Longoloko Wuswa Wa Mutlhangano Wa Xipanze

Zi nga kotekisa kuyini a ku yima hi tiya mahlweni ka lava va vukelako a wukhozeli ga lisine hi tihanyi? Xana hi nga yi hlulisa kuyini a mintamu leyi xikhati xontlhe yi zamako ku hi kokela nzhako hi nghena tikweni gi nga chaviko Nungungulu? A longoloko wa mutlhangano wa xipanze wa lembe ga ntiro ga 2009 wu ta hlamula a ziwutiso lezi za lisima. A hloko ya mhaka yi ngalo “Hlula A Kubiha Hi Ku Maha Zo Saseka.” (Rom. 12:21) A hi woneni lezi zi nga nzeni ka wona.

A muwoneleli wa muganga i ta veka a tikanelo leti: “Ha Tiyiswa Lezaku Hi Hlula A Kubiha Hi Ku Maha Zo Saseka,” “Ti Wonele Ka Kutitsumba Nguvu!,” “A Kubiha Kontlhe Ku Laha Kusuhani Ni Ku Mbhela!,” ni “A Hi Tiyiseni A Kukholwa Ka Hina Kasi Hi Hlula Tiko.” A muwoneleli wa xipanze i ta hi kanelela a tihloko ta mhaka leti: “Lexi Xikhati Xa Ku Vuka Wurongweni!,” yi seketelwako ka Va Le Roma 13:11-13, ni “U Nga Rereki Sikwini Ga Khombo,” yi seketelwako ka Mavingu 24:10. Ha xuva kambe a kuzwa a kanelo wa muwoneleli wa xipanze wu nge “Khatalela Zilaveko Za Xipanze.” A xipanze xinwani xo tsakisa ku tava kanelo wu nge ngalo “Xana U Nga Chela Kota Hi Wutireli Legi — Hi Kuva Phayona?” A xaxamelo wo sangula ka leyi ya yimbiri wu na ni hloko ya mhaka “Hlula A Mano Ya Satani.” Wu ta hi vuna a ku pola ni ku ala a mano ya Satani ma khohlisako mhakeni ya tekinolojiya, zihungato, ni ka gonzo. A xaxamelo lowu wu nge “Kuma Ntamu Wa Ku Yima Hi Siku Ga Khombo” wu ta hi komba a ndlela yo tirisa hi kumbhelela a wusungukati gi pimisilweko gi nga ka Va Le Efesusi 6:10-18.

Ku na ni kuyelana ka hombe xikari ka kuhlula a kubiha hi laha xibukeni xa kona ni kuxumayela a mahungu ya Mufumo. (Kuv. 12:17) A zi hlamalisi lezi Satani a vukelako a Timboni ta Jehova hi kutshingisa a nga tsiki! (Isa. 43:10, 12) Kanilezi Satani i ta tsanzekela magumo hakuva hi ti yimisele a ku “hlula a kubiha hi ku maha zo saseka.” Ti longisele u mbhelela kasi u vuneka khwatsi hi zipanze zontlhe za mune za mutlhangano lowu wa xipanze.