A zvivangwa zvontlhe zvi wa hi ni kurula ni wumun’we a cikhati zvi nga fumiwa hi Nungungulu

Hikuyini hi lavako a Mufumo wa Nungungulu?

Kusanguleni ka matimu ya vanhu, a Muvangi wa hina, loyi a vito gakwe ku nga Jehovha, ku wa hi yena yece a nga hi Hosi. I wa fuma hi ndlela ya lirandzo. I no maha a muti wo saseka — a Jardhim ya Edheni — kasi a vanhu va hanya kona. A tlhela a va nyika zvakuga zvo tala. A ku hundza lezvo, i va nyikile a ntiro wa lisima kasi va wu maha. (Genesisi 1:28, 29; 2:8, 15) A vanhu na va hanyile hi kurula loku va wa no simama va fumiwa hi wuhosi ga Nungungulu ga lirandzo.

Hi Adhamu a nyikiwako a handzu hi Evha lowu wu nga betelwa. — A vanhu vo sangula va no ala Nungungulu kota Mufumeli wabye

A Bhibhiliya gi wula lezvaku a ngilozi yo kari yo hluwuka, leyi yi nga guma yi vitaniwa ku hi Sathani a Mulumbeti, yi no vhukela a fanelo ya Nungungulu ya ku fuma. Yi no wula lezvaku a vanhu va wa ta tsaka loku va hanya na va nga rangelwi hi Nungungulu kutani ku fumiwa hi yena. Leci ci nga tsakisiko hi ku a vapswali va hina vo sangula, Adhamu na Evha, va no landzela Sathani, va vhukela Nungungulu. — Genesisi 3:1-6; Kuvhululelwa 12:9.

Kota lezvi Adhamu na Evha va nga ala Nungungulu kota Mufumeli wabye, va no luza a muti wabye wa Paradhise ni kutsumba ka ku hanya kala kupindzuka na va mbhelele. (Genesisi 3:17-19) A ciboho cabye ci no khumba ni vana vabye. A Bhibhiliya gi wula lezvaku kota lezvi Adhamu a wonhileko, ‘a ciwonho ci no nghena tikweni . . . ni kufa ku tile hi kota ya ciwonho’. (Va Le Roma 5:12) A ciwonho ci tlhela ci pswala cin’wani cikarato ca hombe: ‘A mun’we a fumela mun’wani a mu yisa khombyeni.’ (Mutshawuteli 8:9) Hi magezu man’wani, loku a vanhu va ti fuma zvi vhuxa zvikarato.

KUSANGULA KA MIFUMO YA VANHU

Hi Nimrodhe a nga nyima hi ndlela ya matshandza. Le ndzhako kakwe na ku hi ni vanhu va akako. — Nimrodhe i no vhukela Jehovha

A hosi yo sangula yi kumbukiwako lomu ka Bhibhiliya hi Nimrodhe. Niku Nimrodhe i no vhukela a wuhosi ga Jehovha. Kusukela a masikwini ya Nimrodhe, a vanhu lava va nga ni wuhosi va gi tirisa hi ndlela ya hava. Kwalomu ka 3000 wa malembe ma hundzileko, a Hosi yo tlhariha Solomoni yi wulile lezvi: ‘Ndzi no wona mihloti ya lava va xanisiwako, na va nga hi na mutangalisi; a vaxanisi vabye va wa hi ni tihanyi, kanilezvi vona va wa nga hi na mutangalisi.’ — Mutshawuteli 4:1.

Ni nyamutlha zva ha tshamisile zvalezvo. Hi 2009, a bhuku ga Tlhangano wa Matiko gi wulile lezvaku zviya zvi woneka khwatsi lezvaku “a cin’we ca zvilo zvi vangako a zvikarato zva vanhu” mifumo ya kubiha.

CIKHATI CA KU MAHA COKARI!

A tiko gi na ni cilaveko ca vafumeli va va nene na va fuma hi ndlela ya yi nene. Ku nga lezvi a Muvangi wa hina a hi tsumbisako!

Mifota: A wuyelo ga mifumo ya vanhu. 1. Wasati wa le Azia a nga tshama laha ruweni ga chaka na khomile a cin’wanana cakwe ci rilako. 2. Wanuna a khosaheleko a babyako a etleleko mubhedhini wa cipitali. 3. Masochwa ma bako zvibhamu yimpini. 4. Vanhu va zangarileko va mahako citereka. 5. Wasati ni nhanyana wakwe va nyimileko hi le handle ka yindlu yabye va wona a vhidro ga livati gi pandzekileko. 6. I dhoropa gi nga ni miphayiphi yi humako musi ni tifiyu ta magezi. — Hambu hi mifumo leyi ya yi nene nguvhu a yi zvi koti a ku mbheta a zvikarato zva vanhu

Nungungulu i yimisile a Mufumo, kutani wuhosi, lowu wu to vhaleta a mifumo yontlhe ya vanhu, ‘wona wu ku tsondzoma kala kupindzuka’. (Danieli 2:44) A Mufumo lowo, hi lowu a vanhu va tsandza vahlayi va wu khongelelako. (Matewu 6:9, 10) Kanilezvi Nungungulu a nga ta fuma hi yece Mufun’weni lowo. I yimisile a wokari loyi a tshukileko a hanya laha misaveni lezvaku ava Hosi. Himani loyi a hlawulilweko hi Nungungulu?