Hlayisa a kupima ka wena
1. Hi yihi a hloko ya mhaka ya mutlhangano wa xipanze wa lembe ga ntiro ga 2013, niku hi gihi a kungo ga wona?
1 Jesu i gonzisile vapizani vakwe a ku ranza Jehova hi mbilu yabye yontlhe, ni muhefemulo wabye wontlhe, ni kupima kabye kontlhe. (Mat. 22:37, 38) A gotsovanyano ni mutlhangano wa xipanze ni wo hlawuleka ya lembe legi yi mahelwe ku hi vuna ku tiyisa a munhu wa hina wa lomu nzeni. Kota lezi u to zi alakanya, a hloko ya mhaka ya gotsovanyano wa hina wa muganga yi waku “Hlayisa mbilu ya wena!” A mutlhangano wo hlawuleka wa lembe ga ntiro ga 2013 wu na ni hloko ya mhaka “Hlayisa a livalo la wena.” A mutlhangano wa xipanze lowu wu sangulako hweti yi tako wu na ni hloko ya mhaka “Hlayisa a kupima ka wena,” yi seketelweko ka Mateu 22:37. A mutlhangano lowu wu mahelwe ku hi vuna ku hlola a maalakanyo ya hina kasi ma tsakisa nguvu Jehova.
2. A xikhati lexi hi to ngha hi hi mutlhanganweni wa xipanze, hi fanele ku demba ndleve ka mihlamulo ya ziwutiso zihi ke?
2 Lezi zi to kanelwa: A xikhati lexi hi nga mutlhanganweni wa xipanze, hi fanele ku demba ndleve ka mihlamulo ya ziwutiso lezi, ti nga timhaka-tshinya ta mutlhangano:
• Hi nga potsisa kuyini kuva ni “maalakanyo ya vanhu”?
• Hi nga va vunisa kuyini lava va pfhupelisilweko kupima?
• I mbilu muni hi faneleko kuva nayo?
• Hi wahi a mabhinzu ya ku ehleketa hi zilo zi faneleko?
• Hi nga vumelisa kuyini lezaku Jehova a gonzisa kupima ka hina?
• Xana a vanuna, vasati, vapswali, ni vana va nga maha yini lezaku kuva ni litsako ngangweni?
• Hi nga ti longiselisa kuyini a siku ga Jehova?
• Zi wula yini a ku ti boha ziwunu za kupima ka hina?
• Makatekwa muni va ma kumako lava va mahako lezi va zi gonzako?
3. Hikuyini zi nga za lisima a kuva kona mutlhanganweni masiku wontlhe ya mambiri, ku demba ndleve, ni ku tirisa lezi hi to zi gonza?
3 Satani i hlomile yimpi ya kulwa ni kupima ka hina kasi a ku onha. (2 Kor. 11:3) Hikwalaho, hi fanele ku vikela a kupima ka hina hi tlhela hi gada a maalakanyo ya hina. Hi fanele ku simama ku kombisa a kupima ka Kristu hi tlhela hilwa ni kucetelo wa tiko legi go biha. (1 Kor. 2:16) Hi xigelo lexo, ti longisele lezaku uva kona mutlhanganweni wa xipanze ka masiku wontlhe ya mambiri. Demba ndleve. A ku hanya hi lezi zi to kanelwa zi ta hi vuna a ku ti boha ziwunu za kupima ka hina kasi hi tirela Nungungulu hi kuhiseka. — 1 Ped. 1:13.