Xi Hlayise
Xana wa tirisa mabroxura lawa?
A Bíblia — Qual É a sua Mensagem?
Gi mahelwe ku koka kupima ka vanhu va nga gi tiviko khwatsi a Biblia, nguvunguvu lava va nga ka wukhongeli gi nga hiko ga wuKristu
Manyikelela ya kona: “Hi tsakela ku tiva mawonela ya wena xungetano hi lezi zi wuliwako lomu Mitsalweni (kutani bhukwini legi go basa). [Gonza Tisimu 37:11, gi kumbukiwako ka xipanze 11.] Hi mawonela ya wena, xana a misava yi ta tshamisa kuyini loku a xiprofeto lexi xi tatiseka? [Rinzela hlamulo.] Lexi xikombiso xa kutsumba ni kuchavelelwa loku a vanhu va midawuko yontlhe ni wukhongeli gontlhe va zi kotako ku zi kuma ka Biblia.” Gonza a nzimana yo sangula ka phajina 3, u guma u nyikela a broxura.
U nga ha pima lezi: Loku u kari u fambisa a xigonzo xa Biblia hi bhuku A Biblia Gi Gonzisako ka munhu a nga hiko wa wukhongeli ga wuKristu, mbheta xikhatanyana kusanguleni kutani kugumeseni ka xigonzo xinwe ni xinwani na u bhulisana naye hi xipanze xinwe xa broxura legi kasi ku mu vuna a ku zwisisa a Biblia.
Um Livro Para Todas as Pessoas
Gi mahelwe ku koka kupima ka vanhu va gonzileko nguvu kanilezi na va nga gi tivi khwatsi a Biblia
Manyikelela ya kona: Gonza 2 Timote 3:16, 17, u tlhela uku: “Xana wa vumela a mhaka leyi yaku a Biblia gi pimisilwe hi Nungungulu? Kutani u alakanya lezaku gona gova bhuku ga gi nene ntsena? [Rinzela hlamulo.] A vanhu vo tala va na ni mawonela yo kari mhakeni leyi, kanilezi hi wonile lezaku va tsongwani lava hakunene va gonzileko a Biblia. [Gonza a tshango gi nga ka hloko ya mhaka ya phajina 3.] A broxura legi go hlamalisa gi xaxameta zigelo zo zwala za kuva vanhu va midawuko yontlhe ni va wukhongeli gontlhe va gonza lezi zi nga nzeni ka Biblia.”
U nga ha pima lezi: Loku a nwinyi wa muti a amukela a broxura, wula lezi: “A xinwe xa zigelo xi mahako vanhu va alakanya lezaku a Biblia a hi ga lisima hi lezaku a wukhongeli ga chakisa a Biblia ni tigonzo ta gona. Nzi tsakela ku wuya nzi ta ku nyika xikombiso xa zona.” A xikhati u tlhelako, bhulisana naye hi mahungu yo kari ma nga ka maphajina 4-5.
Wa Zi Kota Kuva Munghana Wa Nungungulu!
Gi mahelwe ku koka kupima ka vanhu va nga gonzangiko nguvu kutani va nga zi kotiko ku lera khwatsi
Manyikelela ya kona: “Hi mawonela ya wena, xana za koteka lezaku hiva vanghana va Nungungulu? [Rinzela hlamulo, u tlhela u gonza Jakobe 2:23.] A broxura legi gi mahelwe ku hi vuna lezaku hiva maxaka kutani vanghana va Nungungulu, a ku fana na Abrahama.”
U nga ha pima lezi: Ka lienzo lo sangula kutani ka lienzo lo wuyela, mu kombe lezi a xigonzo xa Biblia xi mahiswako zona hi ku kambisisa naye a xigonzo 1 kala xi mbhela kutani xipanze xa xona.
Como Ter uma Vida Satisfatória
Gi mahelwe ku koka kupima ka vanhu va nga hiko na wukhongeli
Manyikelela ya kona: “Hi enzela vanhu mitini yabye hakuva a votala va xuva kuva ni wutomi go tsakisa nguvu hi laha zi kotekako hi kona. Hontlheni ha welwa hi zikarato lezi zi hi mbhetako litsako. Loku zi tshuka zi hi humelela, hi nga ha kuma wusungukati ka xaka kutani munghana wo tsumbeka hambu ka Bibliyoteka kutani Internet. Ahati wena, hi kwihi laha u ku wonako na ku hi ni wusungukati go tsumbeka? [Rinzela hlamulo.] A vokari va hlamalile hi ku kuma wusungukati ga gi nene lomu ka Biblia. Hi nga khwatsi nzi ku nyika xikombiso. [Mu kombe a xipimo 2 u tlhela u lera a wunwe wa mitsalo yi tshahilweko.] A broxura legi gi mahelwe a ku hi tlhamusela a makumela ya wutomi gi tsakisako nguvu hi laha zi kotekako hi kona.”
U nga ha pima lezi: Loku a nwinyi wa muti a amukela a broxura, wula lezi: “A votala va zwile lezaku a Biblia gi tele hi zihoxo. Nzi tsakela ku wuya nzi ta ku komba lezi a Biblia gi wulako lisine ha zona mhakeni ya siensia niku lezo kuzilava zi ta ku hlamalisa.” A xikhati u mu tlhelelako gonzani a nzimana 4 ka phajina 12.
A Origem da Vida — Cinco Perguntas Que Merecem Resposta
Gi mahelwe vaswa va maKristu lava va gonzisiwako evolusawu xikoleni. Ga vuna kambe kasi ku pimisana ni vaseketeli va evolusawu, vakanakani va kuvakona ka Nungungulu, ni lava va nga kholwiko ka Nungungulu. (A broxura legi a gi mahelwangi ku nyikelwa hi muti-ni-muti.)
Ndlela ya ku gi tirisa loku hi bhula ni museketeli wa evolusawu kutani munhu a nga kholwiko ka Nungungulu: “Zi wonekisa ku khwatsi inyamutlha a mabhuku wontlhe ya siensia ma gonzisa evolusawu. Hi mawonela ya wena, xana a evolusawu i mhaka yi alakanyelwako kuva lisine kutani i mhaka ya lisine futsi? [Rinzela hlamulo.] Kasi ku kuma hlamulo wo tiya, nzi alakanya lezaku wa vumela ku ngalo i chukwana hi zwisisa lava va kholwako ka yona ni lava va nga yi kholwiko. A broxura legi gi komba a zigelo zo kari zi mahileko votala va kholwa lezaku a wutomi gi no vangiwa.”
U nga ha pima lezi: Loku uya xikoleni, veka a broxura legi hehla ka kartera ya wena kasi gi koka kupima ka zigonzani-kuloni.
A Vida — Teve um Criador?
Gi mahelwe ku hi vuna a ku sangula a xigonzo xa Biblia. Gi nga ha hi vuna kambe a ku pimisana ni vaseketeli va evolusawu, vakanakani va kuvakona ka Nungungulu, ni lava va nga kholwiko ka Nungungulu. A vapswali va ta wona lezaku a broxura legi xitiro xi nene xa ku vuna vanana lezaku va hlakulela kutsakela hi Nungungulu wa hina a hanyako
Ndlela ya ku gi tirisa kasi ku hlamula lava va nge vaseketeli va evolusawu kutani lezaku a va kholwi ka Nungungulu: “Nzi nga ku maha xiwutiso? Hikuyini u nga ni mawonela lawo? [Rinzela hlamulo.] Zi wonekisa ku khwatsi u alakanyele nguvu hi mhaka leyi. Zi wa tava zi nene loku a vanhu vanwani va wo maha zezo. Nza tiyiseka lezaku wa vumela a ku zi wa nga ta biha a ku a munhu a gonza timhaka ti nyikako xikombiso xa lezaku a wutomi gi no vangiwa. Nzi wa ta tsakela ku tiva a hlamulo wa wena ka timhaka to kari ku wulawulwako hi tona ka broxura legi.”
U nga ha pima lezi: Loku a munhu loyi u wulawulako naye a amukela a broxura, mu kombe a ziwutiso zi nga ka phajina 31, u guma u mu wutisa lezi: “Hi xihi a xiwutiso u tsakelako ku kuma hlamulo wa xona?” Mu kombe a xipimo xa bhuku A Biblia Gi Gonzisako, lexi xi hlamulako a xiwutiso lexo.
Por Que Devemos Adorar a Deus com Amor e Verdade?
Gi mahelwe ku koka kupima ka vaHindu
Manyikelela ya kona: “Le Índia ku na ni mukhongelo wu tivekako nguvu, wu nge ngalo: ‘Nzi suse mawunweni u nzi yisa lisineni. U nzi susa munyameni u nzi yisa kuwonekeleni.’ Hi mawonela ya wena, xana za lisima a ku khozela Nungungulu hi liranzo ni lisine? [Rinzela hlamulo.] Hi nga wona lezi Jesu a zi wulileko xungetano hi mhaka leyi.” Gonza Johani 4:24. Anzhako ka lezo, gonza a nzimana 4 ka phajina 3 u tlhela u mu nyika a broxura.
U nga ha pima lezi: Loku a nwinyi wa muti a amukela a broxura, wula lezi: “A titlhari to kari ta vaHindu ti ngalo a lisine li fihlele timbilwini ta hina. A vanwani ve ngalo a lisine li kumeka mitsalweni yo basa. Ka khati gi tako, nzi tsakela ku ta wulawula hi xiwutiso xi mahiwako magumo ka nzimana 3 ka phajina 4, xi nge: ‘Hi kwihi lomu hi faneleko ku lava kona a lisine la Nungungulu?’”
Nossos Problemas — Quem nos Ajudará a Solucioná-los?
Gi mahelwe ku koka kupima ka vaHindu
Manyikelela ya kona: “A vanhu vo tala lava hi wulawulako navo va karateka nguvu hi kubiha loku va ku wonako tikweni. Hi mawonela ya wena, xana Nungungulu i ta tshuka a tlhatlhisa a tiko zikaratweni za gona? [Rinzela hlamulo.] A xiprofeto lexi xa hi nyika kutsumba. [Gonza Tisimu 37:11.] Lezi nza ha hi ku gonzako nzi zi susa lomu ka Biblia, ku nga bhuku legi a kutala ka zikhati gi zwisiswako ni ku tiriswa hi ndlela ya hava. Kuzilava u nga hlamala hi ku tiva lezaku a Biblia a hi bhuku gi lumbako vanhu va Mupela-gambo; a gi kuci wukolonyi kutani kuchepetwa ka tixaka to kari ta vanhu. Kanilezi ga hi nyika a kutsumba ka lezaku Nungungulu lokuloku i ta fuvisa a zikarato za hina. Gi tlhela giva ni milayo yi hi vunako ku yimisana ni zikarato za hina zalezi. A broxura legi ga tlhamusela zinwani.”
U nga ha pima lezi: Ka lienzo lo wuyela, anzhako ka kuva u hlakulele a kutsakela ka nwinyi wa muti hi Biblia, mu kombe a mifananiso yi nga ka maphajina 4-5 ya bhuku A Biblia Gi Gonzisako. Hi wutsongwani ga kona, gonza a wunwe wa mitsalo leyi yi tshahilweko laho u tlhela u mu nyika a bhuku.
Haverá Algum Dia um Mundo sem Guerra?
Gi mahelwe ku koka kupima ka vaJuda
Manyikelela ya kona: “Hi kuya hi matimu, a vanhu va tshamela ku xaniswa hi tiyimpi. Hi mawonela ya wena, hikuyini hi simamako kuva ni tiyimpi hambu lezi a vanhu va nge va lava kurula? [Rinzela hlamulo.] A xiprofeto lexi xa Isaya xa nyika kutsumba. [Gonza Isaya 2:4.] Hambulezo, a mhaka leyi yi vuxa ziwutiso zo tala: Hi rini xi to tatiseka a xiprofeto xa Isaya niku xi ta tatiseka hi ndlela muni? Xigelo muni hi nga naxo xa ku tsumba a Mitsalo? A broxura legi gi hlamula ziwutiso lezo.”
U nga ha pima lezi: Loku a amukela a broxura, komba a nwinyi wa muti a maphajina 16-17 u tlhela uku: “A vanyingi va alakanya a tixapi to khwatsi hi kuhihiritwa ka maJuda hi vaNazi Yimpini ya Wumbiri ya Misava Yontlhe, va guma va wutisa lezi, ‘Loku Nungungulu a hi kona, hikuyini a vumelelako kuxaniseka?’ Ha zi kota ku bhula hi mhaka leyo loku nzi wuya.”
As Orientações de Deus — O Caminho para o Paraíso
Gi mahelwe ku koka kupima ka vaMwinyi lava va hanyako lomu va zi kotako ku gonza a Biblia hi kutlhatlheka
Manyikelela ya kona: “Ko khwatsi a vaMwinyi va kholwa ka Nungungulu munwe wa lisine ni ka vaprofeti vontlhe. Kani nzo phazama? [Rinzela hlamulo.] Nzi wa lava ku ku bhulela hi xiprofeto xa kale lexi xi wulawulako hi kuhunzulwa ka misava lezaku yi maha paradise. Xana nzi nga ku gonzela a mutsalo lowo? [Gonza Isaya 11:6-9.] A votala va ti wutisa lezaku xana Nungungulu i ta tisisa kuyini matshamela lawa misaveni ke. A broxura legi gi komba lezi a vaprofeti va zi wulako hi mhaka leyo.”
U nga ha pima lezi: Loku a nwinyi wa muti a amukela a broxura, wula lezi: “A bhuku legi ga Nungungulu gi tlhamusela lezaku kusanguleni, a munhu i wa hanya paradiseni. A siku ginwani legi hi to kumana, nzi wa tsakela ku ta hlamula a xiwutiso lexi, ‘Xana a munhu i hambukisile kuyini ka wurangeli ga Nungungulu laha ka kuza a luza a paradise?’” A xikhati u mu tlhelelako, kambisisani a masangulo ya xipanze xi sangulako ka phajina 6.
Verdadeira Fé — O segredo de uma Vida Feliz
Gi mahelwe ku koka kupima ka vaMwinyi lava va hanyako lomu va zi kotako ku gonza a Biblia hi kutlhatlheka
Manyikelela ya kona: Mu kombe a mufananiso wu nga ka maphajina 16-17 u tlhela uku: “A matshamela lawa ma hambana nguvu ni lezi hi zi wonako tikweni inyamutlha. Hi mawonela ya wena, xana za koteka lezaku a misava yiva ni matshamela lawa ka siku go kari? [Rinzela hlamulo.] Hi nga wona lezi zi tsumbisiwako hi bhuku legi ga Nungungulu. [Lera hi laha ka Biblia ga wena a mutsalo wunwe xikari ka leyi yi tshahilweko.] A broxura legi gi hi vuna a ku hlakulela a kukholwa ka lisine ka lezaku a zitsumbiso lezo zi ta tatiseka.”
U nga ha pima lezi: Kugumeseni ka lienzo lo sangula, kombela a nwinyi wa muti lezaku a hlawula xinwe xa ziwutiso zi nga ka xifenengeto xa broxura xa lenzhako. Anzhako ka lezo, maha malulamiselo ya ku mu tlhelela kasi ku ya hlamula xiwutiso lexo hi ku tirisa a broxura legi.
Como Ter Verdadeira Paz e Felicidade
Gi mahelwe ku koka kupima ka vaChina
Manyikelela ya kona: “Inyamutlha, a kuhanya ku na ni zikarato zo tala lezi zi hi mbhetako litsako. Wena ke, xini xi ku vunako a ku simama u tsaka hambu loku u yimisana ni zikarato? [Rinzela hlamulo.] A vanhu vo tala va kuma litsako hi ku lanzela a wusungukati legi ga Biblia. [Gonza Tisimu 119:1, 2.] A vokari va chepeta a Biblia na va alakanya lezaku i bhuku ga vahanyi va Mupela-gambo. Kanilezi, hi nga wona lezi. [Kambisisani a nzimana 16 ka phajina 17.] A broxura legi gi wulawula hi ndlela ya kuva hi kuma kurula ni kutsaka ka simasima.”
U nga ha pima lezi: Loku a nwinyi wa muti a amukela a broxura, lera naye a mafrazi manharu yo sangula ya nzimana 18 ka phajina 17 u tlhela uku: “Loku nzi wuya, nzi wa ta tsakela ku ku komba lezi hi zi kotako ku zi rinzela hi kuya hi Biblia.” A xikhati u mu tlhelelako, kambisisani a yinwe ya timhaka ta nzimana 6 ka phajina 30.