Engetela wutlhari ga wena wutirelini — Gonzisa lava va nga vaswa
Hikuyini zi nga za lisima: A vapizani va vaswa va Jesu va fanele ku gonza ku gonga “zontlhe” lezi a layileko zona, lezi zi patsako ni ku gonzisa vanwani a lisine. (Mat. 28:19, 20) A kutala ka vanhu lavo va vaswa lisineni va sina va ringanelwe hi ku nghena Xikoleni xa Wutireli ga Nungungulu niku kuzilava va sina va xumayela hi xitshuketi ka maxaka kutani vanghana. Hambulezo, laha a kutsakela kabye ku yako ku kula mayelano ni lezi va gonzako va tlhela va tiva lezaku Jehova i lava ku a vanhu vontlhe vazwa a mahungu yo saseka, va nga ha kombisa lezaku va xuva kuya wutirelini. (Rom. 10:13, 14) Anzhako ka ku a vanhu lavo va vaswa va vumelelwe ku tira kota vahuweleli va nga bapatizwangiko, a gonziselelo yi nene yi ta va nyika kutiya-hlana a xikhati lexi va bako a zambo legi ga lisima kukuleni kabye ka moya. — Luka 6:40.
Mamahela ya kona:
• Vuna muhuweleli muswa lezaku a kuma mabhuku lawa a to ma lava kuxumayeleni ni kugonziseni. Mu kombe lezi u longiselisako zona a paxta ya wena ya simu, u tlhela u mu tlhamusela a kungo ga bhuku ginwe ni ginwani u nga nago.
• Hlawulani xingheniso xi nga ka Wutireli ga hina ga Mufumo, mu vuxeta zinwe. Kuca munhu loye wa muswa lezaku a maha xingheniso lexo hi magezu yakwe wutsumbu. Vuxetani ziyimo zi nga ka bhuku Escola do Ministério, phajina 82, lezi zi tolovelekileko xipanzeni xa nwina. Khanyisa a lisima la kutisasekisa ni maambalela ma kombisako xichawo. — 2 Kor. 6:3, 4.
• Nyika gonziselelo hi kutsongwani-kutsongwani. Komba a muhuweleli loye wa muswa a xipanze xa simu, u mu gonzisa a ndlela ya ku tsala timhaka ta wutireli ga muti ni muti. Mu kombe a ndlela ya ku tsala a mahungu ya vatsakeli. Mu gonzise ku tirisa a jw.org wutirelini zinwe ni xibhukwana Boas Novas para Pessoas de Todas as Nações. Mu gonzise ku hlakulela a kutsakela ka lava a va kumako. — 2 Kor. 3:6.
• Kombisa lihlaza-mbilu, u tlhela u mu dzunza. (Mav. 25:11) Nyika xikombiso xi nene. A kuhiseka ka wena ni kukhatala loku u ku kombisako zi ta mu vuna nguvu ka malembe ma tako.
Ka hweti leyi ringisa lezi:
• Famba ni xigonzani xa wena wutirelini ga muti ni muti ni ka tienzo to wuyela kutani zigonzo za Biblia. Loku u nga hi na xigonzani, ramba muhuweleli muswa lezaku mu tira zinwe.