A Tihlo Ga Wena Ga Cuwuka Hi Kutshonometa?

1. Zi wula yini a kuva ni tihlo gi cuwukako hi kutshonometa?

¹ Lexi a mahlo ya hina ma xi cuwukako xa khumba a mitiro ya hina. Hakunene, a magezu lawa ya Jesu ma vumelelana khwatsi ni mhaka leyo: “Hikwalaho loku a tihlo ga wena gi hanya [cuwuka hi kutshonometa, NM], a miri wa wena wontlhe wu ta tala hi kuwonekela”! (Mat. 6:22) Loku a tihlo ga hina gi cuwuka hi kutshonometa hi tlhelo ga moya, gi cuwuka a kungo ginwe — ku nga ku maha kuranza ka Nungungulu. Hi rangisa a Mufumo hi tlhela hi nga vumeli ku colopetelwa hi titshomba ti nga lavekiko kutani mitiro yi lwisanako ni wutireli.

2. Xini xi nga wa ta hambukisa a kupima ka hina, kanilezi xini xi to hi vuna?

² Xilaveko Xa Ku Ti Hlola: A maalakanyo ya hina ma zi kota ku hambukiswa hi lezi hi byeliwako ku ngalo ha zi lava hi zihaxa-mahungu za tikoponi ta mabhinzu kutani ku hambukiswa hi lezi vanwani va nga nazo. Na hi nga se boha ku xava xo kari kutani ku maha nchumu lowu wu to lava lezaku hi tirisa a xikhati xo hlaya, mali, kutani ntamu, zi wa tava zi nene a ku ranga hi ku “hlayela ntsengo” hi ku ti wutisa lezi, ‘Xana lezi zi ta chukwatisa a ntiro wa mina ka Jehova kutani zi to wu colopetela?’ (Luka 14:28; Fil. 1:9-11) Wutlhari kambe a kuva xikhati ni xikhati hi alakanyela a tindlela ta kuya mahlweni hi hungula zo kari wutomini ga hina kasi hi zi kota ku maha zo tala wutirelini. — 2 Kor. 13:5; Efe. 5:10.

3. Hi gonza yini ka makabye loyi a mahileko zo kari kasi ku hehukisa wutomi gakwe?

³ Laha a makabye wo kari wa xisati a nga sangula wuphayona ga xikhati xontlhe, i lo hlawula ku simama ni ntiro wakwe wa kutihanyisa hi xikhati xontlhe hambu lezi a ku tira khihlanya ga siku zi nga wa ta ngha zi mu nyikile a mali yo enela a kuva a ti hlayisa. Hi kugumesa i lo pola lezi: “A ku na munhu a zi kotako ku tirela tihosi timbiri. Nzi vile ni xilaveko xa ku tsika a kunavela ka mina kasi nzi fela ku khatalela a zilaveko za mina. Nzi lo pola lezaku a titshomba ta mbhelelwa hi lisima niku nzi wa taza nzi khosahala na nza ha zama ku ti kuma.” A xiyimo xakwe xi mu vumelele a ku hungula zo kari wutomini gakwe a tlhela a cica ntiro. Lezo zi lo mu vumelela a ku simama kota phayona.

4. Hikuyini zi nga za lisima a kuva hi hlayisa a tihlo gi cuwukako hi kutshonometa zalezi?

⁴ A ku tiva xilaveko xa xihatla xikhatini lexi zi khanyisa nguvu a lisima la kuva hi hlayisa a tihlo gi cuwukako hi kutshonometa. A siku ni siku gi hunzako gi hi tshineta kugumeseni ka mafambisela lawa ya zilo zinwe ni kusanguleni ka misava yiswa ya Nungungulu. (1 Kor. 7:29, 31) Hi ku yisa kupima ntirweni wa kuxumayela, ha zi kota ku ponisa wutsumbu ga hina ni lava va hi zwako kambe. — 1 Tim. 4:16.