Simama ku hiseka wutirelini ga wena

INYAMUTLHA, a ntiro wa ku xumayela a mahungu yo saseka hi wona wa lisima nguvu ka yontlhe yi mahiwako misaveni. Kota nanza ga Jehova, handle ko kanakana u zi wona kota wudzunzo a ku hlengela ntirweni wa ku maha vapizani. Hambulezo, a wu kanakani lezaku a maphayona ni vahuweleli va tshuka va kumana ni zikarato zi lwako ni kuhiseka kabye wutirelini.

A vahuweleli vo kari za va karatela ku kuma munhu wo koka naye bhulo wutirelini ga muti ni muti. Hi lisine, a miti yo tala kuzilava ni munhu a nga kona. Loku va mu kuma nwinyi wa muti, kuzilava a nga kombisi kukhatala hi mahungu ya Mufumo niku a munwani kuzilava i tlhela a va vukela. A vahuweleli vanwani va na ni xipanze xa hombe xi pswalako mihanzu, hambulezo va karateka hi ku chava ku nga tshuki va xi mbheta. Niku a vokari lomu bandleni va na ni malembe na va xumayela — yo tala nguvu ku hunza lezi va nga zi rinzele — hikwalaho va mbhelile ntamu.

Xana hi fanele ku hlamala hi lezi vontlhe a vanhu va Jehova va kumanako ni zikarato lezi zi nga hungulako a kuhiseka kabye ntirweni wa kuxumayela? Ahihi. Kona hi nga rinzela kuva zi hi olovela ku xumayela a mahungu ya lisine ya wutomi ya Nungungulu na hi hi tikweni legi gi fumiwako hi “loyi wa kubiha,” Satani Diabolus ke? — 1 Joh. 5:19.

Kani u yimisana ni zikarato muni kuxumayeleni ka mahungu yo saseka, tiyiseka lezaku Jehova a nga ku vuna ku zi hlula. Kanilezi, zini u nga mahako kasi ku engetela kuhiseka ka wena wutirelini ga wuKristu ke? A hi kambisiseni a mawonela yo kari ma nga hi vunako ku zi hlula.

VUNA VAHUWELELI VASWA

Lembe ni lembe, ku bapatizwa makume ya mazana ya Timboni tiswa ta Jehova. Loku ku hi lezaku wa ha hi ku ti hendleleta ka Nungungulu hi kubapatizwa hi mati, handle ko kanakana u ta tsaka hi ku gonza ka lava ku nga kale na va xumayela. Niku loku u hi ni malembe na u hi muhuweleli wa Mufumo, zi wa nga tava zi nene a ku gonzisa a vahuweleli vaswa ke?

Jesu i wa zi tiva lezaku a vapizani vakwe va lava kongomiso kasi kuva vavangeli va humelelako, niku i lo va komba lezi a ntiro lowo wu nga fanele ku mahiswa zona. (Luka 8:1) Nyamutlha kambe ku na ni xilaveko xa ku gonzisa vanwani lezaku va maha vahuweleli va bhinzulako.

A hi faneli ku alakanya lezaku a muhuweleli muswa i ta kuma wutlhari ga ku gonzisa hi kuya wutirelini basi. I na ni xilaveko xa ku gonzisiwa hi mugonzisi wa liranzo. A gonziselelo leyo yi nga patsa ku komba a muhuweleli loyi wa muswa a ndlela ya (1) ku longisela ni ku vuxeta xingheniso, (2) ku sangula bhulo ni nwinyi wa muti kutani muhunzi wa ndlela, (3) ku nyikela bhuku, (4) ku khatalela munhu a kombisileko ku tsakela, ni (5) ku sangula xigonzo xa Biblia. Kuzilava ku tava ni mihanzu yi nene loku a xigonzani lexo xi wona xi tlhela xi tekelela a mamahela ya loyi a xi vunako wutirelini. (Luka 6:40) Handle ko kanakana a muhuweleli muswa i ta tsaka loku ava ni munhu loyi a to mu ingisela ni ku mu vuna loku zi laveka. A muhuweleli loye wa muswa i ta vuneka kambe loku a dzunziwa ni ku nyikwa mawonela ma vunako. — Mutsh. 4:9, 10.

BHULISANA NI MUVANGELI-KULORI WUTIRELINI

U nga ha ti karata hi tindlela tontlhe kasi ku bhula ni vanhu mitini, kanilezi ka masiku yo kari a bhulo go tsakisa nguvu ka wontlhe wutirelini ga wena ku ngava legi u gi mahako ni loyi u tirako naye basi. Alakanya lezaku Jesu i rumele a vapizani wakwe hi “vambiri vambiri” kuxumayeleni. (Luka 10:1) Na va kari va tira zinwe, va wa ta kucana ni ku vunana. Hikwalaho, a xikhati lexi hi xi mbhetako ni makholwa-kulori wutirelini xi hi nyika lungelo gi nene ga ku tiyisana. — Rom. 1:12.

Mu nga bhula hi yini? Xana a munwe wa nwina i na ni tshango ga giswa go tiyisa hlana? Ku na ni mhaka yo kari yo tsakisa u yi kumileko ka xigonzo xa wena wutsumbu kutani xa ngango? U tiyisilwe hi zokari u zi zwileko mitlhanganweni ke? Kuzilava i siku go sangula u tirako ni muhuweleli loye. Wa zi tiva ku i gonzisile kuyini lisine? Xini xi nga mu maha a kholwa lezaku leyi i hlengeletano ya Jehova? Malungelo muni kutani matshango a vileko nawo? Kuzilava u nga ha mu hlawutela a matshango ya wena. Kani hi wihi hlamulo hi wu kumako wutirelini, a ku tira ni munwani zi hi nyika lungelo gi nene ga ku “akana.” — 1 Tes. 5:11.

CHUKWATISA A XIGONZO XA WENA XA BIBLIA

Kasi hi simama ku hiseka wutirelini za lisima kuva hi ti mahela longoloko wu nene wa xigonzo hi tlhela hi wu lanzela khwatsi. A “nanza gi tsumbekileko ni go tlhariha” gi humesa mahungu yo tala yo hambanahambana ya xigonzo. (Mat. 24:45) Hikwalaho, ku na ni timhaka to tsalangana leti u nga ti tirisako ka xigonzo xa wena kasi ku kuma kuga ka moya. A hi woneni mhaka yinwe ya lisima u nga yi tirisako xigonzweni xa wena: Hikuyini a ntiro wa ku xumayela a Mufumo wu nga wa lisima nguvu? A kwadru legi gi longolokako ni nzima leyi gi hi nyika zigelo zi tsongwani.

A ku kambisisa a timhaka ti nga ka kwadru legi zi nga ku kuca ku simama u xumayela hi kuhiseka. Zi ngo yini loku wo zi mahela makungo ya xigonzo u wona lezaku zigelo zingani u nga engetelako ka xaxameto lowu? Hi kulanzela, ehleketa hi zigelo lezo ni Mitsalo leyi yi zi seketelako. A ku maha lezo handle ko kanakana zi ta engetela a kuhiseka ka wena wutirelini.

VUMELA MAWONELA YA VANWANI

A hlengeletano ya Jehova yi tshama hi ku hi nyika mawonela kasi ku hi vuna ku chukwatisa a wutireli ga hina. Hi xikombiso, ahandle ka ntiro wa hina wa muti ni muti, hi nga nyika wukustumunyu hi mapapilo, telefone, ku xumayela lomu maruweni kutani ka matshamu manwani ku fambafambako vanhu, ni ku bhulela vanhu a mahungu yo saseka hi xitshuketi ni ka zipanze za mabhinzu. Hi nga ha maha malulamiselo kasi ku nyika wukustumunyu ka xipanze xi nga tiriwiko nguvu.

Xana wa amukela mawonela lawo hi mandla mambiri? U tshuka u ringisa a yokari ya wona ke? A votala va mahileko lezo va lo tala hi litsako hi ku wona a mihanzu ya kona. Wona zikombiso zinharu.

A xikombiso xo sangula xi yelana ni mihanzu ya nchumu wu kumbukilweko ka tinzima ta Wutireli ga Mufumo xungetano hi ku sangula zigonzo za Biblia. Zi lo kuca makabye a vitwako April lezaku a sangula xigonzo ni vatiri-kulobye va vanharu. I lo hlamala a tlhela a tsaka laha vontlhe va vanharu va nga vumela va tlhela va sangula kuta mitlhanganweni ya bandla.

A xikombiso xa wumbiri xi yelana ni ku nyikela marevista ya hina. Hita na hi kuciwa ku hlota vanhu va byekelelako ku tsakela tinzima to kari ta marevista ya hina. A muwoneleli wo kari wa xipanze le Estados Unidos i lo bika lezaku i kombile nzima ya Despertai! yi wulawulako hi maroda ka varangeli va zitolo zontlhe za maroda ka xipanze xo kari. Yena ni sati wakwe va lo tlhela va famba ni nzima “Os desafios de ser médico” ka 100 wa tihofisa ta vadokodela xipanzeni lexo. I ngalo: “A maenzo lawo ma hi vunile nguvu ku ti tivekisa ni ku nyikela mabhuku. Anzhako ka ku maha wunghana ni vanhu vo kari ka matshamu lawo, zi lo hi olovela ku bhulisana navo hi kukhanzakanya.”

A xikombiso xa wunharu xi yelana ni ku nyika wukustumunyu hi telefone. A makabye wo kari wa xisati a vitwako Judy i lo tsalela a tsinza ga misava yontlhe kasi ku kombisa kubonga hi kuva a kucilwe ku nyika wukustumunyu hi telefone. I lo bika lezaku a mamani wakwe wa 86 wa malembe, loyi a nga hi ni zikarato zo tala za lihanyo, i wa tirisa nguvu lulamiselo legi ga ntiro wo basa niku i wa kuma litsako la hombe la ku fambisa xigonzo hi telefone ni wasati wa 92 wa malembe!

A mawonela ya wukustumunyu lawa ma nga ka mabhuku ya hina ma tira hakunene. Ma tirise! Ma nga ku vuna ku simama u hiseka wutirelini ga wena.

TI VEKELE MIXUVO ZI KOTEKAKO KU YI TATISA

A kuhumelela ka hina wutirelini a ku pimiwi hi ntsengo wa mabhuku hi nyikelako, zigonzo za Biblia hi fambisako, kutani vanhu hi va vunako ku maha malanza ya Jehova. Hi xikombiso, vanhu vangani lava Noa a nga va vuna ku maha vakhozeli va Jehova ahandle ka ziro za ngango wa yena wutsumbu? Hambulezo, ive muxumayeli wo humelela. Lexi xi lavekako ku tirela Jehova hi kutsumbeka. — 1 Kor. 4:2.

A vahuweleli vo tala va Mufumo va polile lezaku kasi ku engetela kuhiseka kabye hi ntiro wa kuxumayela, va fanele ku ti vekela mixuvo zi kotekako ku yi tatisa. Yi ngava mixuvo muni? Ku na ni mawonela matsongwani ka kwadru legi laha reveni.

Na u vuniwa hi Jehova, hlota tindlela ta ku maha lezaku a ntiro wa wena wu nanziha wu tlhela wu pswala mihanzu. Loku u zi kota ku tatisa mixuvo ya wena, u tava ni litsako la ku tiva lezaku u maha zontlhe u zi kotako kasi ku xumayela a mahungu yo saseka.

Lisine lezaku a ku xumayela mahungu yo saseka za tshuka zi nonoha. Hambulezo, u nga maha xokari kasi uva muhuweleli wo hiseka wa Mufumo. Tiyisana hi mabhulo ma akako ni loyi u xumayelako naye; ti mahele longoloko wu nene wa xigonzo u tlhela u wu lanzela khwatsi; tirisa a mawonela ya nanza gi tsumbekileko; ti vekele mixuvo zi kotekako ku yi tatisa. Xa hombe ka zontlhe, alakanya lezaku Nungungulu i ku nyikile lungelo ga hombe ga ku xumayela mahungu yo saseka kota Mboni yakwe. (Isa. 43:10) A hi lona litsako u to li kuma loku u simama ku hiseka wutirelini ga wena!