“Mahungu yo Saseka ya Nungungulu!” Hi nga gi tirisisa kuyini?
Broxura giswa gi mahelweko ku hi vuna ku maha maenzo yo wuyela ni ku sangula zigonzo za Biblia
1. Hi gihi broxura ga giswa gi humesilweko ka Gotsovanyano wa Muganga “Hlayisa Mbilu ya wena!” gi mahelweko ku hi vuna ku maha maenzo yo wuyela ni ku sangula zigonzo za Biblia?
1 Ka gotsovanyano wa muganga “Hlayisa Mbilu ya wena!,” hi tsakile nguvu hi ku amukela a broxura giswa kasi ku hi vuna ku maha maenzo yo wuyela ni ku sangula zigonzo za Biblia. A broxura Mahungu yo Saseka ya Nungungulu! ga fana ni broxura Lezi Nungungulu A Zi Lavako, gi valetiwako hi legi, hakuva a zigonzo za gona a zi djikadjiki. Lezi zi ta hi vuna ku gi tirisa kasi ku fambisa zigonzo za Biblia ni vanhu va nga ni xikhati xitsongwani. Kanilezi, a ku hambana ni broxura Lezi Nungungulu A Zi Lavako, legi gi nga wulawula hi lezi zi lavekako ka muKristu, lezi zi nga ha karatako ku a xigonzani xi zi zwisisa, a broxura legi ga giswa gi wulawula hi mahungu yo saseka ma kumekako lomu ka Biblia. — Mit. 15:35.
2. Hikuyini ku humesilweko a broxura Mahungu yo Saseka?
2 Hikuyini gi humesilweko? A vamakabye misaveni yontlhe vata na va kombela a bhuku go olova kasi ku kokela vanhu lisineni na gi hi legi gi zi kotako ku tiriswa kota xingheniso xa xigonzo xa bhuku A Biblia Gi Gonzisako, gi nga xitiro xa hina xo sangula ka zigonzo za Biblia. A vanhu lava va chavako loku va wona bhuku va tala ku vumela ku gonza a Biblia hi broxura. Tlhatakumbiri, a broxura ga olova nguvu ku gi hunzulusela hi tirimi to tala nguvu.
3. Hi kwihi a kuhambana ka broxura legi ni mabhuku manwani ya xigonzo?
3 Lezi gi mahisilweko zona: A kutala ka mabhuku ya hina ya xigonzo ma tsalilwe hi ndlela ya ku a munhu a nga gi gonza a tlhela a zwisisa lisine hambu loku a nga vuniwi hi munhu. A broxura legi gi hambene. Gona gi tsalilwe kota giya ga xigonzo xa Biblia na u hi ni mugonzisi. Hikwalaho, a xikhati u gi nyikelako ka munhu, i chukwana u gonza naye nzimana yinwe kutani timbiri. A tinzimana ta kona ti komile, hikwalaho hi nga gi gonza ni munhu hambu bazarini kutani ni munhu a nga ni xikhati xitsongwani. Hambu lezi zi nga zi nene a ku sangula hi ka xigonzo 1, hi nga sangula xigonzo ni ka gihi wutshamu.
4. Xana a broxura legi gi hi vunisa kuyini ku gonzisa lomu ka Biblia hi kukongoma?
4 A ka kutala ka mabhuku ya hina, a mihlamulo ya ziwutiso zi nga kona yi kumeka nzeni ka tinzimana. Kanilezi, ka broxura legi, a mihlamulo yi kumeka nguvunguvu lomu ka Biblia. A vanhu vo tala va lava ku gonza lomu ka Biblia na ku nga hi lomu ka mabhuku ya hina. Hikwalaho, a kutala ka mitsalo leyi yi kumbukilweko a yi tshahiwangi. Yona yi lava ku leriwa lomu ka Biblia hi kukongoma. Lezi zi ta vuna a zigonzani ku wona lezaku lezi va zi gonzako zita hi ka Nungungulu. — Isa. 54:13.
5. Hikuyini zi nga za lisima ku a mugonzisi a ti longisela khwatsi kasi ku ya fambisa xigonzo?
5 A broxura legi a gi tlhamuseli yontlhe mitsalo. Hikuyini? Gi mahelwe ku kuca a xigonzani lezaku xi maha ziwutiso gi tlhela gi vuna mugonzisi a kuva a tirisa a wutlhari gakwe ga ku gonzisa. Hikwalaho, za lisima a ku ti longisela khwatsi kasi ku ya fambisa xigonzo. Lezi u faneleko ku ti wonela ka zona hi lezi: U nga wulawuli nguvu. Ha zi ranza nguvu ku tlhamusela a Mitsalo. Kanilezi a kutala ka zikhati hi bhinzula nguvu loku hi ramba a xigonzani lezaku xi tlhamusela lezi xi wu zwisako zona a mutsalo lowo. Loku hi tirisa a ziwutiso hi wutlhari, hi nga mu vuna ku zwisisa a mutsalo wunwe ni wunwani ha yece. — Mit. 17:2.
6. Hi nga gi tirisisa kuyini a broxura legi: (a) lomu a vanhu va kalako va nga kholwi ka Nungungulu ni ka Biblia? (b) loku hi kari hi xumayela hi muti ni muti? (c) loku hi kari hi tirisa a xingheniso xo kongoma kasi ku sangula zigonzo za Biblia? (d) loku hi kari hi maha maenzo yo wuyela?
6 A ku fana ni mabhuku manwani ya ku fambisa hi wona zigonzo, a broxura legi gi nga nyikelwa ni ka xihi xikhati, na ku nga khataliseki ku i bhuku muni gi nyikelwako ka hweti leyo. A votala va ta tsakela ku gi tirisa na va lanzela a xingheniso xo kongoma kasi ku sangula zigonzo ni vanhu va nga ni xikhati xi tsongwani. A ku hunza lezo, kota lezi zi kumbukilweko gotsovanyanweni wa muganga, a ku gi tirisa loku hi kari hi tlhelela vanhu va kombisileko ku tsakela ‘zi maha lezaku a maenzo yo wuyela ma tsakisa futsi!’ — Wona makwadru ka maphajina 5-7.
7. U nga fambisisa kuyini xigonzo xa Biblia hi ku tirisa a broxura legi?
7 Mafambisela ya xigonzo: Hi nga ha sangula a bhulo hi ku lera a ziwutiso zi timisilweko lezi xaxametilweko hi tinombora. Hi kulanzela, hi gonza a nzimana ni mutsalo kutani mitsalo leyi yi byeketilweko. Tirisa ziwutiso hi wutlhari kasi ku vuna a nwinyi wa muti lezaku a zwisisa lezi a mutsalo wu wulako zona. Na mu nga se hunza muya ka xipanze xinwani, kombela a nwinyi wa muti lezaku a hlamula a xiwutiso lexi xi timisilweko xi nga laha ka broxura, kasi ku tiyiseka lezaku i zi zwisisile. Ka masiku yo sangula, zi chukwana ku bhulisana hi xiwutiso xinwe ntsena xi timisilweko. Hi kufamba ka xikhati, mu nga ha lehisa mabhulo mu wulawula hi xigonzo xontlhe.
8. Hi fanele ku wula yini loku hi lava ku vulula mutsalo, niku hikuyini?
8 A mitsalo leyi yi nga tsaliwa ku “gonza” hi yona nguvunguvu yi hlamulako a xiwutiso lexi xi timisilweko. Loku u lava ku lera mutsalo, i chukwana u nga wuli ku: “Mupostoli Paule i tsalile lezi” kutani ku “Wona a xiprofeto lexi xa Jeremia.” A nwinyi wa muti a nga alakanya lezaku ho lera magezu ya vanhu. Zi ngava chukwana ku wula lezi, “A Mhaka ya Nungungulu yi ngalo” kutani, “Wona a xiprofeto lexi xa Biblia.”
9. Xana yontlhe mitsalo yi kumbukilweko yi fanele ku leriwa kufambiseni ka xigonzo?
9 Xana hi fanele ku gonza mitsalo yontlhe kutani hi leyi yi nga tsaliwa ku “gonza” ntsena? Maha hi kuyelana ni xiyimo xa kona. A mitsalo yontlhe yi kumbukilweko yi tsalilwe hi xigelo xo kari. A wunwe ni wunwani wa yona wu na ni mahungu ya lisima ma ringanako ku bhulisana hi wona. Kanilezi ka makhati yo kari, loku hi wona lezaku a xigonzani xi na ni xikhati xitsongwani, a xi tsakeli khwatsi, kutani a xi leri khwatsi hi nga ha zi wona na zi hi chukwana a ku lera a mitsalo leyi yi nga tsaliwa a ku “gonza” ntsena.
10. Xikhati muni hi nga cicako xigonzo hi nghena ka bhuku A Biblia Gi gonzisako?
10 Xikhati xa ku cica hi nghena ka bhuku A Biblia Gi Gonzisako: Anzhako ka ku ngha na hi bhulisene ni ku ngha na hi gonza hi kukhanzakanya, ha zi kota ku cica hi nghena ka bhuku A Biblia Gi Gonzisako kutani ku simama ka broxura Mahungu yo Saseka kala hi gi mbheta. A vahuweleli va nga ha tirisa a wutlhari gabye kasi ku boha ku hi rini va to cica. Loku hi cica hi nghena ka bhuku A Biblia Gi Gonzisako, xana hi fanele ku sangula ka xipimo 1? A ku na xileletelo xi wulako lezo. A vanhu va hambene. Kanilezi, a zigonzani zo tala zi ta vuneka hi ku tlhela mu gonza a mhaka yaleyi ya yinwe yi tlhamuselweko khwatsi lomu ka bhuku A Biblia Gi Gonzisako.
11. Hikuyini hi faneleko ku gi tirisa khwatsi a broxura legi ga giswa?
11 Tikweni legi a mahungu yo saseka ma kalako, hi na ni lungelo ga hombe ga ku huwelela a mahungu yo saseka nguvu ka wontlhe lawa a vanhu va ma zwako — lawa yaku a Mufumo wa Nungungulu wa fuma niku lokuloku wu ta neha misava yiswa laha a kululama ku to tshama kona! (Mat. 24:14; 2 Ped. 3:13) Ha tsumba lezaku a vanhu vo tala va zwako a mahungu lawa va ta ti zwananisa ni magezu lawa ma pimisilweko: “Yi sasekisile kuyini le zitsungeni a mikonzo ya loyi a nehako a mahungu yo saseka, loyi a wulawulako kurula; loyi a nehako mahungu yo saseka yo tsakisa, a kanelako hi kuhanyisa; loyi a nge ngalo ka Zioni: Nungungulu wa wena wa fuma!” (Isa. 52:7) Ngha hi tirisa a broxura legi ga giswa kasi ku nyika mahungu yo saseka ya Nungungulu ka vanhu lava va nga ni tora lomu xipanzeni xa hina!
[Tlhamuselo wa mifota ka phajina 5]
Lomu a vanhu va nga kholwiko ka Nungungulu ni ka Biblia:
● Ka matshamu yo kari, a vahuweleli va polile lezaku a magezu “Nungungulu” ni “Biblia” ma maha lezaku a vanhu va tsema bhulo. Ka matshamu lawo, zi tava chukwana ku ka lienzo lo sangula hi wulawula hi zilo va zi tsakelako, zo kota a xilaveko xa kuva ni mufumo wu nene, wutshamu legi a mingango yi nga kumako kona a xivuno, ni wumanziko. Kuzilava a broxura Mahungu yo Saseka hi nga gi tirisa anzhako ka kuva hi va enzele masiku yo hlayanyana, hi ya wulawula hi lezi zi hi tiyisako lezaku Nungungulu i kona ni lexi xi mahako a Biblia giva go tsumbeka.
[Tlhamuselo wa mifota ka phajina 6]
Loku hi famba hi muni ni muti:
● “Nzi famba nzi vuxela vanhu kasi ku va komba lezi zi hehukisako zona a ku tiva lezi Nungungulu a lavako ku mahela vanhu xikhatini xi tako. Xana u tshuka u ti wutisa ku Nungungulu i ta hi tlhatlhisa ka kuxaniseka ke? [Rinzela hlamulo.] A broxura legi gi komba laha u nga kumako kona a hlamulo wa xiwutiso lexi lomu ka Biblia. [Mu nyike a broxura, mu tlhela mu gonza a nzimana yo sangula ya xigonzo 1, zinwe ni Jeremia 29:11.] Ka lezi, xana ka wena zi wonekisa ku khwatsi Nungungulu i lava lezaku hiva ni wumanziko ga gi nene? [Rinzela hlamulo.] Loku u zi lava nzi nga ku siyela a broxura legi. Ka siku ginwani, hi ta bhula hi nzimana ya wumbiri kasi ku kuma a hlamulo wa xiwutiso lexi, ‘Xana Nungungulu i ta tlhatlhisisa kuyini vanhu ka lezi zi va vangelako kuxaniseka?’” Loku a nwinyi wa muti a wonekisa ku khwatsi i na ni xikhati xo lehanyana ka lienzo lo sangula, mu nga ha gonza a nzimana ya wumbiri ni mitsalo ya kona ya yinharu. Bhulani siku ga ku tlhela mu ya bhulisana hi xiwutiso xa wumbiri xa xigonzo lexo.
● “A vanhu vo tala va zi ranza ku maha mikhongelo, nguvunguvu loku va hi ni zikarato. Xana wa tshuka u khongela? [Rinzela hlamulo.] U alakanya lezaku Nungungulu wa ingisela yontlhe mikhongelo, kutani yi kona yi kalako yi nga mu tsakisi? [Rinzela hlamulo.] Nzi na ni broxura legi gi kombako ku hi nga kumisa kuyini a hlamulo wa Biblia wa ziwutiso lezi. [Mu nyike a broxura, mu tlhela mu bhulisana hi nzimana yo sangula ya xigonzo 12 ni mitsalo leyi yi nga tsaliwa ku “gonza.”] A zi tsakisi ku tiva lezaku Nungungulu i ti yimisele ku ingisa a mikhongelo ya hina? Kanilezi kasi hi vuneka khwatsi ka mukhongelo, hi fanele ku mu tiva khwatsi Nungungulu. [Mu kombe a zihlokwana za mhaka zi nga ka xigonzo 2.] Loku u zi lava, nzi nga ku siyela a broxura legi nzi tlhela nzi wuya siku ginwani kasi hi ta gonza a mihlamulo ya Biblia ka ziwutiso lezi za lisima.”
● “Nzita laha hi ku tiva lezaku a vanhu vo tala va karateka hi ku lava ku tiva ku a tiko legi gi penga giya kwihi ke. U alakanya lezaku a matshamela ya tiko legi ma ta tshuka ma chukwata? [Rinzela hlamulo.] A vanhu vo tala va hlamala loku vazwa lezaku a Biblia gi na ni mahungu yo saseka ma nyikako kutsumba. Wona a ziwutiso zo kari zi hlamuliwako lomu ka Biblia.” Mu nyike a broxura, u tlhela u mu kombela ku a hlawula xiwutiso lexi xi mu tsakisako nguvu laha ka kapa ya lenzhako. Vulula xigonzo lexo, u sangula xigonzo xa Biblia. Bhulani siku ga ku tlhela mu ya bhulisana hi xiwutiso xi lanzelako ka xigonzo lexo.
[Tlhamuselo wa mifota ka phajina 7]
Ringisa a xingheniso xo kongoma:
● “Nzi ku enzelenyene kasi ku ta ku komba kurso yiswa ya xigonzo xa Biblia. A broxura legi gi na ni 15 wa zigonzo lezi zi kombako laha u nga kumako kona a mihlamulo ya ziwutiso za lisima lomu ka Biblia ga wena. [Mu kombe a kapa ya seno mahlweni ni ya lenzhako.] Xana u tshuka u zama ku zwisisa a Biblia? [Rinzela hlamulo.] Khwatsi nzi ku komba lezi a zigonzo za gona zi hehukisako zona. [Bhulisanani hi nzimana yo sangula ya xiwutiso 3 laha ka xigonzo 3, mu tlhela mu gonza Kuvululelwa 21:4, 5. Loku zi ringana, bhulisanani hi nzimana yi lanzelako ni mitsalo leyi yi tsalilweko ku “gonza.”] Loku u zi lava nzi nga ku siyela a broxura legi. Ha ku kuca ku ringisa a kurso leyi ya yiswa. Loku u yi tsakela, u nga simama. Ka siku ginwani, hi nga hata hi ta bhulisana hi xigonzo xo sangula. Wona lezaku xova ni phajina ginwe basi.”
[Tlhamuselo wa mifota ka phajina 7]
Gi tirise ka lienzo lo wuyela:
● Loku u enzela munhu a kombisileko kutsakela, u nga ha wula lezi: “Nza tsaka hi ku tlhela hi wonana. Nzi ku tele ni broxura legi gi hlamulako ziwutiso zo tala zo tsakisa. [Mu nyike a broxura u tlhela u mu kuca a ku cuwuka a kapa ya lenzhako.] Hi xihi xiwutiso xi ku tsakisako nguvu? [Rinzela hlamulo, u guma u vulula a xigonzo lexi a to xi hlawula.] Khwatsi nzi ku komba lezi a broxura legi gi nga tirisiswako zona kasi ku kuma a hlamulo wa Biblia.” Sangula a xigonzo xa Biblia hi ku gonza naye a nzimana yinwe kutani timbiri ni mitsalo leyi yi tsalilweko ku “gonza.” Hi kumaha loko u tava u sangulile xigonzo xa Biblia! Mu siyele a broxura, mu tlhela mu bhula a siku ga ku tlhela. Loku mu mbheta a xigonzo lexo, mu nga ha bhulisana hi xigonzo xinwani xi hlawulilweko hi nwinyi wa muti kutani ku sangula hi ka xigonzo 1 xa broxura.