‘Nyika Wukustumunyu Go Mbhelela’ — Hi Ku Xumayela Lomu Ka Maprediyu

1. Xana a ku ‘nyika wukustumunyu go mbhelela hi ivangeli’ zi patsa yini?

¹ A ku fana na mupostoli Paule, hi xuva ku ‘nyika wukustumunyu go mbhelela hi ivangeli.’ (Miti. 20:24) Hikwalaho hi ti karatela a ku chikelela vanhu vo tala ni mahungu ya Mufumo hi laha zi kotekako ha kona xipanzeni xa hina. Lezo zi patsa a vanhu vo tala va hanyako lomu ka maprediyu. A zinwani zikhati, zi nga ha karata a ku chikelela lava va hanyako ka tiyindlu leto. Kota lezi lomu ka maprediyu ku hanyako vanhu vo tala nguvu ka wutshamu gi tsongwani, hi ngava ni malungelo yo tala ya ku hangalasa mahungu yo saseka kwalomo.

2. Hikuyini a ku tirisa wutlhari ni kuringanisela zi lavekako a xikhati lexi hi nyikako wukustumunyu lomu mapredwini?

² Hi kota ya ku chava a wugevenga ni tihanyi, a hlayo yi yako yi engeteleka ya maprediyu ma khotsiwa ma tlhela mava ni mugadi kutani makamara ya kugada. (2 Tim. 3:1, 2) A wurangeli ga prediyu gi nga hava ni nayo wa lezaku ku nga ngheni munhu a nga rambiwangiko. A murangeli wa prediyu a nga ha byekelela ku hi kombela lezaku hi huma ka prediyu, nguvunguvu loku a munwe wa vahanyi a sola. Hi kota ya lezo, za lisima a ku tirisa wutlhari ni kuringanisela.

3. Hi xihi a xikhati xa chukwana xa kuva hi tira lomu ka maprediyu, niku hikuyini?

³ Xikhati Xo Tira Hi Xona: A ku fana ni ka zipanze zinwani, i chukwana ku xumayela ka maprediyu ka xikhati lexi zi kotekako ku ngha a vahanyi va hi kona mitini. Hi nga ha kanakanelwa loku hi nghena ka xikhati lexi a vahanyi vo tala va nga handle. A vahuweleli vo tala va humelela kukumeni ka vanhu mitini hi xikhati xa ni gambo xikari ka viki zinwe ni hlikanhi wa Mulongiso ni Sonto. Loku hi tira lomu ka maprediyu na ga ha hi mixo nguvu, nguvunguvu kumbheleni ka viki, ha anda ku soliwa hi wurangeli ga wona.

4, 5. Hi nga zi kotisa kuyini ku nghena ka maprediyu yo kari lawa a tinyangwa ta wona ti tshamako na ti khotsilwe?

⁴ Ndlela Ya Ku Nghena: A vahuweleli a va faneli ku wulawula ni murangeli wa prediyu kutani vatiri vanwani na va nga se sangula a wutireli. Loku a prediyu legi gi khotsilweko gi hi ni interfone hi tlhelo ga seno handle ka nyangwa, ha zi kota ku yi tirisa kasi ku kuma wo kari a hi vumelelako ku nghena lezaku hi wulawula naye. Maringano ni lezi a prediyu gi tshamisileko zona, kuzilava hi nga gongonza tivati tinwani lomu ka prediyu lego anzhako ka ku wulawula ni munhu loyi a hi vumeleleko ku nghena. Hambulezo, ka maprediyu manwani, zi ngava chukwana a ku huma lahandle zonake hi tirisa a interfone kasi ku wulawula ni muhanyi munwani. Hi fanele ku tirisa wutlhari kasi hi boha lezaku vanhu vangani hi to wulawula navo hi ndlela leyi ka xikhati xalexi xa xinwe.

⁵ A vahanyi vanwani va nga ha tsakela lezaku u tekela ku va byela a kungo ga lienzo la wena hi interfone. Loku lezo zi maheka, ti tivekise hi ndlela ya wunghana. Vitana a nwinyi wa muti hi vito gakwe loku gi kumeka laha ka xaxameto wa mavito ka interfone. Hi magezu matsongwani, wula a mhaka ya wena. A vo kari va kumile wuyelo gi nene hi ku lera a xingheniso lomu ka bhuku Raciocínios hi kukongoma.

6. Zini hi faneleko ku maha a xikhati lexi hi tirako ka maprediyu ma nga ni vagadi?

⁶ Loku a prediyu gi hi ni mugadi loyi a nga hi vumeleliko lezaku hi tira lomu mitini, hi nga ha zama ku mu nyika wukustumunyu. A vagadi vo tala va zi ranza ku gonza mabhuku ya hina. Hi nga ha zi kota ku sangula a xigonzo xa Biblia hi tlhela hi xi fambisa kwalaha nyangweni. Loku a mugadi a hi vumelela a ku enzela a muhanyi wo kari loyi a kombisileko kutsakela, a kutala ka zikhati a hi zi nene a ku tizwa na hi tlhatlhekile a ku gongonza a tinwani tivati lomu ka prediyu.

7. Xini hi faneleko ku tshama na hi xi alakanya xungetano hi tipaxta ta hina ta simu?

⁷ Kucuwukeka Ni Xichawo: A ku famba ni tipaxta ta hombe ni to binza zi nga hi wonekelisa nguvu. Hikwalaho, hi nga ha alakanyela a ku tirisa a tipaxta ti tsongwani kutani ku nga teki ne paxta. A vahuweleli vo kari va chela a mabhuku lawa va to nyikela lomu ka xipaxtana zonake va khoma a Biblia mandleni kutani ku gi chela phaketini.

8. Xana a ntlawa wu fanele ku xaxametiswa kuyini kasi ku nyika wukustumunyu lomu ka prediyu?

⁸ I chukwana a ku nga hlengeletani hi mitlawa ya hombe, nguvunguvu lomu tinyangweni ta maprediyu kutani laha ku nyimako mimova, hakuva lezo zi ta koka kupima ka lava va hi wonako. Hi fanele ku ti wonela nguvu loku hi xumayela ka maprediyu lawa ma nga ka wutshamu legi ku nga ni wugevenga ga hombe. (Mav. 22:3) Hi xikombiso, a mipatswa yimbiri kutani yinharu ya vahuweleli yi nga ha tira ka xitezi xinwe, na ntlawa munwe wu zi kota kuzwa lowu munwani, kuzilava a xikhati lexi a ntlawa munwe wu gongonzako a livati lo kari, leyi yinwani na yi rinzela, va maha lezo hi kucicacicana.

9. Hi nga kombisisa kuyini xichawo, niku hikuyini lezo zi hi za lisima?

⁹ A xikhati lexi mu nghenako ka prediyu, phuhunani a zilato za nwina mu tlhela mu tiyiseka lezaku mu valile a livati la nyangwa. Hi ku kombisa a xichawo lexo, hi hungula a zigelo lezi zi nga wa ta maha a vahanyi va sola. Loku mu nghenile, tekelani a kuya ka elevador kutani ka xitezi lexi mu lavako a ku tira ka xona, na ku nga hi ku djikadjika laha nyangweni. Lezi zi ta mbheta kukanakana ka lava va hi wonako.

10. Hi nga potsisa kuyini a ku vanga guwa handle ka xigelo lomu ka ma corredor?

¹⁰ Ka maprediyu yo tala, a guwa gi lanza a makhurisi ya corredor. Hikwalaho, mu nga tlakusi gezu a ku hunza laha ku lavekako lezaku mu zwiwa hi nwinyi wa muti. Loku u angula a muhuweleli munwani, releta a gezu ga wena, u wulawulela hasi ni hi ndlela yi nene kasi zi nga vuxi kukanakana. Kasi a vahanyi va nga vangelwi guwa, a vahuweleli vo kari vo cicisana a makhati ya ku wulawula; loku lava va sangula ka magumo lawa ya corredor, a vanwani va sangula hi seniyani kala va tlhanganyisa a xitezi lexi xi tiriwako, wutshanwini ga ku gongonza a tivati hi kulanzelana ka tona lomu ka corredor. Tlhatakumbiri, a ku gongonza livati hi ntamu zi nga dzukisa lava va nga lomu nzeni.

11. Zini zi nga vunako loku hi gongonza a livati li nga ni xibhoxwana?

¹¹ Loku a livati li hi ni xibhoxwana lexi a nwinyi wa muti a xi tiriselako ku wona loyi a gongonzako, wena ni munghana wa wena yimani hi ndlela ya kuva mu woniwa hi wihi ni wihi a mu hlomelako. Cuwuka hi kukongoma laha ka xibhoxwana lexo, loku u pola lezaku ku na ni wo kari a hlomelako, mu lose hi matsenya u tlhela u sangula mhaka ya wena. Loku a munhu loye a wutisa aku, ‘Hi wena mani?’ u nga ha zi wona na zi hi chukwana a ku wula vito ga wena ni ga loyi u nga naye. Hizalezo a nwinyi wa muti a nga ha tlhatlheka a ku vulula livati. Loku a nga vululi, u nga ha simama ni mhaka ya wena laha nyangweni.

12. Xana hi nga potsisa kuyini zikarato a xikhati lexi hi siyako mabhuku lomu ku nga hiko na vanhu?

¹² Loku Ku Nga Hi Na Munhu: A zigelo zi tolovelekileko za kusola ka varangeli va maprediyu hi lezaku va tshama hi ku rolela mabhuku laha tsenzeleni. A mabhuku lawa ma tlhomekiwako laha livatini ma nga hawa hi kuolova zonake ma maha chaka. Hikwalaho, a bhuku gihi ni gihi gi siyiwako lomu ku nga hiko na munhu gi fanele ku tlhomekiwa gi mbhelela lezaku gi nga woneki seno handle.

13. Zini hi faneleko ku maha loku a nwinyi wa muti a hi zangarela?

¹³ Loku A Venyi Va Miti Va Hi Zangarela: Loku hi kuma a nwinyi wa muti loyi a hi zangarelako kutani a byekelelako ku vitana a muwoneleli wa prediyu, i chukwana ku suka ka xitezi lexo, hi wuya ka xikhati xinwani. Ka ziyimo zinwani, ku ngava wutlhari a ku huma ka prediyu kasi ku potsa a ku holovisana ni muwoneleli. Hambu loku a nwinyi wa muti a nga hi byeli hi kukongoma lezaku a nga ha lavi ku enzelwa kambe, zi wa tava chukwana a ku tsala a nombora ya kona kota muti wu nga laviko ku enzelwa lezaku yi hlayisiwa zinwe ni Cartão de Mapa de Território. A ku fana ni miti yinwani yi nga laviko ku enzelwa, a miti leyo yi fanele ku enzelwa loku ku hunzile xikhati xo kari kasi ku tiva a kuranza ka nwinyi wa muti.

14, 15. Zini hi faneleko ku maha loku a muyimeli wo kari wa prediyu a hi byela lezaku ‘humani’?

¹⁴ Loku Mu Byeliwa Lezaku ‘Humani’: Loku mu kari mu tira ka prediyu zonake a muwoneleli, mugadi, mutiri, kutani wihi ni wihi a yimelako a vatiri va prediyu a mu byela lezaku ‘humani,’ i chukwana a ku tekela ku vumela. Hi tindlela tontlhe, hi lava ku potsa a kuholovisana loku ku zi kotako a ku hi yisa hubyeni ya kulamula kutani ku vitanelwa maphoyisa. A kutala ka zikhati, a vatiri va prediyu a va vengi a Timboni ta Jehova kanilezi vo maha a ntiro wabye.

¹⁵ Ka zikhati zo kari, loku a munhu wo kari a yimelako prediyu a mu byela lezaku ‘humani,’ mu nga ha zi kota a ku mu tlhamusela a xigelo xa ku va enzela ka nwina hi ndlela ya yi nene ni ya xichawo. (1 Ped. 3:15) Ha gi tiva a wutihlamuleli legi a nga nago ga ku xalalisa a vahanyi ni ku vikela a prediyu. Kuzilava i ta mu vumelela a kuva mu simama nzeni ka prediyu. Kanilezi loku a nga vumeli, humani na mu nga soli. Loku a xiyimo xi vumelela, mu nga ha kombela a kuta na mu siya mabhuku hi zikhati ni zikhati laha nyangweni kutani kwarutwini ya kuhlaza. (Kol. 4:6) A muwoneleli wa ntiro i fanele ku tivisiwa a khati ni khati zi mahekako lezo.

16. Zini hi faneleko ku maha loku a zikarato zi simama a xikhati lexi hi ti karatelako ku tira lomu mapredwini?

¹⁶ Kuzilava loku ku hunzile a xikhati xo kari, a vahuweleli va nga ha ringeta hi wutlhari a ku tira kambe lomu ka prediyu lego. Hambulezo, loku a zikarato zi simama, a madota ma fanele ku kombela xivuno ka hofisa ya ravi wutshanwini ga ku a vahuweleli va ringeta ku lulamisa a zikarato lezo ha voce. Loku a vahuweleli va nga zi koti ku tira lomu ka prediyu, ku nga ha mahiwa mizamo yo kuma a vahanyi va kona hi tindlela tinwani, to kota ku nyika wukustumunyu hi telefone kutani ku va tsalela mapapilo. A vahuweleli vo kari va nyika wukustumunyu lomu maruweni, laha mahlweni kutani kusuhani ni prediyu lego hi xikhati xa ni mixo kutani xa ni gambo laha a vanhu va tolovelako ku ngha vaya ntirweni kutani ku wuya kaya.

17. Hikuyini zi hi za lisima a ku nyika wukustumunyu lomu ka maprediyu?

¹⁷ A kugumesa ka mafambisela lawa ya kubiha ku ta chikela lokuloku. Ntsena lava va vitanako a vito ga Jehova hi vona va to hanyiswa. ‘Xana va ta mu vitanisa kuyini loyi va nga kholwangiko kakwe ke? Ni kambe, va ta kholwisa kuyini ka yena loyi va nga zwangiko timhaka takwe ke?’ (Rom. 10:13, 14, Tradução do Novo Mundo) A vanhu vo tala va ti ‘yimiseleko wutomi ga pinzukelwa’ va hanya lomu ka maprediyu. (Miti. 13:48) Loku hi hi vanhu vo tlhariha ni vo ringanisela, hi nga zi kota a ku va chikelela ni mahungu yo saseka.