A Kuxumayela Ka Hi Tiyisa Hi Tlhelo Ga Moya
1. Hi vunekisa kuyini hi ntiro wa kuxumayela?
1 A ku hlengela nguvu ntirweni wa kuxumayela za hi tiyisa hi tlhelo ga moya zi tlhela zi engetela a litsako la hina. Lisine lezaku a xigelo xo ranga xi hi mahako hi xumayela ku tsakisa Jehova. Hambulezo, hi ku ingisa a xileletelo xa ku “kanela a mhaka,” ha amukela makatekwa ya Jehova ni ku vuneka hi tindlela tinwani. (2 Tim. 4:2; Isa. 48:17, 18) Makunu-ke, xana a kuxumayela ka hi tiyisa ni ku hi nyika litsako hi ndlela muni?
2. Xana a wutireli gi hi tiyisa hi tindlela muni?
2 Ha Tiyiswa Ni Ku Katekiswa: A kuxumayela ka hi kuca a ku yisa kupima ka hina ka makatekwa ya Mufumo na ku nga hi ka zikarato za xikhati lexi. (2 Kor. 4:18) A ku tlhamusela a tigonzo ta Biblia zi tiyisa a kukholwa ka hina ka zitsumbiso za Jehova ni ku engetela a kutsakela ka hina a zinene. (Isa. 65:13, 14) A xikhati lexi hi vunako vanwani a ku kula hi tlhelo ga moya kasi va ‘ngavi va tiko,’ hi tiyisa a kutiyimisela ka hina wutsumbu ka ku simama na hi hambene ni tiko. — Joh. 17:14, 16; Rom. 12:2.
3. Xana a wutireli ga hina gi hi vunisa kuyini a ku hlakulela a matshamela ya wuKristu?
3 A ku hlengela wutirelini za hi vuna a ku hlakulela a matshamela ya wuKristu. Hi xikombiso, a ku ti karatela ku “ti maha nanza ga vontlhe” zi hi vuna a kuva ni kutikoramisa ka hombe. (1 Kor. 9:19-23) A xikhati lexi hi wulawulako ni lava va ‘xanisekako na va hangalakile, kota tiyivu ti nga hava murisi,’ hi byekelela a ku gonza a ku zwela wusiwana ni ku khatala. (Mat. 9:36) Hi gonza a kutimisela a xikhati lexi hi lihlaza-mbilu hi yimisanako ni kungakhatali kutani kukanetwa. A kutsaka ka hina ka engetelwa a xikhati lexi hi ti nyiketelako lezaku hi vuna vanwani. — Miti. 20:35.
4. U ti zwisa kuyini hi wutireli?
4 Hakunene xikatekiso a kuva ni wutireli legi gi dumisako ntsena Loyi a fanelwako hi wukhozeli ga hina! A wutireli ga hi tiyisa. Gi neha makatekwa yo tala ka lava va ti nyiketelako hi mbilu yontlhe kunyikeni ka wukustumunyu go mbhelela hi ivangeli. — Miti. 20:24.