Gonzisa Hi Ndlela Yo Olova
1. Hi yihi a mhaka ya lisima kasi ku gonzisa khwatsi, hi kudlunyatekileko?
1 A ku olovisa zilo i mhaka ya lisima kasi ku gonzisa khwatsi. A ku alakanyela a ndlela leyi a Mugonzisi wa Hombe, Jesu, a nga gonzisa hi yona zi nga hi vuna a ku chukwatisa a wutlhari ga hina ga ‘kugonzisa.’ — 2 Tim. 4:2; Joh. 13:13.
2. Zini zi lavekako lezaku hi gonzisa hi kuolova, niku xana a kugonzisa loko ku na ni xivuno muni?
2 Wulawula Hi Ndlela Yo Olova: A Kanelo wa le Xitsungeni wu na ni timhaka to kari to eta nguvu ta ku cima ti wa nga se tshuka ti wulilwe hi munhu, kanilezi tontlhe ti kanelwe hi ndlela yo olova. (Mat., zip. 5-7) A zidlemo lezi zi nga kari zi ingisela Jesu “zi lo hlamala hi kugonzisa kakwe.” A vanyakasani va nga rumelwe a ku ya mu khoma va lo kuceka a ku wula vaku: “Cima a ku wulawulangi munhu kota gaya.” (Mat. 7:28, 29; Joh. 7:46) A hi na xilaveko xa ku tirisa magezu yo hlawuleka nguvu, yo karata, kutani mifananiso yo leha kasi ku kholwisa khwatsi vanwani a zinene. A zinene zi nga tlhamuselwa hi kudlunyatekileko hi ku tirisa a magezu yo toloveleka.
3. Hikuyini a vo kari va nga ha byekelelako ku tatela timhaka a vaingiseli vabye, niku xana lezo zi nga potsiswa kuyini?
3 Tiva A Lipimo: Jesu i wa alakanyela a vaingiseli vakwe kasi ku tiva a lipimo la mahungu a nga fanele ku kanela hi xikhati xinwe. (Joh. 16:12) Hi fanele ku tiva a ku cuwuka khwatsi ni ku tiva ku ti zwananisa ni zilaveko za lava hi wulawulako navo, nguvunguvu loku hi xumayela a maxaka, vanhu va ha hi ku sangulako ku tsakela, kutani vanana. Hi fanele ku ti wonela lezaku hi nga va tateli timhaka hambu loku zi wonekisa ku khwatsi lava hi wulawulako navo va ingisela khwatsi. Lava va nga ni timbilu ti nene va ta simama ku amukela a wutivi ga Nungungulu wa zinene, Jehova. — Joh. 17:3; 1 Kor. 3:6.
4. Hikuyini zi hi za lisima a ku yisa kupima ka timhaka-tshinya na ku nga hi ka mitlhamuselo yo tala?
4 Yisa Kupima Ka Timhaka-tshinya: Jesu a nga karatisangi lezi a nga gonzisa hi ku nyika mitlhamuselo yo tala nguvu. Laha a ngaku: “Vontlhe va nga le zilahleni va ta . . . huma,” xi wa nga seva xikhati xa kuva a nyika mitlhamuselo yo tala xungetano hi magumo ya mitlawa yimbiri yi vuxiwako. (Joh. 5:28, 29) A xikhati lexi hi fambisako a zigonzo za Biblia, hi fanele ku yisa kupima ka timhaka-tshinya hi tlhela hi potsa a kubyekelela ka ku wulawula hi mahungu ma nga lavekiko ma nga handle ka mhaka leyi hi gonzako.
5. Makatekwa muni hi zi kotako ku ma kuma loku hi gonzisa hi kuolova?
5 A hi kubonga loku hi nga nako hi lezi Jehova a hi gonzisako hi kuolova zontlhe hi lavako ku zi tiva! (Mat. 11:25) Ngha hi ti karatela a ku gonzisa hi kuolova zonake hi kuma litsako la kuva ni wutireli gi bhinzulako.