Lulamiselo Gi Mahelweko Vatireli Va Makristu

1. I lulamiselo muni ga giswa gi nga sangula hi 1938, na gi hi ni kungo muni?

¹ Hi 1938, a hlengeletano ya Jehova yi sangulile a lulamiselo giswa. A mabandla yo hlaya ma lo rambiwa lezaku maya ka mitlhangano ya zona leyi makunu yi vitaniwako ku mitlhangano ya xipanze. Kasi kuya maha yini? A Informante (legi makunu gi nga Wutireli Ga Hina Ga Mufumo) ga Janeiro wa 1939 gi hlamulile lezi: ‘A mitlhangano leyi xipanze xa hlengeletano ya Jehova kasi ku rangela a ntiro wakwe wa Mufumo. A zileletelo zi nyikiwako ka yona za lisima ka munwe ni munwani kasi a wu maha khwatsi a ntiro lowu a nyikilweko.’ Loku hi wona a kuengeteleka ka vahuweleli va Mufumo kusukela ka 58.000 hi 1938 kala ku hunza a 7.000.000 hi 2009, zi la su dlunya lezaku a mitlhangano ya xipanze, yi kari yi tatisa a kungo ga yona ga ku vuna a vatireli lezaku va ‘maha a ntiro lowu va nyikilweko wona!’

2. Hi wahi a mahungu ma to kanelwa mutlhanganweni wa hina wa xipanze wa lembe giswa ga ntiro?

² Hloko Ya Mhaka Ya Lembe Gi Tako: Ha wu xuva nguvu a longoloko wu to sangula hi Setembro ni kuzwa a mahungu ya wona ma tiyisako hlana. A hloko ya mhaka ya wona yi ngalo “A Mu Va Tiko,” na yi susiwa ka Johani 15:19. Hi tihi a tikanelo to kari leti hakunene ti to vuna a vatireli va maKristu? Hi Mulongiso hi tazwa a kanelo, “A Ntiro Wa Xikhati Xontlhe Wa Hi Vikela — ⁠Hi Ndlela Muni?” Hi ta tsaka hi kuzwa a xaxamelo wu nga ni zipanze zinharu “U Nga Nyenyeziswi Hi . . . ” “Xihari,” “Xibhayi Xa Hombe,” ni “Vamahungani.” Hi Sonto hi tazwa a xaxamelo wu nga ni hloko ya mhaka “Ranza Jehova, U Nga Ranzi Tiko.” A tinwani tikanelo ti ngalo “Simamani ‘Kota Valuveli Ni Vaenzi’ ” ni “Tiyani Hlana, Mu Ta Hlula Tiko.”

3. Xivuno muni hi to xi kuma hi kuva kona mutlhanganweni wa xipanze?

³ Anzhako ka kuva kona ka mutlhangano wa xipanze wa ha hi ku hunzako, a makabye wo kari wa xisati loyi a nga rerekile wutirelini i tsalile lezaku a longoloko lowo wu mu vunile a ku kambisisa a xiyimo xa yena a tlhela a ti yimisela ku “maha a ntiro wa yena, a tsika ku ti yimelela!” A ku na kukanakana ka lezaku a mutlhangano wa xipanze wa lembe giswa ga ntiro wu ta vuna hina hontlhe a ku ranza Jehova, hi nga ranzi tiko. (1 Jo 2:​15-⁠17) Maha zontlhe lezaku uva kona ni ku ingisela khwatsi kasi u vuneka nguvu hi lulamiselo ga liranzo gi mahelweko vatireli va maKristu!