Ti Nyikele Wutsumbu Ga Wena Kasi Ku Vuna Zigonzani Za Wena
1. Zini zi lavekako kasi ku vuna a xigonzani xa Biblia?
1 Kasi ku vuna a xigonzani xa Biblia lezaku xi kala xi ti hendleleta, ku laveka zo tala a ku hunza ntsena ku xi fambisela a xigonzo xa Biblia xo khanzakanya. Mupostoli Paule i ringanisile a kuzwanana kakwe ni lava a va gonzisileko ni kukhatala loku a mamani a anwisako a ku kombiselako vana vakwe. Hinawu ha xalala hi ku ti nyikela wutsumbu ga hina kasi ku vuna a zigonzani za hina a ku kula hi tlhelo ga moya. — 1 Tes. 2:7-9.
2. Hikuyini hi faneleko ku kombisa a kukhatala ka hombe, niku xana lezo zi nga mahiswa kuyini?
2 Kombisa Kukhatala: A xikhati lexi a xigonzani xa Biblia xi tirisako lezi xi gonzako, a livalo la xona li ta xi kuca a ku tsika a ku ti tlhanganyisa ni lava va nga lanzeliko a matshinya ya milayo ya Biblia. (1 Ped. 4:4) Za koteka ku a ngango wa yena wu sangula ku mu nyenya. (Mat. 10:34-36) Ha zi kota ku mu vuna a ku tatisa a xiwunza lexo hi ku kombisa a kukhatala ka hombe hi yena. A murumiwa wo kari a buvileko i nyika a mawonela lawa: “U nga hatli u suka mutini wa xigonzani zalezo mu gumesako a xigonzo. Loku zi ringana, tshamanyana mu bhula.” Tlharihela a ku vuna a xigonzani xa wena hi tindlela ti wonekako. Hi xikombiso, xana u nga mu fonela kutani ku mu enzela loku a babya? Xana wa zi kota ku tshama ni xigonzani xa wena mitlhanganweni ni ku xi vuna a ku bhuwatela vanana, loku zi ringana?
3. Hi nga vunisa kuyini a xigonzani xa hina a ku kuma ku tiyiswa hi bandla?
3 Xivuno Xa Bandla: Loku u hi ntirweni wa simu na u hi kusuhani ni muti wa xigonzani xa wena, hikuyini u nga xi vuxeliko hi xikhatanyana kasi ku xi komba lava u tirako navo? Loku zi ringana, hi xikhati ni xikhati ramba vahuweleli vo hambanahambana, a ku patsa ni madota, lezaku va ku pangalata kufambiseni ka xigonzo. Niku, zalezo u wonako lezaku a xigonzo xi tiyile, kuca a xigonzani xa wena xa Biblia a kuya mitlhanganweni le Salawini ya Mufumo. Lezo zi ta xi maha xiva ni kutolovelana ku akako ni ziro za bandla, lezi zi nga ha vako ngango wa xona wa moya. — Mar. 10:29, 30; Maheb. 10:24, 25.
4. Xana a kutikarata ka hina ku ngava ni nchachazelo muni?
4 Loku a mupswali a ti karatela nguvu a ku wundla vana vakwe hi tlhelo ga moya wa nengela nguvu a xikhati lexi va yimako tlhelweni ga Jehova ni ku famba zineneni. (3 Joh. 4) Ha zi kota ku kuma a litsako lo fana ni lelo loku hi ti nyikela a wutsumbu ga hina kasi ku vuna a zigonzani za hina za Biblia.