Vuna A Nwinyi Wa Muti A Ku Zwisisa Mhaka Hi Ku Tirisa A Hloko
1. Hi wahi a maxumayelela ya chukwana?
1 Hi wahi a maxumayelela lawa ma bhinzulako nguvu — ku kurumeta a nwinyi wa muti lezaku a vumela lezi u wulako kutani ku mu vuna ku tirisa a hloko kala a chikelela a lisine hi yece? Mupostoli Paule i tirisile a maxumayelela lawa yo gumesa a xikhati a nga wulawula ni vaJuda le Tesalonika, niku hi ku maha lezo “a vanwani va vona va lo kholwa.” (Miti. 17:2-4) Zini zi patsekako laha ka ku vuna vanwani a ku zwisisa mhaka hi ku tirisa a hloko?
2. Xana hi nga xi pimanyisisa kuyini a xikombiso xa Paule a xikhati hi xumayelako a mahungu yo saseka?
2 Khatalela A Kutizwa Ka Vanhu Ni Midawuko Yabye: A ku vuna munhu lezaku a zwisisa mhaka hi ku tirisa a hloko zi patsa ku khatalela a kutizwa ka vanhu va xipanzeni xa hina. Paule i lo sangula ku kanelela a vaGreki va nga kala va nga hi makholwa le Areopagu hi ku va byela zilo lezi zi nga wonekisa ku khwatsi va zi tiva ni ku zi vumela. (Miti. 17:22-31) Hikwalaho, loku u longisela a xingheniso xa wena, alakanyela a mikhuwo ni xihlawulela xa vanhu va lomu xipanzeni xa nwina. (1 Kor. 9:19-22) Loku a nwinyi wa muti a phikiza, zama ku wulawula hi zilo lezi a zi vumelako, u tlhela u luka a bhulo ga nwina na u ti seketela ka zalezo.
3. Xana a ku tirisa ziwutiso hi wutlhari zi nga hi vunisa kuyini a ku pimisana khwatsi ni vanwani?
3 Tirisa Ziwutiso Hi Wutlhari: A hi nge zi koti ku leletela ndlela a muenzi loku hi nga ku tivi laha a nga kona ka xikhati lexo. Hi kufanana, a hi nge zi koti ku vuna a nwinyi wa muti a ku chikelela a lisine loku hi nga ma tivi a mawonela yakwe. Na a nga se pimisana ni muingiseli, Jesu i wa tala ku maha ziwutiso kasi ku tiva a maalakanyo ya munhu loye. Hi xikombiso, a xikhati lexi a wokari a nga wutisa lezaku “Nzi ta maha yini, kasi nzaga a tshomba ya wutomi ga pinzukelwa ke?,” Jesu i lo hlola a mawonela ya munhu loye na a nga se mu hlamula. (Luka 10:25-28) Ka xinwani xikhati, laha Pedro a nga hlamulile zahava, Jesu i lo tirisa ziwutiso kasi ku lulamisa a maalakanyo yakwe. (Mat. 17:24-26) Hikwalaho, loku a nwinyi wa muti a maha xiwutiso kutani ku wula zilo zi nga lulamangiko, ha zi kota ku tirisa ziwutiso lezaku hi mu vuna a ku chikelela a lisine hi yece.
4. Hikuyini hi faneleko ku zama ku vuna a nwinyi wa muti a ku zwisisa mhaka hi ku tirisa a hloko?
4 A xikhati lexi hi vunako a nwinyi wa muti a ku zwisisa mhaka hi ku tirisa a hloko, ho pimanyisa a Mugonzisi wa Hombe, Jesu, zinwe ni vavangeli vanwani vo tlhariha va zana ga malembe go sangula. A hi wisi tingana a munhu loye niku hi mu kombisa xichawo. (1 Ped. 3:15) Hi kota ya lezo, yena a nga ha byekelela ku vumela a kuva hi mu tlhelela.