Ndlela Yo Gonzisa Lava Va Ha Hiko Vaswa A Ku Xumayela
1. U ti zwisile kuyini ka siku legi u nga sangula hi gona a ku hlengela wutirelini?
1 Xana wa gi alakanya a siku legi u nga sangula a ku xumayela hi muti-ni-muti? Kuzilava u wa chava nguvu. Loku ku hi lezaku u wa tira ni mugonzisi wa wena wa Biblia kutani munwani muhuweleli, handle ko kanakana u tsakile hi ku vuniwa hi yena. Zalezi u nga mutireli a toloveleko ntiro, u ka xiyimo xa ku vuna vanhu va vaswa kuxumayeleni.
2. Xana a vahuweleli vaswa va fanele ku gonza yini?
2 A vahuweleli vaswa va na ni xilaveko xa ku gonza a ku sangula mabhulo ni nwinyi wa muti, ku tirisa a Biblia zalezo va sangulako ku wulawula naye, ku maha maenzo yo wuyela, ku sangula ni ku fambisa a zigonzo za Biblia. Ku nga hi lezo ntsena, va fanele ku gonza a ku nyika wukustumunyu hi tindlela to hambanahambana to kota ku kustumunya lomu maruweni ni matshanwini ya ku xavisela ka wona. Wa zi kota ku va vuna a ku chukwatisa ka tindlela leto hi xikombiso xa wena ni mawonela lawa u va nyikako.
3. Xana hi nga va vunisa kuyini vanwani hi xikombiso xa hina?
3 Gonzisa Hi Xikombiso: Jesu i lo komba a vapizani vakwe a ndlela yo xumayela. (Luka 8:1; 1 Ped. 2:21) Loku u maha malulamiselo yo tira ni muhuweleli muswa, longisela a xingheniso xo olova lexi a muhuweleli loye a to zi kota ku xi pimanyisa, ku nga hava xingheniso xa xikombiso xi nga lomu ka ginwe ga mabhuku ya hina. Anzhako ka lezo, mu byele lezaku u ta sangula hi wena a ku wulawula ka muti wunwe kutani yimbiri yo sangula kasi a muhuweleli loye azwa lezi u to wula. Loku mu suka ka muti wunwe muya ka wunwani, u nga ha wutisa a muhuweleli loye a ku i xi wonisa kuyini a xingheniso xa wena. Lezo zi ta mu vuna a ku wona lisima la ku tira ni vanwani wutirelini zi tlhela zi mu hehukisela a ku vumela mawonela lawa u to mu nyika anzhako ka xingheniso xakwe.
4. Hi nga mu vunisa kuyini a muhuweleli muswa anzhako ka ku ingisela a xingheniso xakwe?
4 Nyika Mawonela: Jesu i tlhelile a nyika vapizani vakwe a zileletelo xungetano hi maxumayelela. (Mat. 10:5-14) U nga vuna a muhuweleli muswa hi ndlela yaleyo. Loku xi hi xikhati xakwe xa ku wulawula, mu ingisele khwatsi. Zonake anzhako ka ku suka ka muti wo kari, u nga tsiki a ku mu dzunza hi lisine, hambu loku u wonile lezaku i fanele ku chukwatisa zo kari ka xingheniso xakwe. Na u nga se mu nyika a mawonela ya wena, u nga ha hlola lezaku i chukwatisile a xingheniso xakwe ka muti wu lanzelako ke. Kuzilava kuchava ku nga mu maha. Alakanya kambe lezaku a vahuweleli a va na wuzikoti go fana, niku a kutala ka zikhati ku na ni tindlela to tala ta ku maha a nchumu wunwe na ti lulamile tontlhe. — 1 Kor. 12:4-7.
5. Xana hi nga wula yini laha hi nyikako mawonela na hi nga kombeliwangi?
5 Ka zikhati zo kari a muhuweleli muswa i ta kombela a mawonela ya wena. Kanilezi, loku a nga kombeli, sangula hi wena u mu vuna. Xana lezo zi nga mahisiwa kuyini hi wukheta? A vahuweleli vo kari va buvileko va wutisa lezi ntsena, “Nzi nga ku vuna hi xo kari?” kutani ku “U zi wonisile kuyini?” A mahela ginwani ku wula lezi, “A xikhati lexi nzi nga ha hi muhuweleli muswa zi wa nzi karatela nguvu a ku . . . , kanilezi nzi vunilwe hi. . . . ” Zikhati zinwani za vuna a ku kambisisa zinwe a bhuku Raciocínios. Kasi zi nga mu popi, mu nyike a mawonela ka nchumu wunwe ntsena ka xingheniso xakwe.
6. Xungetano hi wutireli, xana ‘a xiketse xi lotiwa hi xiketse’ hi ndlela muni?
6 A Xiketse Xi Lota Xiketse: Timote, a muVangeli wo buva, i lo kuciwa hi Paule a ku simama a ti nyikela gontlhe wutsumbu gakwe kugonziseni ni kuya mahlweni. (1 Tim. 4:13, 15) Hambu loku ku hi lezaku ka hunza malembe cima u nga sangula kuya wutirelini, a wu faneli ku nyima a ku zama a ku chukwatisa a wuzikoti ga wena. Gonza hi ka vahuweleli lava u xumayelako navo, hambu lava va nga buvangiko a ku fana na wena wutirelini, u tlhela u hlota tindlela ta ku vuna vanwani hi matsenya, nguvunguvu lava va ha hiko vaswa, a ku maha vatireli va nene va mahungu yo saseka. — Mav. 27:17.