Jehova Wa Hi Gonzisa Ku Maha A Ntiro Lowu
1. Loku Jehova a nyika vanhu a xiavelo, zini a tlhelako a maha?
1 Loku Jehova a nyika vanhu a xiavelo, i tlhela a va vuna a ku xi tatisa. Hi xikombiso, a xikhati lexi Jehova a nga byela Noa lezaku a aka a taru, ku nga hi nchumu wa ku Noa cima i wa nga se wu maha, Nungungulu i tlhelile a mu byela a mamahela ya kona. (Gen. 6:14-16) A xikhati lexi Mosi, a murisi wo rula, a nga nyikwa xiavelo xa ku ya tsombanyisa a masingalakati ya ka Israeli ni ku ya wonana na Faro, Jehova i mu tiyisile hi ndlela leyi: “Mina nzi tava ni nomu wa wena, nzi ku gonzisa lezi u ta nga zi wulawula.” (Ekso. 3:16–4:12) Xungetano hi xiavelo xa hina xa ku xumayela a mahungu yo saseka, Jehova a nga hi tsikangi hoce. Yena wa hi gonzisa ku maha a ntiro lowu hi ku tirisa a Xikola xa Wutireli ga Nungungulu ni Mutlhangano wa Ntiro. Xana hi nga vunekisa kuyini hi gonziselelo leyi?
2. Xana u nga vunekisa kuyini hi Xikola xa Wutireli ga Nungungulu?
2 Xikola Xa Wutireli Ga Nungungulu: Vuxeta a timhaka leti ti to gonziwa na u nga seya mutlhanganweni. A xikhati lexi u wonako lezi a zigonzani zi tlhamuselisako zona a timhaka leto ka tikanelo ta zona, a kuzwisisa ka wena a magonzisela ku ta lotiwa. (Mav. 27:17a) Tana mitlhanganweni ni bhuku ga wena Escola do Ministério u tlhela u gi tirisa kota xiseketelo xa wena. Loku a muwoneleli wa xikola a gi kumbuka anzhako ka kanelo ya xigonzani xinwe ni xinwani, tsala a nzhati lahasi ka timhaka-tshinya leti u lavako ku ti tirisa, u tlhela u tirisa a mareve ya maphajina ya bhuku lezaku u tsala tinwani timhaka u xuvako ku ti tirisa. Kanilezi a ndlela ya chukwana ya kuva u vuneka hi xikola lexi, ku ti tsalelisa ka xona. U mahile lezo? A xikhati lexi u amukelako a kanelo, yi longisele khwatsi u tlhela u lanzela a wusungukati legi u to nyikiwa. Loku u hi sinwini, tirisa lezi u zi gonzileko.
3. Zini zi to hi vuna a ku susa xivuno Mutlhanganweni wa Ntiro?
3 Mutlhangano Wa Ntiro: Hi ta zi kota ku alakanya khwatsi a mawonela lawa hi nyikwako mutlhanganweni lowu hi ku gonza a timhaka ta kona na ka ha hi mahlweni ni ku ti longisela a ku ta nyika mihlamulo. Loku hi komisa a mihlamulo ya hina, vanyingi va ta zi kotawo ku hlamula. Yisa nguvu kupima ka mikombiso, u tlhela u tirisa a mawonela wahi ni wahi u alakanyako lezaku ma ta chukwatisa a wutireli ga wena. Hlayisa a Wutireli Ga Hina Ga Mufumo legi u gi wonako lezaku gi na ni timhaka u to ti lava manziko.
4. Hikuyini hi faneleko ku lonzowota khwatsi a gonziselelo ya Nungungulu?
4 A ku fana ni ziavelo lezi Noa na Mosi va nyikilweko, a ntiro wa hina wa ku xumayela a mahungu yo saseka misaveni yontlhe wu na ni zikarato za wona. (Mat. 24:14) Hi ta humelela loku hi khegela ka Jehova, a Mugonzisi wa hina wa Hombe, hi tlhela hi lonzowota khwatsi lezi hi zi gonzako. — Isa. 48:17.