Wa Kombisa A Mafambisela Ya Xigonzo Ka Lienzo Lo Sangula?

Loku va byeliwa hi ku fambiselwa a xigonzo xa Biblia, a venyi va miti vo kari ve ngalo a va zi lavi kutani ku ngalo va gonza Biblia tichechini tabye. Kota lezi va nga zi tiviko a ku hi gonza a Biblia hi ndlela yo hambana ni mitlawa yinwani ya wukhongeli, a va zi tivi lezaku a xigonzo xa Biblia xa tsakisa niku xi hambene ni lezi va zi tivako. Hikwalaho, wutshanwini ga ku va byela ntsena lezaku u lava ku va fambisela xigonzo, hikuyini u nga mbhetiko timeneti ti tsongwani na u va komba lezi a xigonzo xa Biblia xi mahisiwako zona ka lienzo lo sangula? Hi xikombiso: U nga va byeli ntsena lezaku u mubhiki mu nene niku u ta wuya ni zakuga; tekela ku va ringisa na u nga se suka! Wona a ndlela ya ku maha lezo hi timeneti ti tsongwani ntsena, hi ku tirisa a mawonela ma nga ka phajina 6 ka Nosso Ministério do Reino ga Janeiro wa 2006.

“Hi mawonela ya wena, xana a magezu lawa ma taza ma tatiseka? [Gonza Isaya 33:24, zonake u rinzela hlamulo.] Nyima nzi ku komba a mhaka leyi yo tsakisa.” Mu nyike bhuku A Biblia Gi Gonzisako, u tlhela u mu komba a nzimana 22 ka phajina 36. Lera a xiwutiso xi nga lahasi ka phajina, zonake u kombela a nwinyi wa muti lezaku a kuma hlamulo a xikhati lexi u gonzako a nzimana. Anzhako ka lezo tlhela u lera a xiwutiso, zonake u ingisela a hlamulo wa nwinyi wa muti. Gonzani a mutsalo wunwani. Maha xiwutiso xi to hlamuliwa ka lienzo li tako, u tlhela u boha siku ga kutiya ga ku mu tlhelela. Zalezo u sangulile a xigonzo xa Biblia!