Gonzisa hi broxura Mahungu yo Saseka
1. A broxura Mahungu yo Saseka gi mahisilwe kuyini?
1 Kota lezi hi wulawulileko hi zona ka Wutireli ga hina ga Mufumo ga Julho, a xinwe xa zitiro za lisima kaxeni ga hina ga zitiro za kugonzisa i broxura Mahungu yo Saseka ya Nungungulu! A mitsalo yi kumbukilweko a yi tshahiwangi kasi a venyi va muti va yi gonza lomu ka Biblia ha goce. Hambu lezi a kutala ka mabhuku ya hina ya xigonzo ma tsalilweko hi ndlela ya ku a mugonzi a zi kota ku ti gonzela yece, a broxura legi gi mahilwe hi ndlela yi lavako lezaku a bhulisana ni mugonzisi. Hikwalaho, a xikhati hi gi nyikelako, hi fanele ku ti karatela ku kombisa xigonzo kasi a nwinyi wa muti a wona lezi zi tsakisisako zona a ku gonza a mahungu yo saseka lomu ka Biblia. — Mat. 13:44.
2. Hi nga gi tirisisa kuyini a broxura Mahungu yo Saseka ka lienzo lo sangula?
2 Ka lienzo lo sangula: U nga ha wula lezi: “Nzita laha hi ku tiva lezaku a vanhu vo tala va karateka hi ku lava ku tiva ku a tiko legi gi penga giya kwihi ke. U alakanya lezaku a matshamela ya tiko legi ma ta tshuka ma chukwata? [Rinzela hlamulo.] A Biblia gi na ni mahungu yo saseka ma nyikako kutsumba. Wona a ziwutiso zo kari zi hlamuliwako lomu ka Biblia.” Mu nyike a broxura, u tlhela u mu kombela lezaku a hlawula xiwutiso lexi xi mu tsakisako nguvu laha ka kapa ya lenzhako. Hi kulanzela, kombisa xigonzo hi ku tirisa a nzimana yo sangula ya xigonzo lexo. A mahela ginwani ku ngava ku wutisa nwinyi wa muti a xiwutiso xi vuxako kutsakela xi seketelwako ka xigonzo u xi hlawulileko, u gumesa u kombisa lezi a broxura legi gi nga mu vunisako zona ku kuma a hlamulo lomu ka Biblia. Loku ku hi ni vidiyu yi yelanako ni xigonzo lexo lomu ka jw.org, a vahuweleli vo kari va kombisa vidiyu leyo ka xingheniso xabye.
3. Tlhamusela lezi xi to fambisiswa zona a xigonzo hi kutirisa a broxura Mahungu yo Saseka.
3 Mafambisela ya xigonzo: 1) Lera xiwutiso xi timisilweko kasi ku vuna a nwinyi wa muti lezaku a kongomisa kupima ka mhaka-tshinya. 2) Lera a nzimana yi lanzelako. 3) Lera mitsalo yi byeketilweko, u tlhela u tirisa ziwutiso hi wutlhari kasi ku vuna nwinyi wa muti ku wona lezi a mitsalo leyo yi hlamulisako zona a xiwutiso xi timisilweko. 4) Loku ku hi ni nzimana yinwani lahasi ka xiwutiso lexo, phinda lezi zi wuliwako ka 2 ni 3. Loku ku hi ni vidiyu yi zwananako ni xiwutiso lexo, na u nga se mu komba a nwinyi wa muti, maha lezo xikari ka mabhulo ya nwina. 5) Hi kugumesa, kombela nwinyi wa muti lezaku a hlamula xiwutiso lexi xi timisilweko xi nga laha ka broxura, kasi ku tiyiseka lezaku i zi zwisisile.
4. Xini xi to hi vuna ku tirisa a xitiro lexi hi wutlhari?
4 Gonza xitiro lexi xa lisima u xi tiva khwatsi. Xi tirise ni kwihi laha ku fanelako. Mahlweni ka xigonzo xinwe ni xinwani, alakanyela a xigonzani lexo ni tindlela ta chukwana ta ku ehleketisisa naye, hi ku tirisa a mitsalo yi nga ka xigonzo lexo. (Mav. 15:28; Miti. 17:2, 3) Laha u yako u tolovela ku gi tirisa, a broxura legi gi nga ha maha ginwe ga mabhuku ma ku tsakisako nguvu ku gonzisa hi wona vanhu a lisine!