Mutlhangano Wa Xipanze Lowu Wu To Hi Vuna A Ku Hlayisa A Wumoya Ga Hina
1. Wula a ginwe ga malulamiselo ya Jehova legi gi mahelweko ku hi vuna a ku tatisa a ntiro wa hina wa ku hangalasa a mahungu yo saseka.
1 Hi matsenya, Jehova i hi nyika a mahungu, gonziselelo, ni kutiyiswa loku hi ku lavako lezaku hi tatisa a ntiro lowu a hi nyikileko wa ku hangalasa a mahungu yo saseka. (Mat. 24:14; 2 Tim. 4:17) A ginwe ga malulamiselo lawo mutlhangano wa hina wa xipanze wa lembe ni lembe. A longoloko wuswa wa lembe ga ntiro ga 2010 wu ta tlhamusela a hloko ya mhaka leyi, “Hlayisa A Wumoya Ga Wena,” yi seketelwako ka Va Le Roma 8:5 ni ka Juda 17-19. Wu ta sangula ka viki ga 31 ka Agosto wa 2009.
2. (a) Xana a mutlhangano wa xipanze wu ta hi vunisa kuyini? (b) Xana a mitlhangano ya xipanze leyi yi hunzileko yi ku vunisile kuyini wutirelini ga wena?
2 Hi Ta Vunekisa Kuyini: A mutlhangano lowo wu ta hi tlharihisa ka timhango, to kota zilo zi pengisako mapimo lezi zi lavako ku hi mbhetela a xikhati ni ku djikisa a kupima ka hina ka lezi hakunene zi nga za lisima. Hi ta gonza a tindlela ta ku fuvisa a moya wa kuhena, hi tlhela hi kambisisa a matshamela ya munhu wa moya. A xaxamelo wa Sonto wu ta komba lezi a vanhu hi munwe munwe ni mingango va nga tiyisisako zona a wumoya gabye loku va yimisana ni mitshikelelo leyi yi yako yi engeteleka zinwe ni ziringo za hombe. A longoloko wu ta hi vuna a ku hlayisa a timbilu ta hina, ku hlayisa a lihanyo la hina hi tlhelo ga moya, ni ku tshama na hi alakanya khwatsi a makatekwa ya hombe lawa ma rinzelako lava va hlayisako a wumoya gabye.
3. Xana a mutlhangano wa nwina wa xipanze wu ta mahiwa rini, niku xini lexi u faneleko ku ti yimisela xona?
3 Zalezo mu tivako a siku ni wutshamu legi a mutlhangano wa nwina wa xipanze wu lanzelako wu ta nga mahelwa kona, mahani a malulamiselo kasi muva kona ni ku ingisela khwatsi a zipanze zontlhe ka masiku wontlhe ya mambiri. Tiyiseka lezaku Jehova wa katekisa a mandla ya loyi a ti karatako. — Mav. 21:5.
4. Zini lezi hi tiyisekako lezaku hi ta zi kuma ka mutlhangano wa hina wa xipanze lowu wu tako?
4 Hakunene, Jehova hi yena a Munyiki wa xinyikiwo lexi xo saseka. A longoloko lowo wu lulamiselweko hi ntlawa wa nanza gi tsumbekileko wu na ni zontlhe hi zi lavako lezaku hiya mahlweni kota vatireli va wuKristu. Ha mu bonga nguvu Jehova hi malulamiselo wontlhe ya liranzo lawa ma hi vunako a ku ‘khomisisa a kuvumela ka kutsumba ka hina, kasi ku nga kanakaniswi.’ — Maheb. 10:23-25; Jak. 1:17.