Hlayisa a livalo la wena
1. Hi yihi a hloko ya mhaka ya mutlhangano wo hlawuleka wa lembe ga ntiro ga 2013, niku hi gihi a kungo ga wona?
1 Siku ni siku hi kumana ni ziyimo lezi zi nga wa ta onha a livalo la hina. Hi xigelo lexo, a mutlhangano wo hlawuleka wa lembe ga ntiro ga 2013, legi gi sangulako hi 1 ka Setembro wa 2012, wu na ni hloko ya mhaka, “Hlayisa a livalo la wena.” (1 Tim. 1:19) A mutlhangano lowo wu mahelwe ku vuna a munwe ni munwani wa hina lezaku a chela nguvu kota hi lezi a xi tirisisako zona a xinyikiwo lexi xa lisima xi tako hi ka Muvangi wa hina.
2. Ziwutiso muni za lisima zi to hlamulwa mutlhanganweni wo hlawuleka?
2 Demba ndleve ka timhaka leti: Ka mutlhangano lowu, ku ta hlamuliwa a ziwutiso lezi za ntlhanu ni zimbiri za lisima xungetano hi livalo:
• Zini zi zi kotako ku onha a livalo?
• Hi nga gonzisisa kuyini a livalo la hina?
• Hi nga ponisa kuyini ku kuma nanzu nkhateni wa vanhu vontlhe?
• Xana lezi hi zi pimisako ni lezi hi lanzelisako zona a matshinya ya milayo ya Biblia zi komba yini hi hina?
• Hi nga potsisa kuyini ku xanisa vanwani hi zilo zi yelanako ni livalo?
• Vaswa, mu nga timiselisa kuyini loku mu kurumetwa ku tshova a milayo ya Biblia ya mahanyela?
• Makatekwa muni ma kumiwako hi lava va tsikako livalo labye li rangelwa hi moya wa Nungungulu?
3. Hi fanele ku maha yini kasi hi vuneka hi mutlhangano?
3 Hi nga zi kota ku hlula a mizamo ya Satani ya ku onha livalo la hina hi ku vuniwa hi Jehova. Hi ku tirisa a Biblia ni hlengeletano yakwe, a Dadani wa hina wa liranzo i hi byela lezi: “A ndlela hi leyi, famba ha yona.” (Isa. 30:21) Jehova i tirisa a mutlhangano lowu kasi ku hi komba ndlela leyo. Hikwalaho, ti longisele lezaku uva kona ka mutlhangano wontlhe. Demba ndleve u tlhela u ti karatela ku hanya hi lezi u to zizwa. Bhula ni va ngango wa wena hi timhaka leti mu ti gonzileko. A ku hanya hi lezi hi zi gonzako zi ta hi nyika ntamu wa ku simama hiva ni “livalo li nene” zi tlhela zi hi vuna a ku ti vikela ku hambukiswa hi ziphatiphati za tiko ga Satani. — 1 Ped. 3:16.