Xana U Wa Hi Phayona Ga Xikhati Xontlhe?
1. Hi gihi a lungelo legi a votala va ti buzako hi gona, kanilezi xini xi tshukako xi laveka ka vokari?
1 Hi kufamba ka malembe, mazanazana ya vanhu va ti buza hi lungelo ga ‘ku gonzisa ni ku kanela’ a mahungu yo saseka kota vatireli va xikhati xontlhe. (Miti. 5:42) Hambulezo, a vokari va kurumeteka ku nyima a ku phayona hi zigelo zo tsalangana. Loku ku hi lezaku u wa hi phayona ga xikhati xontlhe, xana u kambisisile a xiyimo xa wena ka xikhati lexi kasi ku wona lezaku u nga tlhela u vuxetela?
2. Hikuyini lava va nga hi maphayona xikhatini xi hunzileko va faneleko ku kambisisa a ziyimo zabye ka xikhati lexi?
2 A Ziyimo Za Cica: Za koteka ku ngha lexi xi ku nyimisileko a ku phayona xi hunzile. Hi xikombiso, loku u nyimile ku phayona hi ku kala u nga ha zi koti ku tlhanganyisa a 90 wa tihora hi hweti, xana a wu nge vuxeteli lezi a tihora ti hungulilweko tiva 70? Xana a zilaveko za wena za le ntirweni kutani wutihlamuleli ga ngango zi hungukile a ku hunza xikhati lexi u nga nyima ku phayona? A makabye wo kari wa xisati a nga nyimile ku phayona hi kota ya mababyi i zi kotile ku vuxetela na a hi ni 89 wa malembe. Ku wa hunza lembe a nga seya xipitali, hikwalaho i lo tizwa a wutomi gakwe na gi mu vumelela a ku phayona kambe!
3. Xana a ziro za ngango zi nga tirisanisa kuyini kasi ku vuna a wokari lezaku ava phayona?
3 Kuzilava a wu zangi uva phayona, kanilezi a wokari ngangweni wa nwina i nyimile ku phayona kasi a hlayisa xiro xo kari xa ngango, xo kota mupswali a khosaheleko. (1 Tim. 5:4, 8) Loku zi hi tano, xana wena kutani vanwani laha ngangweni mu nga ti karatanyana kasi ku mu vunetela? Hikuyini mu nga bhulisaniko hi mhaka leyo? (Mav. 15:22) Loku a ziro za ngango zi tirisana kasi a munwe wabye ava phayona, hi kufaneleko vontlhe va tizwa na va hlengela ntirweni lowu.
4. Xana u nga maha yini loku a ka xikhati lexi u nga zi koti ku vuxetela wuphayona?
4 U nga mbheli ntamu loku a xiyimo xa wena ka xikhati lexi xi nga ku vumeleli a ku tlhela uva phayona. A kuxuva ka wena a ku maha lezo ka tsakisa Jehova. (2 Kor. 8:12) A wutlhari legi u gi kumileko na u hi phayona, gi tirise wutirelini ga wena ga xikhati lexi. Ngha u khongelela a kuxuva ka wena u tlhela u tshama na u tlharihele ku lonzowota a tindlela to cicanyana zo kari ka ziyimo za wena leti ti tako na ti vululeka. (1 Joh. 5:14) Kuzilava hi kufamba ka xikhati Jehova i ta ku vululela “a nyangwa ya hombe ya ntiro” lezaku u tlhela u ti buza hi litsako la kuva phayona ga xikhati xontlhe! — 1 Kor. 16:9.