“U Nga Maha Phayona Gi Nene!”
1. Xana a makabye wo kari i ti zwisa kuyini xungetano hi ntiro wakwe wa wuphayona?
1 “A ku na ntiro ni wunwe wu nga wa ta ngha wu nzi nehele litsako lo hunza leli kutani ku nzi bhinzulela hi tlhelo ga moya,” ku wulile Kathe B. Palm. A makabye loyi wa xisati i tirile makume ya malembe kota phayona go ti tsitsirita, a nyika wukustumunyu kusukela laha a tiko ga Chile, le América Dzonga, gi sangulako kona kala magemeta-musi ya gona. Na a ehleketa hi wutomi go xalalisa ga vanhu lavo va nga ntirweni wa xikhati xontlhe, a wokari a nga ha ku byela lezi, “U nga maha phayona gi nene!”
2. Tlhamusela a ku hikuyini a ku maha mitiro ya moya zi nehako kuxalala ka hombe.
2 Mahanyela Yo Xalalisa: Jesu, a Xikombiso xa hina, i wa kuma kutangala ka lisine hi ku maha kuranza ka Dadani wakwe. (Joh. 4:34) Hikwalaho, Jesu i wa wula lisine a xikhati lexi a nga gonzisa a valanzeli vakwe lezaku a ku maha mitiro yi yelanako ni ku khozela Jehova hi zona zi nehako kuxalala ka lisine. Ha tsaka loku hi tshama na hi khomekile hi ku maha mitiro leyi yi hi mahako hi amukeleka ka Jehova. Tlhatakumbiri, laha hi tirisako nguvu a xikhati xa hina, ntamu, ni titshomba ta hina kasi ku vuna vanwani, a litsako la hina la engetela. — Miti. 20:31, 35.
3. Litsako muni hi tova nalo hi ku mbheta xikhati xo tala wutirelini?
3 Loku hi mbheta xikhati xo tala wutirelini hi vululekelwa hi tindlela to tala ta kuzwa litsako la ku sangula ni ku fambisa a zigonzo za Biblia. A xikhati lexi hi yako hi kuma wutlhari ni ku buva hi ku tira wutirelini, hi nga pola lezaku a xipanze xa hina xa bhinzula nguvu a ku hunza lezi hi nga zi alakanya, hambu lomu a venyi va miti va nge khwatsi a va khatali. A maphayona ma zi kota ku tirisa a wutivi ga lisima ga gonziselelo leyi va yi kumako Xikoleni xa Ntiro wa Wuphayona lexi ma xi gonzako anzhako ka ku tlhanganyisa lembe na ma phayona. (2 Tim. 2:15) Loku hi nga humuti a woko ga hina, handle ko kanakana hi tava na hi byala a timbewu ta zinene, leti ti to pswala mihanzu anzhako ka xikhati. — Mutsh. 11:6.
4. Xana a vanhu vaswa va nga kusuhani ni ku mbheta xikola va fanele ku alakanyela yini?
4 Vanhu Vaswa: A xikhati lexi mu mbhetako a xikola sekundaria, xana ma alakanyela khwatsi hi wumanziko ga nwina? Ku ta chikela lezi, a wunyingi ga xikhati xa nwina mu wa xi mbheta na mu maha mitiro ya nwina ya le xikoleni. Xana mu ta gi tatisa hi yini a “phanga” lego anzhako ka ku mbheta xikola? Wutshanwini ga ku nghenela a ntiro wa kutihanyisa, hikuyini mu nga alakanyeliko hi mukhongelo xungetano hi ku tatisa a mixuvo ya kuva maphayona ya xikhati xontlhe? A wutlhari legi mu to gi gonza — ku nyika wukustumunyu ka vanhu va midawuko yo hambanahambana, ku hlula zihingakanyiso za nwina wutsumbu, ku hlakulela kutikhoma, zinwe ni ku chukwatisa a wuzikoti ga kugonzisa — gi ta mu vuna wutomini gontlhe.
5. Xana a vapswali ni bandla va nga kucisa kuyini a ntiro wa wuphayona?
5 Vapswali, xana ma maha a xipanze xa nwina hi ku vuna vana va nwina lezaku va hlawula a ntiro wa xikhati xontlhe? A magezu ya nwina ni xikombiso xa nwina xa xi nene za zi kota ku va vuna nguvu kasi va rangisa a zilaveko za Mufumo. (Mat. 6:33) Ray, loyi a sangulileko a ku phayona anzhako ka ku mbheta xikola, wa alakanya: “Mamani wa mina xikhati xontlhe i wa tiva lezaku a ku phayona ku neha bhinzu ga ku tizwa na u nga vileli nchumu wutomini.” Vontlhe laha bandleni va zi kota ku kuca a ntiro wa wuphayona hi magezu ni kuseketela kabye. Jose, wa le Espanha, i ngalo: “A bandla ga mina gi wa wona a ntiro wa wuphayona kota wona wa chukwana ka yontlhe ka vanhu vaswa. A magezu yabye ni kutsakela kabye a ntiro wa wuphayona zinwe ni xivuno xabye xa zimaho zi nzi hehukisele a ku sangula ku phayona.”
6. Hi nga maha yini loku a ka xikhati lexi hi nga naveli a ku phayona?
6 Hlula Zihingakanyiso: Ahati ke loku uku, ‘A nzi naveli kuva phayona.’ Loku u ti zwisa lezo kusanguleni, khongela ka Jehova xungetano hi lezi u ti zwisako zona u tlhela u mu byela lezi, ‘A nzi zi tivi lezaku nzi na ni xinyikiwo xa ku phayona, kanilezi nzi lava ku maha lezi zi ku xalalisako.’ (Tis. 62:8; Mav. 23:26) Zonake hlota wurangeli gakwe hi ku tirisa a Mhaka yakwe ni hlengeletano yakwe. A maphayona yo tala ya xikhati xontlhe a kuranga ma lo “ringa” ku phayona kota maphayona yo vunetela. A litsako leli ma ngava nalo li lo ma kuca a ku nghenela ntiro wa xikhati xontlhe. — Tis. 34:8.
7. Hi nga ku hlulisa kuyini a kukanakana ka lezaku hi ta zi kota ku tlhanganyisa a 70 wa tihora hweti ni hweti ke?
7 Ahati loku u nga tiyiseki lezaku u ta zi kota ku tlhanganyisa a 70 wa tihora hweti ni hweti? Hikuyini u nga wulawuliko ni maphayona lawa ma nga ka matshamela yo fana ni ya wena? (Mav. 15:22) Anzhako ka lezo maha mixaxameto yo hlaya leyi u nga ha yi tirisako. U nga pola lezaku a ku xava xikhati ka mitiro yi nga hiko ya lisima kasi u xi tirisa wutirelini za olova a ku hunza lezi u nga zi alakanya. — Efe. 5:15, 16.
8. Hikuyini hi faneleko ku hlolisisa a xiyimo xa hina xikhati ni xikhati?
8 Hlolisisa A Xiyimo Xa Wena: A kutala ka zikhati a matshamela ya munhu ma cica. Zi nene a ku hlolisisa a xiyimo lexi u nga ka xona xikhati ni xikhati. Hi xikombiso, xana a xi laha kusuhani a xikhati xa wena xa ku gumesa ku tira? Randy, loyi a gumesileko ku tira a kale i ngalo: “A xiboho lexi xi nzi vumelele a ku sangula wuphayona ga xikhati xontlhe zinwe ni sati wa mina, niku lezi zi hi vululele a ndlela ya kuya tira lomu ku nga ni xilaveko xa hombe. Nzi amukela makatekwa ya tsanza-vahlayi hi kota ya xiboho xa mina, kanilezi a makatekwa ya hombe ka wontlhe livalo li nene.”
9. Xana a mipatswa ya vatekani yi fanele ku kambisisa yini?
9 Anzhako ka ku kambisisa a mhaka hi wukheta, a mipatswa yo kari yi pola lezaku a ku na xilaveko xa kuva a nuna ni sati vava ni ntiro wa kutihanyisa wa xikhati xontlhe hi wumbiri gabye. Lisine a ku lezo zi nga ha lava lezaku a ngango wu hungula zo kari wutomini ga wona, kanilezi a kutikarata loku ka bhinzula. John, loyi a sati wakwe a nga tsika ku tira zalezanyana kasi a anzisa a wutireli gakwe, i hlawuta lezi: “A ku na xinwani xo tsakisa a ku hunza ku tiva lezaku a sati wa mina i hlengela mitirweni ya moya siku gontlhe.”
10. Xini xi kucako a maKristu lezaku ma alakanyela a wuphayona?
10 Xikombiso Xa Liranzo Ni Kukholwa: Jehova i mahile a ntiro wa kuxumayela wuva wa lisima ka yontlhe leyi a munwe ni munwani wa hina a nga wa ta yi maha. A mafambisela lawa ya kale ma ta loviswa lokuloku, niku ntsena lava va vitanako a vito ga Jehova hi vona va to hanyiswa. (Rom. 10:13) A mbilu leyi yi mu ranzako hi kumbhelela na yi kombisa kubonga hi lezi a hi mahelako yi ta hi kuca a ku maha ntiro wu leletelweko hi N’wana wakwe wa ku xumayela hi kuhiseka. (Mat. 28:19, 20; 1 Joh. 5:3) Tlhatakumbiri, loku hi kholwa lezaku hakunene hi hanya masikwini ya kugumesa, zi ta hi susumeta a ku maha zontlhe hi zi kotako wutirelini na ka ha hi ni xikhati, hi nga tirisi nguvu a za misava. — 1 Kor. 7:29-31.
11. Xana hi fanele ku zi wonisa kuyini loku a wo kari a hi byela lezaku hi nga maha maphayona ma nene?
11 A wuphayona ga xikhati xontlhe a gi lumbeli kuva hlamulo wa xikombelo xa ku tlhanganyisa a ntsengo wo kari wa tihora kuxumayeleni. Gona xikombiso xa kutinyiketela ka hina ka Nungungulu. Hikwalaho, loku a wokari a ku byela lezaku u nga maha phayona gi nene, zi tive lezaku a munhu loye o ku dzunza. Niku, na u kari u khongela, ehleketa hi mhaka leyo lezaku u hlengela ni lava va mahako a ntiro lowo wo xalalisa.
[Magezu yo koka kupima ka phajina 4]
Vapswali, xana ma maha a xipanze xa nwina hi ku vuna vana va nwina lezaku va hlawula a ntiro wa xikhati xontlhe?
[Magezu yo koka kupima ka phajina 5]
Jehova i mahile a ntiro wa kuxumayela wuva wa lisima ka yontlhe leyi a munwe ni munwani wa hina a nga wa ta yi maha.