nguva ya Xialakanyiso xa 2008 yi tshinelako, ngha a munwe ni munwani wa hina a alakanyela a tipswalo ta Jehova xungetano hi vanhu. Mupostoli Paule i tsalile: “Ha mu khongotela lezaku mu nga amukeli tipswalo ta Nungungulu mahala.” (2 Kor. 6:1) Xana hi zi kombisisa kuyini lezaku a hi amukelangi a tipswalo ta Nungungulu mahala? Paule i tsalile: “Kanilezi ka zilo zontlhe hi ranza ku kombisa lezaku hi malanza ya Nungungulu.” (2 Kor. 6:4) Hikwalaho, hi kombisa kubonga ka hina a xinyikiwo xa Jehova hi mahanyela ya hina ya ma nene zinwe ni kuxumayela mahungu yo saseka hi kuhiseka. A nguva leyi ya Xialakanyiso yi tava lungelo ga gi nene nguvu ga lezaku hi engetela ntiro wa hina, hi nyika wukustumunyu go mbhelela ga mahungu yo saseka.
[Magezu yo koka kupima ka phajina 3]
Hi Vamani Va Patsekako Xikari Ka Lava Va Nga Zi Kotako Kuva Maphayona Yo Vunetela?
◼ Mingango
◼ Lava va nga ni ntiro wa kutihanyisa wa xikhati xontlhe
◼ Lava va khosaheleko ni lava va nga ni mababyi
◼ Lava va nga xikoleni
[Kwadru ka phajina 4]
A Xikhati Lexi U Avelako A Zirambo Za Xialakanyiso:
◼ Komisa a bhulo, u gi tlharihisa
◼ Tsala mavito ya lava va kombisako kutsakela, u guma u va tlhelela
◼ Nyikela marevista kumbheleni ka viki