Ti Longisele Khwatsi Kasi Ku Gonzisa
1. Hikuyini hi faneleko ku ti karatela nguvu a ku vuna xigonzani lezaku xi tsakela lezi xi zi gonzako?
1 A xikhati lexi hi fambisako a xigonzo xa Biblia, hi fanele ku ti longisela khwatsi kasi hi kuca a xigonzani lezaku xi tirela Jehova. A mizamo ya hina yi tava ni wuyelo gi nene loku hi vuna a xigonzani lezaku xi tsakela lezi xi zi gonzako lomu ka Biblia. Kota wuyelo ga kona, lezo zi ta kuca a xigonzani. (Deut. 6:5; Mav. 4:23; 1 Kor. 9:26) Hi nga zi mahisa kuyini lezo?
2. Hi lihi a lisima la mukhongelo kulongiseleni ku nene?
2 Ti Longisele Hi Mukhongelo: Kota lezi ku nga Jehova a milisako a mbewu ya zinene lomu mbilwini ya xigonzani, za fanela a ku sangula ku longisela xigonzo hi ku khongelela xigonzani hi kukongoma ni zilaveko za xona wutsumbu. (1 Kor. 3:6; Jak. 1:5) A mukhongelo lowo wu nga hi vuna kambe a ku tiva a ndlela ya ku nyika xivuno xinwani kasi ku tata a mbilu yakwe hi ‘wutivi ga lisine’ ga kuranza ka Jehova. — Kol. 1:9, 10.
3. Hi nga ti longiselisa kuyini na hi alakanyela a xigonzani?
3 Alakanyela A Xigonzani: Jesu i wa zi tiva lezaku a magonzisela ma nene ma patsa a ku alakanyela lava va ku ingiselako. Ka makhati mambiri hi wutsongwani ga kona, Jesu i lo mahiwa a xiwutiso xalexi xa xinwe. “Nzi ta maha yini kasi nzaga a tshomba ya wutomi ga pinzukelwa ke?” Ka khati ginwe ni ginwani, yena i tirisile a mahlamulela yo hambana. (Luka 10:25-28; 18:18-20) Hi fanele ku alakanyela a xigonzani a xikhati lexi hi longiselako. Xikari ka mitsalo yi kumbukilweko, hi wihi hi ta nga lera naxo? Timhaka ta ku chikela kwihi hi ta nga ti karatela a ku gonza naxo? Nzeni ka xigonzo lexi, hi tihi a timhaka leti kuzilava a xigonzani xi to ti wona na ti karata a ku ti zwisisa kutani ku ti vumela? Loku hi zi kota ku alakanyela a ziwutiso zo kari lezi kuzilava xi nga ha zi mahako, hi ta zi kota ku ti longisela khwatsi kasi hi ya hlamula hi ndlela yi nene.
4. Xana a ku longisela khwatsi ku patsa yini?
4 Vuxeta: Na ku nga khataliseki a ku makhati mangani hi gonzileko a timhaka to kari ka xikhati xi hunzileko, ku tava khati go sangula hi to gonza ni xigonzani xa hina. Kasi hi khumba a mbilu ya xona, za lisima nguvu a ku vuxeta khwatsi a xigonzo xinwe ni xinwani. Loku hina wutsumbu hi vuxeta, hi tava na hi maha lezi hi kucako a xigonzani xa hina lezaku xi maha. Vuxeta a xigonzo, a ku patsa ni mitsalo yi kumbukilweko, na u alakanyela a xigonzani, u tlhela u funga a timhaka-tshinya. — Rom. 2:21, 22.
5. Hi nga mu pimanyisisa kuyini Jehova?
5 Jehova wa khatala nguvu hi kuya mahlweni ka xigonzani xinwe ni xinwani xa Biblia. (2 Ped. 3:9) Hi ku ti nyika xikhati xa ku longisela a xigonzo xinwe ni xinwani xa Biblia, hi kombisa lezaku hi na ni kukhatala ka liranzo ko fana ni loku kakwe.