Broxura Giswa Gi To Nyikelwa
1. Xini hi to nyikela hi Novembro, niku hi gihi a kungo ga broxura lego?
1 Ka Gotsovanyano wa hina wa Muganga wa 2009, “Tshamani Na Mu Rinzele!” ku humesilwe a broxura giswa gi nga ni hloko ya mhaka A Bíblia — Qual É a sua Mensagem? Hi Novembro, a mabandla misaveni yontlhe ma ta gi nyikela hi khati go sangula. Xana a broxura legi gi ta va vunisa kuyini a vanhu lomu xipanzeni xa hina? A wunyingi ga vanhu, nguvunguvu lava va nga wukhongelini gi nga hiko ga wuKristu, va tiva zitsongwani xungetano hi Biblia. Hikwalaho, ka phajina 3, a broxura legi gi tlhamusela lezaku gi mahelwe a ku vuna vanhu a ku tiva a mahungu wontlhe ya Biblia hi ndlela yo songa.
2. Hi nga gi nyikelisa kuyini a broxura legi?
2 Ndlela Yo Gi Nyikela: Hi nga wula zo fana ni lezi: “Hi tsakela ku tiva a mawonela ya wena ka magezu lawa. [Gonza 2 Timote 3:16.] A votala hi wulawulako navo va ma vumela a magezu lawa; a vanwani ve ngalo a Biblia i bhuku ga gi nene ntsena. Xana wena u alakanya yini hi Biblia? [Rinzela hlamulo.] Na ku nga khataliseki lezi a tigonzo ta hina ta wukhongeli ti nga zona, ku na ni zigelo zo zwala za kuva hi kambisisa a Biblia hi hoce. [Gonza a nzimana ya xingheniso yi nga lehehla ka phajina 3.] Laha u gonzako a mahungu lawo yo tsakisa ma wulawulako hi Biblia hi ndlela yo songa lomu ka broxura legi, u ta wona nchumu wu to ku koka kupima: A Biblia gontlhe gi na ni hloko yinwe ya mhaka ni mahungu manwe.”
3. Hi yihi a ndlela yinwani yo nyikela a broxura legi, nguvunguvu lomu a votala va lumbako a wukhongeli gi nga hiko ga wuKristu?
3 Laha ku na ni mahela ginwani, nguvunguvu loku hi xumayela lomu a vanhu vo tala va lumbako a wukhongeli gi nga hiko ga wuKristu: “Hi tsakela ku tiva a mawonela ya wena xungetano hi lezi zi wuliwako lomu Mitsalweni (kutani lomu bhukwini legi go basa). [Gonza Tisimu 37:11.] Xana u alakanya lezaku a misava yi ta tshamisa kuyini a xikhati lexi a xiprofeto lexi xi to tatiseka? [Rinzela hlamulo.] Lexi xikombiso xa kutsumba ni kutangaliswa loku a vanhu va midawuko yontlhe ni wukhongeli va zi kotako ku ku kuma lomu ka Biblia.” Gonza a nzimana yi nga lehehla ka phajina 3 zonake u nyikela broxura.
4. Hi nga gi tirisisa kuyini a broxura legi kasi ku sangula a xigonzo xa Biblia?
4 Sangula A Xigonzo Xa Biblia: A xikhati lexi hi tlhelelako a nwinyi wa muti, hi nga ha mu alakanyisa a mabhulo ya hina ma hunzileko zonake hi gonza a nzimana yinwe kutani timbiri ta hloko ya mhaka leyi hi wulawulileko hi yona, hi tlhela hi tirisa a ziwutiso zi nga magumo ya xipanze lexo. Kutani ku, loku hi lava ku tekela ku maha xingheniso xa bhuku A Biblia Gi Gonzisako, ha zi kota ku gonza naye a xifenengeto xa lenzhako xa broxura, hi mu nyika a bhuku, hi wutisa lezaku hi xihi a xipimo xi mu tsakisako zonake hi gonza naye a nzimana yinwe kutani timbiri ta xipimo lexo. Ngha hina hontlhe hi maha zontlhe hi zi kotako kasi hi nyikela a broxura legi hi Novembro!