A Ku Alakanyela Hi Mukhongelo Za Laveka Ka Vatireli Vo Hiseka
1. Xini xi vunileko Jesu lezaku a potsa ku hambukiswa ntirweni wakwe wa lisima?
1 Jesu i wa mbhetile a wusikwana na a hanyisa vanhu ni ku hlongola madimoni. Laha a vapizani vakwe va nga mu kuma hi manziko wa kona, va te ngalo: “Vontlhe va ku lava,” na va mu kuca lezaku a simama ku maha mitiro yakwe yo hlamalisa. Hambulezo, Jesu i wa nga ta hambukiswa ntirweni wakwe wa lisima wa ku xumayela a mahungu yo saseka. I lo hlamula aku: “A hi fambeni kunwanyani, ka miti leyi yi nga kusuhani, kasi nza fela ku kanela ka yona kambe, hakuva nzi tele lezo.” Xini xi vunileko Jesu lezaku a khomelela ka ntiro wakwe? I wa vukile na gi nga se tsuwuka a ya khongela ni ku alakanyela. (Mar. 1:32-39) Xana a ku alakanyela hi mukhongelo zi nga hi vunisa kuyini lezaku hiva vaxumayeli vo hiseka?
2. Zini hi nga ha alakanyelako hi zona kasi zi hi vuna a ku simama hi hiseka wutirelini?
2 Ku Alakanyela Yini? Jesu i wonile lezaku a vanhu “va wa xaniseka na va hangalakile, kota tiyivu ti nga hava murisi.” (Mat. 9:36) Hi ku fanana, ha zi kota ku alakanyela lezaku vanhu vo kota kwihi va lavako kuzwa a mahungu yo saseka. Hi nga ha ehleketa hi xikhati lexi hi hanyako ka xona. (1 Kor. 7:29) Ha zi kota ku pimisisa hi mitiro ni matshamela ya Jehova, lungelo ga hina ga kuva Timboni ta Jehova ni titshomba ta lisima ta moya leti hi gonzileko Mhakeni ya Nungungulu, leti a vanhu xipanzeni xa hina va kalako va nga se ti tiva. — Tis. 77:11-13; Isa. 43:10-12; Mat. 13:52.
3. Xana hi nga alakanyela hi xikhati muni?
3 Hi Xikhati Muni? A ku fana na Jesu, a vokari va vuka na ga ha hi mixo, na ka ha rulile. A vanwani va zi wona na zi hi chukwana a ku alakanyela ni wusiku na va nga se etlela. (Gen. 24:63) Hambu loku hi khomekile, ha zi kota ku kuma xikhati xa ku alakanyela. A vokari va maha lezo a xikhati lexi va nga kuenzeni. Vanwani va tirisa a xikhati xa kufihlula lezaku va pimisisa handle ko kamanyetwa. A votala va wona lezaku a ku alakanyela na va nga seya wutirelini, hambu hi xikhati xo koma, za va vuna a ku xumayela hi kuhiseka ka hombe ni kutiya.
4. Hikuyini hi faneleko ku alakanyela?
4 A kualakanyela hi mukhongelo ku ta etisa a kunavela ka hina a ku tirela Jehova, ku lota a mawonela ya hina ni ku tiyisa a kutiyimisela ka hina ka ku simama hi xumayela. Jesu, a Mutireli wa Hombe wa Nungungulu, i vunekile hi kualakanyela. Hinawu ku ta hi vuna.