‘Wu Lanzeleni Khwatsi A Nkonzo Wakwe’
1. Xana hi nga zi kotisa kuyini kuva vatireli vo humelela?
1 Jesu a nga gonzisiwangi zikoleni za vaRabi, kanilezi i vile Mutireli wa hombe ka vontlhe matinwini. Lexi xi tsakisako hi lezaku ku hlayisilwe matimu ya wutireli ga Jesu kasi hi vuneka hi wona. Kasi hiva vatireli vo humelela, hi fanele ku wu ‘lanzela khwatsi a nkonzo wakwe.’ — 1 Ped. 2:21.
2. Zini lezi zi ta nga hi vuna ku hlakulela a liranzo lo fana ni la Kristu hi vanhu?
2 Kombisa Liranzo Ka Vanhu: A ku khatalela vanhu hi liranzo hi zona zi nga kari zi kuca Jesu lezaku a xumayela. (Mar. 6:30-34) A vo tala xipanzeni xa hina va “xaniseka” niku va na ni xilaveko xa hombe xa zinene. (Rom. 8:22) A kualakanyela ka hina a xiyimo xo binza lexi va nga ka xona ni kukhatala ka Jehova ka liranzo hi vona zi ta hi kuca a ku simama hi xumayela. (2 Ped. 3:9) A ku hunza lezo, a vanhu va ta tekela ku amukela a mahungu ya hina loku va wona lezaku hakunene ha khatala hi vona.
3. Hi ka zikhati muni laha Jesu a nga xumayela a vanwani?
3 Wulawula Xontlhe Xikhati: Jesu i wa lonzowota a xikhati xontlhe lezaku a hlengela a mahungu yo saseka ni vanwani. (Mat. 4:23; 9:9; Joh. 4:7-10) Hi kufanana, hi fanele ku ti longisela a ku wulawula hi zinene a xikhati lexi hi nga mitirweni ya hina ya siku ni siku. A vo kari va tshama na va hi ni mabhuku ma seketelwako ka Biblia lezaku va nyika wukustumunyu le ntirweni, le xikoleni, loku va enza, loku vaya kuxaveni, ni kunwani.
4. Xana hi nga zi mahisa kuyini lezaku a mahungu ya Mufumo mava hloko ya mhaka ya kuxumayela ka hina?
4 Wulawula Nguvu Hi Mufumo: A mahungu yo saseka ya Mufumo ma wa hi hloko ya mhaka ya kuxumayela ka Jesu. (Luka 4:43) Hambu lezi kuzilava a xingheniso xa hina xi to kala ku kumbuka a Mufumo hi kuhatlisa kutani hi kukongoma, hi tshama na hi alakanyela a ku vuna nwinyi wa muti lezaku a wona a xilaveko xa Mufumo. Hambu loku hi kari hi kumbuka a matshamela yo biha ya tiko kasi ku kombisa lezaku hi hanya masikwini yo gumesa, nguvunguvu hi ‘neha a mahungu yo saseka’ ya zilo zi nene. — Rom. 10:15.
5. Kasi a wutireli ga hina giva go humelela, xana hi fanele ku gi tirisisa kuyini a Biblia?
5 Khegela Mhakeni Ya Nungungulu: Wutirelini gakwe gontlhe Jesu i wa khegela ka Mitsalo. Yena a nga gonzisangi za wutsumbu gakwe. (Joh. 7:16, 18) I wa gonza a Mhaka ya Nungungulu a tlhela a yi tirisela ka yena nwinyi a xikhati lexi a nga kari a vukelwa hi Satani. (Mat. 4:1-4) Kasi hi zi kota a ku gonzisa vanwani hi kuhumelela, hi fanele ku gonza a Biblia siku ni siku hi tlhela hi tirisa a timhaka ta gona ka hina wutsumbu. (Rom. 2:21) A xikhati lexi hi hlamulako ziwutiso wutirelini, hi fanele ku wula a xiseketelo xa lomu Mitsalweni xa lezi hi zi wulileko hi tlhela hi gonza lomu ka Biblia hi kukongoma a xikhati xihi ni xihi zi kotekako. Hi lava lezaku a nwinyi wa muti a zi wona ku ngalo a hi wuli zilo za hina wutsumbu kanilezi hi khegela ka maalakanyo ya Nungungulu.
6. Zini lezi Jesu a nga maha kasi ku khumba timbilu ta lava a nga va gonzisa?
6 Khumba Mbilu Kugonziseni Ka Wena: “Cima a ku wulawulangi munhu kota gaya.” (Joh. 7:46) Hi lezo va nga hlamulisa zona a vanyakasani a xikhati lexi a vapristi va hombe ni vaFarisi va nga wutisa ku hikuyini a vanyakasani va nga tsanzeka ku mu khoma. Wutshanwini ga ku nyika mahungu ntsena, Jesu i wa gonzisa hi ndlela yi nga khumba timbilu ta lava va nga mu ingisela. (Luka 24:32) Yena i wa tirisa a mifananiso ya zilo za siku ni siku kasi ku va vuna lezaku va zwisisa a magezu yakwe. (Mat. 13:34) Jesu i wa nga tateli timhaka a vaingiseli vakwe. (Joh. 16:12) I wa wulawula nguvu hi Jehova wutshanwini ga ku wulawula hi yena wutsumbu. A ku fana na Jesu, hi ngava vagonzisi va nene ntsena loku hi ‘ti wonela kugonziseni ka hina.’ — 1 Tim. 4:16.
7. Hikuyini Jesu a ngaya mahlweni a xumayela?
7 Yana Mahlweni Na Ku Nga Khataliseki A Kungakhatali Ni Kukanetwa: Hambu lezi Jesu a mahileko mitiro yo tala ya ntamu, a vanhu vo tala a va mu ingisangi. (Luka 10:13) Hambu ziro za ngango wa Jesu wutsumbu zi wa alakanya lezaku yena i “wa pepuka.” (Mar. 3:21) Hambulezo, Jesu i yile mahlweni. I simamile a tsaka hakuva i wa tiyiseka hi kumbhelela lezaku i wa hi ni zinene lezi zi nga wa ta tlhatlhisa vanhu. (Joh. 8:32) Hi ku vuniwa hi Jehova, hinawo hi ti yimisele ku nga rereki. — 2 Kor. 4:1.
8, 9. Xana hi nga mu pimanyisisa kuyini Jesu kutikarateni hi kota ya mahungu yo saseka?
8 Ti Karate Hi Laha Ku Lavekako Ha Kona Lezaku U Hlengela Nguvu: Jesu i fularele a titshomba hi kota ya wutireli. (Mat. 8:20) Yena i xumayele na a nga karali, ka zinwani zikhati i wa kala a pelelwa hi gambo. (Mar. 6:35, 36) Jesu i wa zi tiva lezaku i wa hi ni xikhati xi tsongwani kasi ku maha a ntiro wakwe. Kota lezi ‘a xikhati xi seleko xi nga koma,’ hinawu hi fanele ku tirisa a xikhati, ntamu, ni titshomba ta hina hi kutikarata kota lezi Jesu a mahileko. — 1 Kor. 7:29-31.
9 A maKristu ya zana ga malembe go sangula ma wa hi vatireli vo humelela hakuva ma wa gonzile ka Jesu. (Miti. 4:13) Hinawu ha zi kota ku tatisa khwatsi a wutireli ga hina loku hi pimanyisa a Mutireli wa hombe ka vontlhe lava va vileko kona. — 2 Tim. 4:5.