‘A Vito Ga Nungungulu A Gi Basiswe.’
1. Hi yihi a hloko ya mhaka ya longoloko wa mutlhangano wa xipanze wa lembe ga ntiro ga 2012, niku yi seketelwa kwihi?
1 A hi kusaseka ka lungelo legi hi nga nago ga ku vitaniwa hi vito ga Jehova, a Hosi ya Hombe Wuakweni Gontlhe! Kuve Nungungulu wutsumbu loyi a hi nyikileko vito lego, niku nguvunguvu kusukela a lembe ga 1931, kota Timboni ta Jehova, hi tiviwa hi vito ga Jehova go hlawuleka. (Isa. 43:10) Jesu, a N’wana wa Nungungulu a belekilweko yece, i wa nyika nguvu lisima a vito ga Nungungulu laha ka kuza a gi rangisa mukhongelweni wakwe wa xikombiso. (Mat. 6:9) A magezu lawa ya Jesu hi wona ma nga xiseketelo xa hloko ya mhaka ya longoloko wa mutlhangano wa hina wa xipanze wa lembe ga ntiro ga 2012. A hloko ya kona ya mhaka i “A Vito Ga Nungungulu A Gi Basiswe.”
2. Mahungu muni lawa hi rinzelako ku mazwa?
2 Lezi Hi To Zizwa: Hi Mulongiso, a kanelo “Tivisani A Vito Ga Nungungulu Kota Malanza Ya Xikhati Xontlhe” yi ta tlhamusela a ku hikuyini a ntiro wa xikhati xontlhe wu nga hanyela gi bhinzulako. Hi ta tlhela hi ingisela a xaxamelo wu nge “Ti Wonele Lezaku U Nga Nehi Xiruko Ka Vito Ga Jehova,” lowu wu to hi vuna ku potsa a ku phasiwa hi mune wa mitlhamu yi sinako yi dembilwe. A ziwutiso, Zini zi to hi vuna a ku xumayela hi kuhiseka loku a vanhu va nga kombisi nguvu kutsakela? ni, Zini zi to hi vuna a ku tira hi ndlela yo nyawula wutirelini? zi ta hlamuliwa ka kanelo “Hikuyini A Vito Ga Nungungulu Gi Faneleko Ku Basiswa?” Hi Sonto, hi ta ti buza hi xaxamelo wa mune wa zipanze lowu wu to wulawula hi tindlela ta ku basisa a vito ga Nungungulu hi maalakanyo ya hina, mawulawulela, ziboho, ni mahanyela. Lava va ha hiko vaswa va ta tsakela nguvu a kanelo ya laha kubaseni, yi nga ni hloko ya mhaka “Jehova I Ta Basisa A Vito Gakwe Ga Hombe Le Har–Magedoni.”
3. I lungelo muni hi nga nago, niku xana a longoloko wa mutlhangano wa xipanze wu ta hi vunisa kuyini?
3 Zezanyana, Jehova i ta maha xo kari kasi ku basisa a vito gakwe. (Ezek. 36:23) Na xi nga se chikela a xikhati lexo, hi na ni lungelo go hlamalisa ga ku seketela zontlhe lezi zi yimelwako hi vito go basa ga Jehova. Ha tsumba lezaku a longoloko lowu wa mutlhangano wa xipanze wu ta vuna a munwe ni munwani wa hina a ku tatisa a wutihlamuleli ga hina ga hombe kota vanhu va vitanwako hi vito ga Nungungulu.