Ti longisele zalezi a ku engetela wutireli ga wena
1. Xana a nguva ya Xialakanyiso yi hi vululela ndlela ya ku maha yini, niku hi nga ti longiselisa kuyini?
1 Lembe ni lembe, a nguva ya Xialakanyiso yi hi vululela ndlela ya ku “mu bonga nguvu Jehova.” (Tis. 109:30) Xana u ta engetela a ntiro wa wena wa kuxumayela hi Março kota ndlela ya ku bonga Jehova, a Munyiki wa nzhiho? Lexi hi xona xikhati xa ku ti longisela. — Mav. 21:5.
2. Zini lezi wena ni vanwani mu mahileko a xikhati lexi mu nga tiva a lulamiselo ga ku tira a 30 wa tihora kota phayona go vunetela hi Abril?
2 Wuphayona go vunetela: A lembe gi nga hunza, a mabandla ma lo tsaka nguvu laha ma nga tiviswa a lulamiselo ga ku tira a 30 wa tihora kota phayona go vunetela hi Abril. A makabye wo kari wa xinuna i te ngalo: “Nza ha gonza a xikola sekundaria, niku a nzi se zi kota ku tira kota phayona ga xikhati xontlhe. Hambulezo, nzi lava ku maha xikombelo xa 30 wa tihora kanilezi nzi ti karatela ku tira a 50 wa tihora hi Abril.” A makabye munwani wa xisati a ntiro wakwe wu nga mu nyikiko xikhati i te ngalo: “A 30 wa tihora ntsena — lezo a zi karati ne ni kutsongwani!” A xikhati lexi ku nga tiviswa a lulamiselo legi, a makabye wo kari a nga hi phayona, loyi zalezi a nga kwalomo ka 80 wa malembe, i te ngalo: “Lezi hi zona nzi nga zi rinzela! Jehova wa zi tiva lezaku a masiku ya ma nene nguvu wutomini ga mina kuve xikhati lexi nzi nga hi phayona!” Lava va nga kala ku zi kota ku kuva maphayona yo vunetela va ti vekele mixuvo ya ku tira nguvu sinwini.
3. Hikuyini a hweti ya Março, Abril, ni Maio, ku nga xikhati xi nene xa ku tira kota phayona go vunetela?
3 A hweti ya Março yi tava xikhati xi nene nguvu xa ku tira kota phayona go vunetela hakuva hi tava ni lungelo kambe ga ku hlawula ku tira a 30 kutani 50 wa tihora. Ahandle ka lezo, kusukela hi Mulongiso wa 17 ka Março, hi ta sangula tsima go hlawuleka ga ku ramba vanhu lezaku va tava zinwe na hina Xialakanyisweni hi 5 ka Abril. A vanyingi va ta ti buza hi ntiro lowu laha ka kuza va lava ku simama va tira kota maphayona yo vunetela hi Abril ni Maio, na va tira a 50 wa tihora.
4. Xana hi nga engetelisa kuyini a wutireli ga hina, niku hi tava ni wuyelo muni?
4 Ka Wukhozeli ga nwina ga Ngango gi lanzelako, hikuyini mu nga bhulisaniko hi tindlela ta kuva a munwe ni munwani wa nwina a engetela a wutireli ga yena nguveni ya Xialakanyiso? (Mav. 15:22) Kombelani Jehova lezaku a katekisa a mizamo ya nwina. (1 Joh. 3:22) A xikhati lexi u engetelako a wutireli ga wena u ta dumisa Jehova u tlhela u kuma litsako la hombe. — 2 Kor. 9:6.