Gondzisa hi ndlela yo olova

Zvini lezvi Jesu a nga maha?

VHIDHIO: Jesu a maha mufananiso wu kombako lezvi a Papayi wa hina a hi randzisako zvona

1. Sixtira VHIDHIO, kutani lera Matewu 6:25-27. Andzhako ka lezvo, ehleketa hi zviwutiso zvi landzelako:

1. Jesu i tirisile mufananiso muni kasi ku tlhamusela lezvi Jehovha a khatalisako zvona hi hina?

2. Hambu lezvi Jesu a nga tiva zvotala xungetano hi zvinyanyani, i vekile kupima ka zvilo muni zvo olova? Hikuyini leyo yi nga hi ndlela ya yinene ya ku gondzisa hi yona?

Hi gondza yini ka cikombiso ca Jesu?

2. Loku hi gondzisa hi ndlela yo olova a vanhu va nga ta zvi rivakelwa lezvi hi nga va gondzisa niku hi ta khumba a timbilu tabye.

Pimanyisa Jesu

3. U nga wulawuli nguvhu. Wutshan’wini ga ku hlawutela zvontlhe u zvi tivako hi mhaka yo kari, ti seketele ka mahungu ma nga ka bhuku legi mu gondzako hi gona. Andzhako ka ku maha ciwutiso, rindzela hi lihlazva-mbilu a ku a cigondzani ca wena ci hlamula. Loku ci nga wu tivi a hlamulo kutani loku ci nyika mawonela ma lwisanako ni lezvi a Bhibhiliya gi gondzisako, tirisa a zviwutiso zvo engeteleka kasi ku mu vhuna ku ehleketa hi mhaka leyo. Neti a cigondzani ca wena ci zwisisa a mhaka-tshinya, hundzani.

4. Tirisa lezvi a cigondzani ca wena ci sinako ci zvi tiva kasi ku ci vhuna ku zwisisa zva zviswa. Hi cikombiso, na mu nga se sangula cigondzo ci wulawulako hi kuvhuka ka vafileko, hi magezu matsongwani u nga songa lezvi a cigondzani ci sinako ci gondzile xungetano hi ciyimo ca vafileko.

5. Tirisa mifananiso hi wutlhari. Na u nga se tirisa mufananiso wo kari, ti wutise lezvi:

1. ‘A mufananiso lowu wa olova?’

2. ‘A cigondzani ca mina ci ta tekela ku wu zwisisa?’

3. ‘Wu ta vhuna a cigondzani ca mina a ku sala ci alakanya a mhaka-tshinya kutani ci to alakanya a mufananiso basi?’