Engetela wutlhari ga wena wutirelini — Nyikela a bhuku Biblia gi gonzisako

Hikuyini zi nga za lisima: A bhuku Biblia gi gonzisako hi gona xitiro-tshinya ka zitiro za hina za ku gonzisa. Hambulezo, na hi nga se gi tirisa kasi ku gonza ni munhu, hi fanele ku ranga hi ku mu nyika. Hikwalaho, hontlheni hi fanele ku ti karatela kuva ni wutlhari ga ku nyikela a bhuku Biblia gi gonzisako wutirelini. (Mav. 22:29) Ku na ni tindlela to tala ta ku gi nyikela niku a vahuweleli va fanele ku tirisa lezi va zi wonako na zi bhinzula.

Mamahela ya kona:

• Longisela xiwutiso xi vuxako kutsakela lexi u nga xi tirisako kasi ku kongomisa nwinyi wa muti ka xipimo xo kari xo kongoma xa bhuku legi. U nga ha hlawula a xinwe xa ziwutiso zi nga kusanguleni ka xipimo. Anzhako ka kuzwa mawonela ya nwinyi wa muti, gonza mutsalo wu fanelekako u guma u mu komba nzimana yi wulawulako hi mhaka leyo mu tlhela kuzilava mu bhulisana kutsongwani hi yona.

• A ndlela yinwani ku tirisa a maphajina yo sangula kasi ku vuxa kutsakela, u gumesa u komba nwinyi wa muti laha a bhuku lego gi nyikako kona a hlamulo wa Biblia. Hi xikombiso, u nga kumbuka khombo go kari gi bikilweko hi zihaxa-mahungu u gumesa u tlhamusela lezaku a votala va karateka hi ku lava mihlamulo ya ziwutiso lezi zi nga ka phajina 3. Kutani u nga ha wula lezaku u enzela vanghana kasi ku va bhulela mahungu yo tsakisa ya wumanziko. Hi kulanzela, mu kombe a mifota yi nga ka maphajina 4-5, u mu wutisa lezi: “Hi xihi xitsumbiso u tsakelako ku xi wona na xi tatiseka?” U nga ha wula kambe lezaku u kari u enzela vanhu hi xikhati xi tsongwani kasi ku va vuna ku kuma mihlamulo ya ziwutiso za lisima za wutomi. Hi kulanzela, komba nwinyi wa muti a ziwutiso zi nga lahasi ka phajina 6, u mu wutisa ku hi xihi xi mu tsakisako nguvu.

• Tirisa xingheniso xo kongoma kasi ku sangula xigonzo xa Biblia. U nga ha wula lezi: “Hi kari hi komba a vaakelane va hina a bhuku legi gi hi vunako ku gonza Biblia. U tshuka u gi wona ke? [Rinzela hlamulo.] Loku u hi ni xikhatanyana, nzi tsakela ku ku komba lezi u nga gi tirisisako zona zinwe ni Biblia ga wena wutsumbu.”

Ka hweti leyi, ringisa lezi:

• Wukhozelini ga nwina ga ngango, vuxetani a zingheniso zo kari.

• Loku u hi wutirelini, bhulela vahuweleli vanwani lezi u longiseleko ku wula. (Mav. 27:17) Cica xingheniso xa wena loku xi nga bhinzuli.