Hi Vamani va Mahako Kuranza ka Jehova Inyamutlha?
Hi nga gi tirisisa kuyini? Broxura giswa gi mahelweko ku kongomisa zigonzani za Biblia Hlengeletanweni
1. Hi zihi zigelo zinharu za kuhumesiwa ka broxura Kuranza ka Jehova?
1 Xana u sangulile ku tirisa a broxura giswa Hi Vamani va Mahako Kuranza ka Jehova Inyamutlha? A kungo ga gona (1) ku vuna zigonzani za Biblia lezaku zi tiva a Timboni ta Jehova, (2) ku zi vuna ku gonza xungetano hi mitiro ya hina, ni (3) ku zi komba a matirela ya hlengeletano ya hina. A broxura Kuranza ka Jehova gi na ni zigonzo za phajina ginwe lezi zi nga gonziwako hi ntlhanu kutani khume ga timeneti anzhako ka xigonzo xinwe ni xinwani.
2. Tlhamusela matshamela ya broxura legi.
2 Lezi gi mahisilweko zona: A broxura legi gi avanyisilwe hi zipanze zinharu. A xinwe ni xinwani xi tlhamusela a matshamela yo hambanahambana ya hlengeletano ya Jehova ma kombisilweko laha hehla. A hloko ya mhaka ya xinwe ni xinwani xa 28 wa zigonzo za gona yi tsalilwe kota xiwutiso lexi xi hlamuliwako hi zihlokwana za mhaka zi nga timisiwa lezi zi lanzelako. A broxura legi gi na ni mifota ya kwalomo ka kuhunza 50 wa matiko, yi mahelweko ku komba lezaku a ntiro wa hina ngwa misava yontlhe. A zigonzo zo tala zi na ni makwadru “Tiva zinwani,” lawa ma nga ni mawonela lawa u nga kucako xigonzani xa wena lezaku xi ma lanzela.
3. Hi nga gi tirisisa kuyini a broxura Kuranza ka Jehova?
3 U nga gi tirisisa kuyini?: Sangula hi ku mu komba a xiwutiso lexi xi nga hloko ya mhaka ya xigonzo. A xikhati lexi mu lerako zinwe a xigonzo lexo, khanyisa a zihlokwana za mhaka lezi zi nga timisiwa. Hi kugumesa, bhulisanani hi ziwutiso lezi zi nga lahasi ka phajina. U nga ha lera a xigonzo xontlhe hi khati ginwe kutani ku xi lera hi zipanzana. Tirisa a wutlhari ga wena kasi ku boha ku hi yihi mitsalo u to lera. Mu nga rivali ku bhulisana hi mifota ni makwadru “Tiva zinwani.” A kutala ka zikhati, zi chukwana ku sangula hi ka xigonzo xo sangula muya mahlweni. Kanilezi, tlhatlheka ku tlula uya ka xigonzo xi wulawulako hi mhaka yi lavako ku khatalelwa hi xihatla. Hi xikombiso, loku ku kari ku tshinela mutlhangano wa xipanze kutani gotsovanyano, u nga ha tlula uya ka xigonzo 11.
4. Hikuyini u tsakako hi kuva ni broxura legi ga giswa?
4 Loku hi gonza a Biblia ni munhu, hi mu vuna ku tiva a Dadani wa hina wa le tilweni. Hambulezo, hi fanele ku tlhela hi mu gonzisa ku tiva a hlengeletano ya Jehova. (Mav. 6:20) A ho ku tsaka hi kuva ni broxura legi gi hi vunako ku maha lezo!