Engetela wutlhari ga wena wutirelini — Hi kuva mutiri-kulori wa mu nene

Hikuyini zi nga za lisima? Jesu i wonile lisima la ku xumayela ni munghana. Hikwalaho laha a nga ruma a 70 wa vapizani vakwe lezaku va ranga mahlweni kakwe va xumayela, i va rumile hi vambiri vambiri. (Luka 10:1) A muhuweleli a tirako ni munwani a nga nyika xivuno xi lavekako loku a muhuweleli-kulori a kumana ni xikarato kutani loku a nga tiyiseki ku i ta mu hlamulisa kuyini nwinyi wa muti. (Mutsh. 4:9, 10) A nga mu byela lezi a zi tivako niku ka zikhati zo kari a nga ha nyika mawonela lawa ma to vuna loyi a tirako naye lezaku ava muvangeli wo bhinzula nguvu. (Maheb. 10:24) A nga tlhela a mu tiyisa hi mabhulo ma akako a xikhati va sukako ka muti vaya ka wunwani. — Fil. 4:8.

Mamahela ya kona:

• Demba ndleve a xikhati lexi a munghana wa wena a nyikako wukustumunyu. (Jak. 1:19) Loku ku leriwa mutsalo, lanzela lomu ka Biblia ga wena. Lezo zi ta ku maha uva ka xiyimo xi nene xa ku nyikela xivuno loku xi laveka.

• Tirisa wutlhari kasi ku tiva xikhati u nga wulako xo kari. (Mav. 25:11) Loku u hi ni muhuweleli wo kari ka xigonzo xa Biblia, kuzilava ka zikhati zo kari lezi u zi wulako zi nga ha bongiwa nguvu. Hambulezo, loku mu xumayela hi muti ni muti, a mutiri-kulori wa wena a nga ha tsakela ku u mu tsika a wulawula loku ku hi khati gakwe. Kunene, loku a hi muhuweleli muswa kutani ku ngha a nga zi tivi lezi a nga hlamulisako zona a xiwutiso xo kari kutani ku tsemiwa bhulo, kuzilava a nga tsakela xivuno xa wena. Kanilezi, kani u tira zinwe ni muhuweleli-kuloni hi muti ni muti, ka lienzo lo wuyela, kutani ka xigonzo xa Biblia, u nga mu tsemarisi, u nga mu tekeli bhulo, ge hambu ku nghenisa mhaka yinwani.

• Mu bhulele lezi u zi tivako. Ka zikhati zo kari, loku u hi ka xiyimo xa ku u nga mu nyika mawonela a muhuweleli loyi u tirako naye lezaku ava wo bhinzula nguvu wutirelini, u nga ali nawo. (Mav. 3:27) Ka xikhati xi faneleko, u nga ha sangula hi ku mu byela lezi: “U zi wonisile kuyini?” kutani ku “Nzi nga ku vuna hi mawonela yo kari?” hambu ku “Mina nzi tolovela ku zama ku mahisa lezi.” Tiva lezaku a vanwani lava ka zikhati zo kari va tsakelako ku amukela mawonela, va nga ha khunguvanyeka loku va byeliwa a xihoxo ni xihoxo va mahako.

Ringisa lezi ka hweti leyi:

• Anzhako ko tira sinwini ni wo kari, mu byele lezi a zi wulileko kutani zinwani, lezi zi mu mahileko ava mutiri-kulori wa mu nene.