U ngavi mupangalati ntsena
1. Hi nga mu pimanyisisa kuyini mupostoli Paule a xikhati hi tirako ni vanwani sinwini?
1 Mupostoli Paule i wa wona xikhati lexi a nga xi mbheta ni makholwa-kulobye kota xikhati xi nene xa ku tiyisana. (Rom. 1:12) Loku u tira ni muhuweleli munwani sinwini, wa lonzowota xikhati lexo kasi ku mu tiyisa ni ku mu vuna ke? Wutshanwini ga kuva mupangalati ntsena, hikuyini u nga mu bhuleliko lezi zi ku vunako a kuva muhuweleli a bhinzulako?
2. Hi nga tiyisisa kuyini a munghana wa hina wa simu niku hikuyini zi nga za lisima?
2 Mu tiyise: A vahuweleli vo kari va chava. Lezo zi nga ha woneka lomu nghoheni yabye kutani ku zwala hi gezu gabye. Hi nga va tiyisa hi ku va dzunza hi mbilu yontlhe. Hi tihi tindlela tinwani ta ku tiyisa vanwani ke? A muwoneleli wo kari a fambafambako i hlawutela munghana wakwe lezi yena a zi chavako ni lezi a tolovelako ku khongelisa zona kasi ku vuniwa ku hlula kuchava loko. A makabye munwani i wula lexi xi mu vunako ku mbheta kuchava hi magezu lawa: “Nzi sangula hi ku nwayitela. Makhati manwani nzi maha mukhongelo kasi ku vuniwa ku maha zalezo basi.” Xana xi kona xi ku vunileko ku mbheta kuchava wutirelini? Bhulela munghana wa wena wa simu.
3. Zini hi nga bhulelako a munghana wa hina lezi zi nga mu vunako a kuva a bhinzula nguvu wutirelini gakwe?
3 Mu bhulele mamahela: Xana ku na ni magezu kutani xiwutiso, lexi kuzilava xi wulawulako hi ximaho xa lomu xipanzeni xa nwina, u xi wonako na xi vuna nguvu ku sangula hi xona mabhulo? Xana wa bhinzula wutirelini hi kota ya magezu yo kari u nanzihisako hi wona xingheniso xa wena? Bhulela munghana wa wena. (Mav. 27:17) Loku mu kari mu famba ku ya maha lienzo lo wuyela, u nga wula a kungo ga wena ni lezi u alakanyelako ku ya mahisa zona. Anzhako ka xigonzo xa Biblia, u nga ha tlhamusela a ku hikuyini u hlawulileko mhaka yo kari, mutsalo, kutani magonzisela yo kari mayelano ni zilaveko za xigonzani lexo.
4. Hikuyini hi faneleko ku ti karatela ku vuna vavangeli-kulori?
4 A vavangeli va zana ga malembe go sangula va wa nga ti karateli ku vuna makholwa-kulobye ntsena. Kanilezi, va wa wona kambe a lisima la ku kucana ni ku tiyisana. (Miti. 11:23; 15:32) Mupostoli Paule i gonzisile Timote a tlhela a mu kuca ku bhulela vanwani lezi a zi gonzileko. (2 Tim. 2:2) Loku hi nga rivali ku vuna makholwa-kulori wutirelini, a hi engeteli litsako labye ni ku bhinzula kabye ntsena, kanilezi hi tlhela hi tsakisa Dadani wa hina wa le tilweni. — Maheb. 13:15, 16.