Gonza ka vahuweleli va buvileko

Hi bonga nguvu a kuva ni vahuweleli vo buva lomu bandleni. A vokari vata na va tirela Jehova hi malembe yo tala. A vanwani kuzilava va kumile wutlhari wutirelini ka malembana yalawa ya kuta seno. A vahuweleli lavo va wonile lezi Jesu a kongomisisako zona a bandla ga wuKristu masikwini lawa yo gumesa hi ku anzisa a ntiro wabye wa ku gonzisa ni ku maha vapizani. (Mat. 28:19, 20) Hi ku hlengela wutirelini, va amukela “a ntamu lowu wa hombe” a xikhati lexi va kumanako ni zikarato ni ziringo. (2 Kor. 4:7) Ku na ni zotala za ku zi gonza ka vahuweleli lavo va buvileko. Loku va kuma lungelo, va tsaka nguvu hi ku gonzisa vanwani lezi vona wutsumbu va gonzileko. (Tis. 71:18) Hikwalaho, hi fanele hi hlota malungelo ya ku gonza ka vona. Hi nga zi mahisa kuyini lezo?

Wutirelini: Kasi va humelela wutirelini, a vahuweleli va vaswa kutani va nga ni wutlhari gi tsongwani va fanele ku gonzisiwa. Va nga gonza zotala hi ku cuwukela lezi a vahuweleli va buvileko va mahisako zona a wutireli gakwe. (Wona a nzima “Simama ku hiseka wutirelini ga wena” yi nga ka Murinzeli wa 15 ka Fevereiro wa 2015, nzimana ya wunharu hasi ka xihlokwana xa mhaka “Vuna vahuweleli vaswa.”) U vunekisa kuyini hi ku tira ni vanhu va tshamela lego wutirelini?

U nga bhula ni muhuweleli wo buva lezaku mu tira zinwe wutirelini ke? Loku a muhuweleli loye a hi mubabyi, kuzilava u ngata na u fambisa a xinwe xa zigonzo za wena za Biblia le kaya kakwe. Anzhako ka xigonzo, kombela mawonela ni wusungukati ka muhuweleli loye wo buva.

Ti nyike xikhati, u tshama navo: Tiva vahuweleli va buvileko hi ku tshama navo, mu bhula. Ramba munwe wabye wukhozelini ga wena ga ngango u tlhela u mu maha ziwutiso. Loku a muhuweleli loye a hi mubabyi, xana u nga maha malulamiselo ya kuya mu ya maha wukhozeli ga nwina ga ngango le kaya kakwe ke? Mu wutise ku i gonzisile kuyini lisine? Makatekwa muni a ti buzileko hi wona? Kuanza muni a ku wonileko lomu xipanzeni? Litsako muni a li kumako hi ku tirela Jehova?

Kombisa kuzwisisa ni kuringanisela ka ziwutiso za wena. A ku fana na hina hontlhe, a vahuweleli va kale va na ni zinyikiwo zo hambana wutirelini. (Rom. 12:6-8) A vokari va kulile hi tanga niku lezi zi nga hungula a ntsengo wa xikhati va zi kotako ku xi mbheta na va hi na hina. Hambulezo, hi nga gonza zotala ka vona hi kota ya xikhati lexi va xi mbhetileko na va tirela Jehova hi kutsumbeka.